"Та машина - трос аръёс ӵоже мынам матысь эше"

Ужам стажез солэн 35 ар луэм ини. Армие кошкытозяз но та обществоын ужам, бертэм бераз но ужезлэсь куштӥськымтэ — машинае ужаны пуксем. Со дырысен машинаосын ужамлэсь уг дугды Николай Александрович. «ГАЗ-52», «ГАЗ-51», машинаосын, озьы ик «ЗИЛ» машинаен ужаса вутскем со. Туннэ нуналэ «ГАЗ-53» машинаен тырше.

— Тани та машинаен ик ужасько ини, — шуэ Николай Александрович. - Трос аръёс ӵоже со мынам матысь эше луэ. Ӵукна соин фермае фураж нуллӥсько, вукое ю тысь пыртӥсько, вукочи сое изэ но, ӵукнаяз собере мон сое фермае нуисько. Та ужез гинэ ӧвӧл, мар карыны косӥзы, сое кариськомы ни, — валэктэ водитель.

Валамон, пӧртэм дыръёс луо, пӧртэм ужъёсты быдэстыны тупа. Арлы быдэ Николай Александрович октон-калтон ужъёсы но пыриське. Толалтэзэ амбарын ужа. Куддыръя ремонт ужъёс но луыло. Огъя вераса, татын нокин но ужлы уг ёрмы. Карек-Серма гуртын ферма луыку, Николай Александровичлэн кузпалыз но, Надежда Семёновна, ветыл сюдӥсь луыса ужам.

— Коллективмы туж умой. Шумпотӥсько, монэ татын гажало шуыса. Куспамы тупаса ужаськомы, ог-огмылы котьку юрттыны но дась. Турья пи Анатолий Коняев нуналлы быдэ автобусэн ужаны ветлытэ милемыз, ноку но отказ сётэмез ӧвӧл, котьма ласянь юрттэ (вераны кулэ, Анатолий Германовичез Рафкат Накипович но ушъяса вераз — Н.Ж.). Тазьы ужаськомы бере, туж умой со, — шуэ Николай Александрович. Котьку но озьы мед луоз.

Жаляса верано, «Бурнакысь» котькуд ужасен вераськыса ӧм вуэ. Ма, соиз валамон но: ужась адямиосты ӝегатыны уг яра. Владимир Якимовен но, Николай Копаровен но ужакузы ӝог гинэ вераськыны луиз. Тау, отказ ӧз сётэ, ужзэс кельтыса, милемлы дырзэс висъязы. Турья гуртысь Анатолий Коняев сярысь но гожтэме потэ вал, ужан интыысьтыз шедьтыны ӧз луы. Оскисько, вуоноын со но статьяелэн героез луоз шуыса.