Святой Пантелеимонэз буре вайизы

Дун-сьӧлыктэм Пантелеимонэз буре ваён нуналэ Казань епархиысь храмъёсын, Казаньысь но Татарстанысь митрополитлэн Кириллэн бакель каременыз (благословить каременыз) молебенъёс ортчизы. Православной осконэн улӥсь адямиос Дун-сьӧлыктэм Пантелеимонлы кышкыт висёнлэсь мозмыны мед юрттоз шуыса вӧсяськизы.

Котькуд оскись муртлэн улоназ луэ, дыр, сыӵе югдурез, куке солы, сӧл-тазалык курыса, Инмарлы но Дун-сьӧлыктэмъёслы вазиськыны тупа. Православной осконын Дун-сьӧлыктэм Пантелеимон вашкала дырысен эмъясь луыса лыдъяське.

Святой 275-тӥ арын (со аръёс православной осконэн улисьёслэн секыт дыръёссылы тупало) Никомидия городын вордскем. Атаез сульдэръёслы (идолъёслы) йыбыртъясь (идолопоклонник) луэм. Нош анаез православной осконэн улэм. Пичи дырысеныз пияш, анаезлэсь вӧсяськемзэ адӟыса, Инмарлы оскыны кутскем. Жаляса верано, анаез та улонысь вазь кошкем. Нош Пантолеон (святойлы вордскыкуз сыче ним сётӥллям) городысьтыз самой усто эмъясь доры дышетскыны интыяськем. Дышетсконзэ йылпумъяса, ас ужезлэн зэмос усточиез луэм. Огпол Пантолеон одиг вӧсьчиен тодматскем но солэсь тодэм Инмар сярысь. Сое туж паймытэм Христослэн кулэмъёсты пыд йылазы султытэмез, улӟытэмез. Кӧня ке дыр ортчыса, Инмарлы юн оскись Пантолеон ачиз но вӧсяськыса кулэм адямиосты улӟытыны кутскем, бурмытыны луонтэм висисьёсты йӧнатэм.

Православие понна солы трос шуг-секытъёсты ас вылаз шӧдыны но адӟыны тупам. Дун-сьӧлыктэм Пантелеимон трос адямиосты православие оскон пала берыктыны быгатэм. Язычникъёс солы сульдэръёслы йыбыртъяны косӥллям, нош со кылзӥськымтэ. Инмарлы юн оскемез солы со дыре кылдэм шуг-секытъёсты но адӟонъёсты сӥ-данэн ортчыны юрттэм. Со улон эскеронъёс дыръя трос паймымон но оскыны луонтэм учыръёс луиллям. Дун-сьӧлыктэм Пантелеимонлэсь йырзэ ӵогыкузы, вир интые музъеме йӧл виям. Эксэй солэсь мугорзэ писпуэн ӵош ӝуатыны косэм (святой со писпу борды думемын луэм вылэм). Та учыр 305-тӥ арын луэ.

Со дырысен дуннеысь вань христиан калык егит страстотерпецлы лул тазалык но мугор тазалыксы понна вӧсяське. Арлы быдэ 9-тӥ гудырикошконэ, Дун-сьӧлыктэм Пантелеимонэз буре ваён нуналэ, Россиын но, солэн палэназ но православной осконэн улӥсь адямиос черкъёсын Святойлэсь тазалык курыса вӧсясько.

Озьы, Ципьяысь Святой Троицалэн храмаз но 9-тӥ гудырикошконэ литургия бере молебен ортчытӥзы. Быдэс дунеез кӧшкемыт висёнлэсь — коронавируслэсь — мозмытыны мед юрттоз шуыса, вань калыкъёс, куспазы тупаса но эшлыко мед улозы шуыса, Святойлы вӧсяськизы.

Дун-сьӧлыктэм Пантелеимонлэн обросэз шоры котькытын сӥё-дано учко. Котькуд оскись адями со доры аслаз куронъёсыныз лыктэ. Нош Святой юрттэ.

— Оскомы, огъя люкаськыса вӧсяськеммес Святоймы кылоз но вань калыкъёслы тупаса но сӧл-таза улыны юрттоз шуыса, — ас малпанъёссэ вераз отец Владимир, Ципьяысь черклэн настоятелез. — Со понна оскыса но сюлмысь куриськыны гинэ кулэ. Ваньмы таза луоме!