Валэктэ история…

Пумиськонэз усьтӥз «Удмурт Кенеш» огазеяськонлэн кивалтӥсез Татьяна Ишматова:

— 2 ар талэсь азьло удмуртъёслэн 1-тӥ ӧтчамзы ортчем дырысен 100 ар тырмонлы сӥзем конференция радъяськиз Елабугаын. Соку ми трос сюлмаськытӥсь юанъёслы валэктонъёс утчам. Но туннэ асьмеос нош ик пумиським удмуртъёслэн 3-тӥ ӧтчамзы сярысь вераськыны, пӧртэм юанъёслы валэктонъёс утчаны: кытчы мыноно, ма кароно?

— Вуоно ар — Удмуртилэн кунлык басьтэмез дырысен 100 ар тырмонлы сӥзем ар. Таин валче туж трос ужрадъёс чакламын, — пусйиз нациосын ужан политикая министр Лариса Буранова. — Удмурт автономия кылдон азьын кӧня ке съездъёс ортчизы. Одӥгез соос пӧлысь — Сарапулын ортчем 3-тӥ съезд. Соин ик автономилэсь юбилейзэ пусъён азьын одно ик тодэ ваёно, мар бордысен ваньмыз кутскиз.

Сарапул город Думалэн тӧроез Сергей Смоляков пусйиз:

— Ми туж данъяськиськом, дорамы со съезд ортчиз шуыса. Нош та конференция — вуоно юбилей арлы аспӧртэм репетиция. Азьланяз но ӵош ужаломы республикамес азинтон бордын.

Конференция зэмзэ но туж пайдаё луиз. 100 ар талэсь азьвыл ортчемзэ тодэ вайытӥз филология наукаосъя кандидат Александр Шкляев:

— Сарапулын удмурт кунлыклэн инъетэз кылдытэмын вал. Удмуртъёслэн 3-тӥ ӧтчамзы гинэ ӧвӧл, 2-тӥ ӧтчамзы но татын ортчыны кулэ вал. Но Колчак армилэн вуэменыз, со съездэз туала Татарстанысь Ныръяын ортчытоно луиз, зэм, делегатъёс отчы тырмыт ӧз люкаське.

Россиысь удмуртъёслэн ӧтчамъёссы сярысь пыр-поч мадиз профессор Людмила Бехтерева:

— 3-тӥ ӧтчам, вамыш бӧрсьы вамыш, вуттӥз автономиез кылдытонозь. Удмуртъёс асьсэ 1-тӥ ӧтчамазы ик бигер-башкир автономие пырыны пумит луизы, нимаз кариськыны малпазы. Нош азьланяз та бордын пыр-поч ужазы ни.

Удмурт автономиез кылдытон капчиен ӧз мыны. Туж трос кужым быриз калыкез югдытонлы, дышетонлы. Конференциын та сярысь яркыт доклад лэсьтӥз педагогика наукаосъя кандидат Валентина Ившина. Азьвыл 40 процентэз удмурт пиналъёс грамотаез, пе, уг тодо вал. Школаын ӟуч дышетӥсьёс вылӥллям, удмурт пинал школае мынэ ке но, дышетӥсьлэсь ӟуч сямен валэктэмзэ уг вала. Озьы одӥг классын ик 2-3 ар ӵоже пуке, собере дышетсконзэ воксё куштэ. Та сярысь сюлэмыз вӧсь луыса вера вылэм Кузебай Герд. Ӵапак соин ик удмурт дышетӥсьёсты дасян ужпум валтӥсь интые потэм.

Валентина Михайловна верамъя, туж секыт вылэм кадръёсты дасяны. Пичи ке но лыдӟиськыны быгатӥсь удмуртъёсты утчаллям, соосты нылпи садэ, школае дышетӥсе дасяллям.

Удмуртъёслэн 3-тӥ ӧтчамзы дырысен даур ортчиз ке но, история ӧз вуны. Шаерысьтымы Национальной библиотекалэн «Воршуд» викисайтаз али со вакытысь туспуктэмъёсын галерея люкало. Та сярысь мадиз библиотекаын ужась Елена Кутасова.

Тунсыко докладъёсынызы тодматӥзы на Сарапулысь музей-заповедникын ужась Марина Шитова, Ижысь
К. Герд нимо гимназиын дышетскись Лана Боброва, «Удмурт Кенеш» огазеяськонлэн Сарапул городысь ёзэныз кивалтӥсь Раиса Трофимова. Раиса Фадеевналы нимысьтыз тау. Угось ӵапак та кышномуртлэн сюлмаськемезъя Сарапулын таӵе йӧно ужрад ортчиз. Конференцие лыктэмъёслы чебер удмурт концерт возьматӥзы городысь удмурт кырӟась-верасьёс, студентъёс но нылпиос. Нош собере радъямын вал вашкала Сарапул городэтӥ экскурсия. Сюлэмез вырӟытӥз Удмурт комиссариатлэн нырысетӥ юртэз доры вуылон. Паймоно кадь, даур ортчыса но, со сылэ на!

100 ар талэсь азьло удмурт съездэ лыктэм делегатъёс Башенинлэн дачаез азьын туспуктэм лэсьтӥзы вал. Али конференцие лыктэмъёс но отын огъя фотое пуксизы. Та но табере история ни…

Елена Миннигараева

Туспуктӥз Максим Егоров

https://udmdunne.ru/2019/10/