Витьтон вить ар ӵошен

Надежда Ивановна войнаез но, сютэм улонэз но, ыштонъёсты но адӟем. Тросэз «аслыз тупасьтэм дыре» вордскем адямиос кадь ик. Ӝоген 24 июле, солы 80 арес но тырмоз. Аресэз, висёнъёсыз, улонын адӟем шуг-секытъёсыз шоры учкытэк, песянайлэн йырсазез сайкыт, серем кылэз (юморез) но вала. Улонэз сярысь мадьыкуз ӵем синкылиосыз потылӥзы ке но, дырын-дырын ачиз серекъяз но. Малы ке шуоно улонысь куд-ог секыт дыръёсты сюлме басьтыны уг яра, соос шоры серем пыр гинэ учконо — озьы улыны капчигес...

Но али секыт дыръёс сярысь малпаськыны уг яра — кузпалъёслэн вуэ изумруд сюанзы.

Надежда Ивановна но Егор Михайлович Щербаковъёс Вукогуртын уло. Журналистъёс соос доры гумырзы ӵоже вуымтэзы, но кузпалъёс вылезлэсь уг кышкало. Юанъёслы ответ сётыны быгатозы-а шуыса гинэ сюлмаськизы. «Тазьы тонэ пумитаны быгатэм бере, дяра ини», — таӵе кылъёсын пумитаз монэ Надежда Ивановна. Нош тани кузпалыз, Егор Михайлович, ини кема аръёс ӵоже кылле, кышноез кадь куноосты пумитаны уг быгаты. 

«Удмурт кышно мон, удмуртэн ик вераськом», — тодматскыны кутскеммылэсь азьло ик ӝотрак но шонер вераз Надежда Ивановна. Ну, ярам — нокин пумит ӧвӧл.

Чебер корказы пырыса, умой интыяськыса, вераськонмес кутским. Егор Михайлович пыр-поч тодматскем минутъёссы сярысь вераны ӧз ке но быгаты, солэн пальпотӥсь но серекъясь ымнырыз ваньмыз сярысь вераз. Егит дырзэ тодаз вайыкуз, секыт война аръёс тодаз ӧз лыктэ, лэся — умойзэ гинэ малпаны тыршиз.

Тодматскиллям вылэм егитъёс, Егор но Надежда, Сырья гуртын кыдёкысь 60-тӥ аръёсын. Егор отчы юлтошъёсыныз «шудыны» ветлэм. Озьы со Надеждаен тодматскем, Сырья нылэн. Кӧня ке дыр ортчыса, соос кузпалъясько, но пусйыны кулэ, официально 1964-тӥ арын гинэ гожтӥсько. Озьыен, огъя валче улэмзы сярысь ке верано, 55 ар гинэ ӧвӧл, 58 ар луэ ни. Кыкназы ик кузпалъёс гурт адямиос. Надежда Ивановна — Сырьяысь, Егор Михайлович — Вукогуртысь. Гумырзы ӵоже гуртын ик улӥллям, ужаллям, нылпиоссэс будэтӥллям. Егор Михайлович ас дыраз туж усто ужась луэм. «Труд» колхозын трос аръёс ӵоже со учётчик, зоотехник, бригадир луыса ужам. Завскладлэсь ужзэ но быдэсъям. Колхоз фермаез сотэк син азе но пуктыны уг луы вылэм. 20 арлэсь тросгес ужаса, со отысь сӧсырмыса потэ. Туннэ нуналэ но сӧсырмемез ассэ шӧдытэ. Егор Михайловичлэн пыдъёсыз но лябесь, синъёсыз но воксё уг адӟо ни. Кышноез но вань улонзэ колхозлы сӥзем. Нырысь тыршем Сырья гуртысь фермаын, собере — Янгурчиысь, Вукогуртысь фермаосын. Улонэз ӵоже скалъёсты кыскем. Вить нылпи будэтыса (Ольга, Пётр, Михаил, Василий, Анатолий — Пётр но Анатолий пиоссы кулэмын), туннэ нуналэ юбиляръёс Михаил пиенызы, Ираида кенэнызы но внукъёсынызы ӵош уло. Адске — татын соослы каньыл, умой но котьку шуныт. Зэмзэ ке верано, Михаил дорын гинэ ӧвӧл, котькудӥз нылпиез дорын улысалзы ке но, сыӵе ик умой луысал соослы. Пичиысен ик нылпиоссы анай-атайзылы юрттыса фермае ужаны ветлӥллям, ужлэсь ноку кышкамтэзы. Интервью басьтыны лыктэм нуналэ Егор Михайловичен Надежда Ивановнаос доре нылзы но, пизы но вуизы — анай-атайзэс поддержать карыны кулэ ук. 

— Нылпиосмы куинез но матын уло (Ольга но Василий нылпиоссы Ципьяын асьсэлэн семьяосынызы уло — Н. Ж.). Соин но ӵем-ӵем ми доры куное вуыло, милемыз утё. Тани али но татын. Ми туж шумпотӥськом. Вань кадь праздникъёсы но валче люкаськиськом, огшоры нуналъёсы но ми доры вуыло, — пальпото кузпалъёс.

— Анаен атай милемыз пичиысен ик тыршыса будэтӥзы. Азьло, егит дыръя, анай-атайлэсь дунлыксэ туж ум валаське вал. Со аръёс ортчыса, ачид анай, атай луэм бере гинэ валамон луэ вылэм. Сюлмысен ӟечкыласьком сыӵе бадӟым юбилеенызы анаймес но атаймес. Милемыз будэтэмзы, вордэмзы но утемзы понна пумтэм тау кариськом. Соос ми понна ваньзэ лэсьтӥзы. Табере — милям черодмы. Таза гинэ мед луозы, — шуо Щербаковъёслэн нылпиоссы. 

Калыкын верало ук: семьяез кылдытыны секыт ӧвӧл, секыт сое утьыны, возьыны шуыса. Туж зэм кылъёс. Но та, жаляса верано, ваньзылэн уг пӧрмы. Щербаковъёслэн семьязылы та ласянь удалтэм. Соос валче ини ӝыны даурлэсь тросгес уло. Кинлы таӵе шуд усем али!  Кызьы вера Егор Михайлович, сомында ар тупаса улонлэн аслаз секретъёсыз вань. Улонын ваньмыз луэ — шумпотонъёс но, даллашонъёс но. Но сётскыны уг яра, семья борды котьку кутӥськоно. Семья котькуд адямилы яратон, кужым, оскон сётэ. Яратон но семья сяна, шудо улонын нош одӥг валтӥсь маке луыны кулэ на вылэм — ужаны быгатон. Тазэ ини кузпалэзлы юрттыса Надежда Ивановна вераз. «Ужаны быгатӥд ке, тон ини шудо адями луиськод. Гурт улон ужтэк уг ортчы, соин но шудо луон понна ужаны быгатыны кулэ». Споръяськыны уг луы. Кузпалъёслэн та кылъёссы сьӧрын кӧня пуштросэз кылӥське, кӧня опытсы шӧдӥське! Ас дыразы ужазы трос данъян грамотаос, ушъян кагазъёс басьтэмзы но тае юнмато. Но соослы кагазъёс кулэ ӧвӧл — нылпиоссы котьку доразы луэмзы гинэ но тырме. Соослэн нош 10 внуксы но 3 правнучказы но вань. Та соос понна — улонын самой бадӟым шумпотон. Нылпиоссылэсь, внукъёссылэсь но правнукъёссылэсь ӟечсэ адӟыса гинэ, али кема-кема аръёс ӵоже валче улыны мед кылдоз соослы.