Тазалыкез утён — сюлмыныз быръем удыс

20-тӥ инвожое асьсэлэсь ӧнер праздниксэс тазалыкез утён удысын ужасьёс пусъё. Та праздникен валче Балтасьысь ёрос больницаын кема аръёс ӵоже нылпи ваён ёзэтын ужась эмсузэр (медсестра) Екатерина Шадрова сярысь гожтэме потэ. Нялтас вераса, та нуналъёсы нылкышно юбилейзэ но пусйиз, солы 50 арес тырмиз. 
Мазэ ватонэз: тазалыкез утён удысын эмсузэръёс одӥгзэ тужгес кулэ луись люкетсэ кылдыто. Соос врачъёслэн валтӥсь юрттисьёссы луо. Соос калыклы медициная туж трос услугаосты возьмато. Соин эмсузэръёслэн тыршемзы калыкын котьку но вылӥ дунъяськиз. Екатерина Борисовна но сыӵе гажамон, адӟем карымон, примере пуктымон медсестраослэн одӥгез луэ. 
Шадрова (Слотина) Екатерина Борисовна Марий Эл республикаысь Мари-Турек ёросын, Бадӟым Карлыган (Ӟаны Починка) гуртын вордскем. Школаын дышетскыкуз ик Екатерина визьмо, тыршись нылаш луэм, ассэ умой паласен гинэ возьматэм. Школазэ йылпумъямез бере, егит ныл Ижкарысь медициная училищеысь медсестринской отделение дышетскыны пыре, 1991-тӥ арын сое йылпумъя. Со арын ик Ӟаны гуртысь Александр Шадровлы картлы кошке (нялтас вераса, август толэзе семьязылы но 30 ар луэ вылэм ини), егит семья Покчи Лӧзяе улыны интыяське. 
Екатерина Борисовна дышетсконзэ йылпумъямез дырысен аслаз ӧнерезъя ужа — нырысь со инфекционной больницае ужаны интыяське, нош одӥг арскын — ёросысь центральной больницаысь нылпи ваён ёзэтэ. Со дырысен туннэ нуналозь но Екатерина Борисовна со интыужаз тырше. 
Нылкышноез ас ужезлэсь усточизэ, ужлэсь кышкасьтэм сотрудникез кадь тодо. Ужез сменаен радъямын бере, адӟем карымон эмсузэрлы ӵемысь уйин сменаосы но ужаны тупа. Юрттэт курыса вазиськемъёслы но отказ сётэмез ӧвӧл — нуназе-а, ӝыт-а, уйин-а. Кызьы кышноеныз данъяськыса пусйиз Екатерина Борисовналэн кузпалыз Александр, доразы соослэн аспӧртэмлыко «поликлиника». Адями но ноку уг быры — кинлы ке укол пуктоно, кинлы ке кенеш сётоно луэ. 
Огшоры гинэ уг верало, медицина — со уж ӧвӧл, со призвание шуыса. Ӵапак Екатерина Борисовна сярысь но вераны луэ: тазалыкез утён удысэз со сюлмыныз быръем. Таин соглаш луэмзэ вераз Екатерина Шадровалэн эшез Лариса Игнатьева: 
— Катя сюлмыныз ужезлы сётскыса тырше. Ужез но солэн капчи ӧвӧл, али вордскем нылпиосын ужа ведь со. Котькуд нылпи понна сюлмаське, котькудӥз сярысь малпаське со. Туала дыре трос ведь сыӵе ужасьёс, кудъёсыз нуналэз ортчытон понна ужало, нош Катя воксё сыӵе ӧвӧл. Ваньмыз ласянь туж положительной адями со. 
Апайзэ ушъяса вераз Екатерина Борисовналэн сузэрыз Галина Евдокимова но: 
— Ми семьяямы сизьым кузя нылпиос, Катя апай — ньылетӥез. Сое асьме ёросамы умой медсестраез кадь тодо, со зэмзэ но озьы. Аслэсьтыз ужзэ со яратэ но солы оскем ужъёсты котьку пыр-поч быдэстыны тырше. Со котьку вера, мукет ужын ужаны уз быгатысал, дыр, шуыса. Нош мон вераны быгатӥсько, со умой но туж йӧно апай шуыса. Ми кыкнамы тужгес но матын, малы ке шуоно сизьым нылпиос пӧлысь кыкнамы гинэ та палан, мукетъёсыз кыдёкынгес. Апаен вань шумпотонъёсмес но, кайгу-куректонъёсмес но ӵош люкиськомы. Туж шумпотӥсько, мынам сыӵе апае вань шуыса. Нылпиосмы но куспазы эшъясько. 
Екатерина Борисовна умой эмсузэр сяна, усто кузё кышно но вылэм. Со доры куное лыктӥд ке, олокыӵе сиёнъёсты но веръяны луэ, пе. Керттӥськыны но со яратэ. Шадровъёслэн кык пиоссы вань — Дмитрий (1992) но Евгений (2001). Дмитрий МГУ-эз йылпумъяса, Москваын улэ но ужа, Евгений КФУ-ын кыкетӥ курсысь студент. Соос — анай-атайзылэн тужгес бадӟым шумпотонзы но данъяськонзы. 
Адӟем карымон эмсузэрез но солэсь вань кадь ӵош ужась эшъёссэ ӧнер праздникенызы ӟечкыласа, сӥземе потэ ӟеч мылкыд каронъёсме: котьку сӧл-таза луэ, улонды шудо-буро мед луоз, матысь адямиосты котьку шумпоттыса мед улозы. Та ӟечкыланъёсы итӥське тӥляд семьяды но.