Выль ар шутэтсконъёс

Асьмеос дышемын Выль арез бал-маскарадэн, пӧртмаськыса пумитаны. Сыӵе шулдыръяськонъёс котькуд гуртын ортчо. Сотэк Выль арез пумитам кадь но уз поты, дыр. Со сяна, куд-ог раньӟымтэос пичи гуртъёсын но, кудаз школаос но, нылпи садъёс но ӧвӧл, покчи пиналъёс понна ёлка радъяло. Куд-ог гуртъёсын Ымусьтонлы сӥзьыса но шулдыр ужрад ортчытонэз чебер сямлы пӧрмытӥзы ни. Кылсярысь, одӥгез сыӵе ужрад Карек-Серма гуртын клублэн заведующиезлэн тыршеменыз радъямын вал шуыса ивортӥзы гуртоосыз.

Сала Кушкет гурт калык нош тол праздникез йӧ вылын пумитаны дышиз ни кадь. «Туэ но Выль ар праздникмес йӧ вылын туж шулдыр ортчытӥмы. Спонсоръёсмы но ӧз воштӥське. Котьку сямен, праздникез радъяны луонлыкъёс кылдытӥзы МДСУ-лэн директорез Ильясов Рашид, ужбергатӥсь Нина Филиппова но «Дуслык» общество. Мылысь-кыдысь шутэтскимы, салют лэзимы», — ивортӥз милемлы Сала Кушкет гуртысь Людмила Тихонова.

Нылпиослэн но тол каникулзы пайдаё но тунсыко ортчиз. Котькудаз сямен дышетскон юртъёсын пиналъёс классэн-классэн кытчы ке шутэтскыны ветлӥзы: кин йӧ вылын, кин гурезь бамысен нискылаз, мукетъёсыз кытчы ке палэнэ экскурсие ветлӥзы...

Огъя вераса, котькин но та кузь выль ар шутэтскон нуналъёсты пайдаё но тунсыко ортчытӥз шуыса оскем потэ.