Удмурт пужыосын чебермам юрт

Дас арлэсь кема ини элькунамы нимысьтыз программа улсын гуртъёсын лулчеберетъя юртъёс тупатӥсько, лэсьтӥсько. Выльдӥськем юртъёс гуртлэсь улонзэ но шулдырто, егитъёсты но люкало. 

Гуртлэсь улонзэ но нырысь ик инфраструктураезъя эскерыны луэ. Макем чебересь, чылкытэсь гуртысь социальной объектъёс, сокем гуртысь адямиос но мылкыд карыса гурт улонэ пырисько, гуртэ кылись егитъёслэн лыдзы но будэ. Гуртъёсын лэсьтӥськон ужъёс мыно ке, гуртлэн шулдырлыкез но йылэ. 

Ӟаны гурт нырысетӥзэ таӵе программае пыриське. Вылтусызъя учкыса, котькинлы валамон луоз: та удмурт калыклэн лулчеберетъя центрез. Удмурт пужыосын чебермам юрт лыктэм куноослэсь синъёссэс мальдытӥз. Лулчеберетъя юртын озьы ик лыдӟиськонни, почта ёзэт луоз, участковой уполномоченнойлы но инты висъяськоз, озьы ик луозы нимысьтыз декорация висъет, музей, эктонъя зал, кружок ортчытон инты, учкон зал. Малпаськом, татын но ужасьёслэн мылкыдзы бурдъяськыса улоз, удмурт лулчеберетэз ӝутыны кужымзы будоз гинэ.

Лыктэм куноосты удмуртъёслэн вашкала сям-йылолъёссыя нянен-сылалэн пумитазы, «Шулдыр ӝыт» калык фольклор ансамбль удмурт эктонъёсын но кырӟанъёсын шулдыртӥз. Собере вань люкаськем адямиосты лулчебертъя юртэ гажаса ӧтизы. Ӟаны гуртысь ансамбль учкисьёс понна чебер концертной программа ӵектӥз: кырӟанъёс, эктонъёс, асьсэ чебер куараенызы шумпоттӥзы егит кизилиос Антон Камаев, Алёна Анисимова, Роман Павлов но Карек-Серма гуртысь клублэн кивалтӥсез Зоя Никитина. (Нялтас вераса, ваньзы синйылтӥзы, луоз, артистъёслэсь чиль-валь камзолъёссэс. Та ӵапак Зоя Михайловналэн тыршемезлэн бервылэз луэ). Выль сцена вылын кырӟанъёс но, эктонъёс но чебер адӟисько, артистъёслэн ымныръёсазы но пальпотон ӧз кысы. 

— Выль юртэз туж кемалась возьмамы ни. Тӥ понна тыршимы пуштросо концерт пуктыны. Нимысьтыз тау шуэме потэ «Дуслык» возёслэн кивалтӥсезлы Николай Григорьевич Колоколовлы. Выль вурем костюмъёслы коньдон сётӥз, лэсьтӥськон ужъёсы но кужымзэ пыртӥз. Озьы ик Шор Кушкет гурт поселенилэн главаезлы — Юрий Михайлович Перфиловлы тау карисько, котькуд юанъёсын вазиськыса, юрттэт сётӥз. Озьы ик коллективлы шуныт кылъёсме вераме потэ, мылысь-кыдысь пыриськизы, гуртлэн азинсконэз сярысь сюлмасько. Нимысьтыз тау каремме верасько ӵош ужасьёслы, Балтась ёросысь лулчеберетъя центрысь ужасьёслы но ёросысь лулчебертъя ёзэтлэн кивалтӥсезлы Ильназ Ильич Петровлы, палэнэ ӧз кыле, огъя тыршимы. Малпасько, выль юртэз пумаз-йылаз вуттэм бере, мылысь-кыдысь гурт калык но егитъёс понна ужъёс азьланьтӥськозы. Лулчеберетъя юртамы котькуд мылкыд карисьлы сюлмаз кельшись ӧнер шедьтомы, — шумпотонъёссэ вераз выль юртлэн заведующиез Алефтина Иванова.

— Зэмзэ ик, туж кема возьмамы выль лулчеберетъя юртэз. Оскимы, выль юртмы туала, чебер луоз шуыса. Озьы ик луиз. Элькунмылэн нуналэз азьын нимысьтыз тау кылъёсме вераме потэ ТР-лэн Раисэзлы Рустам Миннихановлы таӵе программаосты кылдытэмез понна, со «Комплексное развитие сельских поселений» шуыса нимаське.

Балтась ёрослэн главаезлэн Рамиль Нутфуллинлэн юрттэмезъя, милям клубмы та программае пыртэмын вал. Озьы ик тау шуэме потэ юрттӥсьёсмылы но: «Дуслык» возёслэн кивалтӥсезлы Николай Колоколовлы, "МДСУ"лэн кивалтӥсезлы Рашит Ильясовлы асфальт вӧлдэмзы понна, лэсьтӥськисьёслэн командазылы, Балтась ёросысь лулчеберетъя ёзэтлэн кивалтӥсезлы Ильназ Петровлы, гуртысь коллективлы. Малпасько, та юртмы воршудутись выллем луоз удмурт калык сям-йылолъёсты но лулчеберетэз утёнын, — малпанъёссэ шараяз Шор Кушкет гурт поселенилэн главаез Юрий Перфилов.

Оскиськом, азьланяз но лулчеберетъя юрт калык понна шулдыр люкаськон инты луоз но котькуд лыктэм куноез гажаса пумиталоз шуыса. Нош та чебер юртын ужасьёслы сӥзиськом кысӥсьтэм мылкыд, выль вормонъёс но пайдаё ужан.