Юлия Алексеевна Матвеева — Сизнер клублэн заведующиез

— Али но тодам, концерт номеръёс вискын дӥсяськыса мед вутскомы шуыса, я йыраз фуражка изьыя вал, я вылаз эрезь кыске вал но «Молот» журналын потэм юморескаосты (азьло соос трос потыло вал) вера вал Юляпай. Эшшо кызьы, шуэ тӥ — клуб тыр бадӟым куараен, ваньзэ киосыныз возьматыса! Нош ми со куспын дӥсяськиськом. Тӥни озьы «Ой, ми дӥсяськыса ум вуиське ук» шуыкумы со котьку но «Ярам, мон потыса верало» шуэ вал. Серемес учырзэ вераса быдтэ вал но йырысьтыз фуражказэ одно ик выж вылэ куштэ вал. Клуб тыр серекъяло вал солэсь таӵе выремзэ. Быгатэ вал ини Юляпай ужаны, мазэ веранэз, — тодаз вайиз Наталия Плотникова.

Солэн верамезъя, Юлия Алексеевна сюлмысь тыршыса ужам. Сямызъя чурыт луэм ке но, солэн ваньмыз радызъя луэм. Ачиз со библиотекарь но луэм. «Клубын кузь ӝӧк вылын кыӵе но журналъёс, кыӵе но газетъёс ӧй вал, ваньмыз соос дынгыр-дынгыр вуремын. Клублэн одӥг сэрегаз сылӥсь этажеркаын книга вань вал. Отчы гожъяса лыдӟыны книга басьтылӥмы. Паймоно кадь, Юляпайлэн одӥг газет-журналэз но кесяськымтэ гинэ ӧвӧл, куасалляськымтэ но вал. Азьло ведь кудӥз огез адями клубе газет лыдӟыны потэ вал ук. «Чырдэ — интыяз понэ», — шуэ вал Юляпай. И ведь кылзӥсько вал солэсь. верамзэ санэ басьто вал. Сое котькин яратӥз, чурыт куронъёс пуктылӥз ке но. Солэн ужам ужез адямилэн син азяз вал ук. Котькуд праздниклы концерт дася вал. Туж умой ужаз, умой. Гуртысен гуртэ но концерт возьматыса ветлӥськом вал ми. Бигер гуртъёсы но ветлӥмы, Порезэ, Лельвиже вуытозь но мынӥмы. Бигер гуртэ мынӥськомы ке, одно ик куиньнамы, Юляпай, мон но Тоня эше, потыса «Ин матур жырларны сайлап гына» шуэм кырӟанэз кырӟаськом вал (серекъя). Солэн ваньмыз радызъя вал, веранэз ик ӧвӧл. Районын сыӵе клуб но луымтэ, дыр, солэн кадь. Тӥни сыӵе вал со Юляпай — курон пуктыны быгатӥсь, чылкытлыкез яратӥсь, ужезлы сюлэмзэ сётыса ужась. Солэн ветлэмез ик «Мед луоз!» шуыса йыгмыт вамышъясь адямилэн вал», — вераз Наталия Гурьяновна.

Сыӵеен сое тодазы ваё гуртоосыз. Задор мылкыдо, ужась, тыршись. Юлия Алексеевналэн нылыз но, Наталья Павловна, анайзэ сыӵеен тодаз вайиз: «Котькуд тодмостэм планзэ дыраз быдэстэ вал со, одӥг ужзэ но бере ӧз кельты. Сыӵе адями вал со — мар ке борды кутскиз ке, одно ик пумозяз вуттоз».