Ӵыжы-выжыосы фашизмез вормонэ пыриськизы

Улонын номыр пытьытэк уг ортчы. Котькуд адями тырше маке ӟечсэ лэсьтыны, кема аръёслы ачиз сярысь ӟеч тодэ ваён кельтыны. Мынам та уже сӥземын ӵыжы-выжыосылы — Быдӟым Атыкай оже пыриськемъёслы. Мынам вераме потэ аслам семьяе сярысь, солэн фашистской Германиез вормонэ пыриськемез сярысь. 

Семьяысьтым фронтын куинь мурт ожмаськиз. 

Мынам пересь песятае Лобанов Павел Гаврилович вордске 1926-тӥ арын 4-тӥ оштолэзе Вукогуртын, семьяяз кыкетӥ пинал луэ. Ципьяысь шоръёзо школаысь 7 классэз йылпумъя. Быдӟым Атыкай ож кутскыку песятаелы 15 арес луэ. Пусйыны кулэ, Павеллэн атаез Гавриил но 1941-тӥ арысен немец захватчикъёслы пумит войнае пыриське. Со Казаньысь военной аэродромын служить каре.

1943-тӥ арын коньывуон толэзе Павел Лобанов валче дышетскем эшъёсыныз Залкеев Александрен но Пашкеев Дмитриен ӵош ёросысь военной комиссариатэ вазиське, соосты фронтэ мед басьтозы шуыса. Соослы отказ каро: туж егитэсь на, пе. Соос кӧня ке пол отчы вуыло. Бератаз, куинь пиос пӧлысь кыкез ярамонэсь луо. Мынам пересь песятае пичи мугорыныз но секталаеныз сэрен ярантэмен лыдъяське. Но Павел Гавриловичлэн эшъёсыныз люкиськемез потымтэ. «Фронтын мон секталаме но люкало, мугорме но будэто. Но, пожалуйста, эн кельтэ монэ. Мынам туж потэ фронтэ», — курем со. Комиссилэн ёзчиосыз туж паймиллям юн сылӥсь егит пилы но песятайме войнае келяны соглаш луэмзэс вераллям. Озьы ӵош дышетскем куинь эшъёс фронтэ кошко. Дасяськыны соослы кӧня ке нунал сёто. Фронтын эшъёсты Горьковской областе келяло, отын военной ужлы дышето — машинаосты нуллыны. Татын Павел Гаврилович нырысьсэ машина руль сьӧры пуксе. (Нялтас вераса, пересь песятае пенсие потытозяз шофёр луыса ужаз). Дышетсконзэс йылпумъямзы бере пиос фронтэ нуналмысь кулэ луись сиён-юонъёсты, пыӵал тӥрлыкъёсты но вузъёсты нулло.

1943-тӥ арлэн пумаз Павел Гаврилович артиллеристъёслэн частязы луыса, Украинае пыре, пыриське Киевез, Житомирез мозмытонэ. 1944-тӥ арлэн кутсконаз Житомир город вылэ наступление лэсьтон дыръя контузия басьтэ. Та городын ик со кык толэзь эмъяське. Павел Гаврилович котьку гажаса тодаз вайылӥз пурысьтам йырсиё туж визьмо профессорез но медсестраез, адямиосты, кудъёсыз, асьсэос но солэн бурмемезлы оскытэк, сое пыд йылазы султытӥзы. 

Йӧнаны кутскемез бере песятаез дораз келяло. Шемордан станциын со сое келясь медсестраез берен кошкыны куре, нош ачиз сӧсырмемез сярысь вань документъёссэ кеся. Вордскем гуртаз бертыса, егит пи Ципья ёросысь Дмитровской МТС-ын шофёр луыса ужаны интыяське. 

Ӝоген Павел Гавриловичез нош ик военной комиссариатэ ӧтё но Дальний Востоке келямзы сярысь иворто. Озьы со нош ик войнае шеде. Кӧня ке нунал но уй военной эшелон соослэсь полксэс шундыӝужан пала нуэ. Кин малпасал, гуртысь огшоры пияш Монголие, Китае вуоз шуыса. Со ӵемысь тодаз вайылӥз, макем секыт вал ӵушкась шунды улын гурезьёстӥ ветлыны.

1945-тӥ арын Японилы пумит ожгар действиос кутско. Со артиллерийской полкын шофёр луыса ожмаське. Соослэн частьсы Китайын япон самурайёслы пумит ожмаське. Вормон нуналэз но асьме солдатъёс отын, Япониын, пумитало. 

Тросэз советской солдатъёс понна война йылпумъяськиз 1945-тӥ арын. Мынам пересь песятае Япон ож йылпумъяськем бере, 1945-тӥ арын 2-тӥ куарусёнэ, Китайысь Порт-Артур городэ служить карыны кыле. Дораз со 1950-тӥ арын гинэ бертэ. 

Павел Гаврилович данъямын Отечественной война орденэн, «За победу над Германией в Великой Отечественной войне 1941-1945 гг.», «За победу над Японией» медальёсын но Жуковлэн медаленыз. 

Мынам пересь песятаелы шуд усиз вордскем палъёсаз бертыны но кема улон ортчытыны. Солэн военной улонэз сярысь ми тодӥмы нылъёсызлэсь, газет статьяосъя.

Мукет ӵыжы-выжые — Кузнецов Антон Степанович — сярысь ивортодэт ӧвӧл шуымон. 

Антон Степанович вордске 1921-тӥ арын Балтась ёросысь Вукогуртын. 1942-тӥ арын 25-тӥ тулыспалэ гуртоосыныз Алексеев Григорий Алексеевичен но Лобанов Гурьян Ильичен ӵош Ципьяысь РВК пыр фронтэ басьто. Пересь песянае, Зинаида Павловна, тодаз вайылэм: войнае кошкон азяз валэныз люкиськиз, со, ум ни, пе, адӟиське, шуэм. Озьы ик луэ... Со сӧсырмыса кулэ 1945-тӥ арын 28-тӥ южтолэзе, вормон дорозь 48 нунал гинэ кылемын луэ. Ватэмын Польшаын, Гваньской воеводствоын, Руссошин посёлокын. Озьы ик кылле со мурт кунын, ялан егит красноармеец Кузнецов Антон Степанович. Сыӵе солдатъёс сю сюрсъёсын вал, соос семья кылдытыса, нылпи будэтыса ӧз вуттэ. 1944-тӥ арын 30-тӥ коньывуонэ Антон Степанович пусъемын «За отвагу» медален. 

Семьяямы утиське солэн 1945-тӥ арын 5-тӥ южтолэзе гожтэм берпуметӥ гожтэтэз. Та гожтэт кылиз солэн вордскем юртаз. Пересь песянае сое туж утьыса возиз, кулэмез бере гожтэт семьямылэн дуно арбериез луиз.

Тунсыко анае паласен ӵыжы-выжыелэн, пересь песятаелэн сузэрезлэн — Тимофеева Марья Кузьминичналэн — адӟонэз но. Жаляса верано, солэн военной биографиез сярысь вераны быгатӥсь мурт ӧз кыльы ни. Солэн улонэз сярысь мон Николай Михайлович Никифоровлэн «Шудо но, шудтэм но» очеркысьтыз (газетамы но со очерк потылӥз — ред.) лыдӟи. Писатель но мынам апае эшъёс вылӥллям вылэм (кыкназы ик Вуж Турья гуртысь), Николай Михайлович, Ижкаре вуылыкуз, ӵемысь со доры дугдылэм. Одӥг пол сыӵе вуылыкуз, со ветеранлэсь интервью басьтэм. Произведение художественной, соин ик синвуаськытэк лыдӟыны сое уг луы. Очеркысь апаелэн военной улонысьтыз фактъёсты поттыны тырши.

Вордӥськем Мария Кузьминична Вуж Турья гуртын 1923-тӥ арын 23-тӥ куарусёнэ, нырысетӥ пинал луэм. Атаезлы, Кузьма Семёновичлы, война кутскем бере бронь сётӥллям но Казань городысь военной заводэ келяллям. 1943-тӥ арын со тифен висьыса кулэм. 1944-тӥ арын егит нылэз Ципьяысь военкоматэ ӧтиллям. Медосмотр бере кызь аресъем Мария Кузьминичнаез фронтэ келяны кенешиллям.

Мариялэн ожгар биографиез кутскем Суслонгер учебной лагерь бордысен. Быдэс дуннелы туж ӝож учыръёсын тодмо луэм та инты кылдытэмын вал 1941-тӥ арын пӧсьтолэзе. Татын Горд Армилы пулемётчикъёсты, артиллеристъёсты но противотанковой стрелокъёсты дасяллям. Озьы ке но, ӵем дыръя элементарной обмундированитэк кылем курсантъёс бырылӥллям, висёнъёсын, сютэм улонэн но кезьытэн сэрен. Кема аръёс ӵоже Суслонгер сярысь информация пыр-поч ватэмын вал, туннэ но тросэз детальёс лушкем кылё на. Толон гинэ колхозын ужзэс йылпумъям таза но юн гурт нылъёсты но пиосты Суслонгере вайылӥллям. Соослы дышетсконо луэм ӟуч кылын вераськыны но военной ужез дышетыны. Но уж вылын озьы вылымтэ. 

— Суслонгер туж сютэм улон инты вал. Нылкышноослы выл дӥсь но, пыдкутчанъёс но дасяллямтэ. Соин ик асьме дӥськутэн, кутъёсын ветлӥмы. Ӵукна-ысен ожмаськыны дышето, собере олокыӵе но ужъёсты быдэсъяськом, отӥяз нош ик дышетскиськом. Азбармы изо-кӧльыё. Отӥ ветлыса, кутъёсмы ӝог бунӟизы-пӧсьтӥзы. Гольык пыд кылим. Со дырез тодам вайисько ке, али но быдэс мугоры юзыр-кезьыр луэ, — Мария Кузьминичналэн кылъёсызъя аслаз очерказ гожтэ Николай Михайлович.

Собере егит адямиосын эшелон мынэм фронтлы матэ, Ладожской ты доры. Татын гуртысь нылмуртлы Капрал валэз оскиллям (нылмуртлэн вал гидын ужам опытэз луэм). Вал кыткыса, нылъёс ӵушкась шунды улын бырем солдатъёсмылэсь шӧйёссэс октӥллям. Быремъёсты ватӥллям, сӧсырмемъёсты госпитале нуллӥллям. Озьы толэзь пала кыстӥськем, собере Марияез сӧсырмем солдатъёсты утялтыны госпитале кельтӥллям. 

Ӝоген нылъёсты Мурманск городэ нуиллям. Татын соосты военной ужлы дышетӥллям. Мария зенитчица луэм. Красноармеец Тимофеева Мария Кузьминична Мурманскез утемез понна «За оборону Советского Заполярья» медаль басьтэм. 

Немецъёс чигнаса, Горд Армия азьлань мынэм. Мария Кузьминична мукет солдатъёсын ӵош мозмытэм Польша но Чехословакия пыр вуэм Германиысь Байцен городозь. Татын ик соос Вормонэз пумиталлям. 

Но война нылъёс понна соку ик йылпумъяськымтэ. Нырысь соосты келяллям Неси городэ, собере Воленбурге. Та городъёс бадӟым ожъёстэк сётскиллям, соин заводъёс быдэсак пазьгемын луиллямтэ. Нылъёслы задание сётӥллям: шаерамы келян понна станокъёсты сэрттоно. 

Вордскем Вуж Турья гуртаз нылаш вуэм 1945-тӥ арын 23-тӥ куарусёнэ. 1965-тӥ арын Мария Кузьминична Герман пиеныз ӵош Ижкаре улыны выжем.

Мария Кузьминична «За победу над Германией» медален но 1990-тӥ арын, Быдӟым Атыкай ож йылпумъяськем бере 45 ар ортчыса, «За отвагу» медален пусъемын вал. Кулӥз 2010-тӥ арын 8-тӥ пӧсьтолэзе, ватэмын Ижкарын. 

***

Быдӟым Атыкай ож. Та кылъёс котькуд россиянинлэн сюлэмаз вӧсь луонэн, куректонэн но ас улонэнызы Родинамылэсь эриксэ утемъёслэсь подвигзэс гажанэн шуккиське. Соослэн героизмзы — со историлэн бамъёсыз гинэ ӧвӧл, со нравственной ориентир, компас, кудӥз тужгес секыт вакытъёсы сюресэз возьматэ. 

Али, йылпумъянъёс лэсьтыкум, монэ ваче пумит луись, валантэм мылкыдъёс басьто. Шаермы, Атыкай музъеммы, трос миллион быремъёс понна вӧсь луон — огласянь, данъяськон — мукет ласянь. Мон, зэмзэ но, данъяськисько, мынам семьяе, мынам вашкала ӵыжы-выжыосы та событиосы меӵак пыриськизы но асьме калыкмылэн Вормонэзлы умой юрттэт сётӥзы шуыса. Кунмылэн историез — со котькудмылэн историмы. Та историез лэсьто огшоры адямиос. 

Мон валай, Вормон понна калыкмы укыр бадӟым дун тыриз шуыса. Шаермы понна сётэм миллиард улонлэсь Быдӟым Вормон кылдӥз. Тросэз нылпиос, племянникъёс, внукъёс ӧз тодэ, ноку но уз тодэ дуно ӵыжы-выжыоссэс. Одӥгзэ гинэ, мае асьмеос табере соос понна лэсьтыны быгатӥськом — соослэсь подвигзэс пумтэм вапумъёс ӵоже тодамы возьыны, тупаса улыны, Атыкай музъеммылэн эрикез но шудэз понна соослы тау карыны!

Ципья шоръёзо школаысь 8-тӥ классын дышетскисьлэн Кузнецова Полиналэн проект ужез 
Дышетӥсьёсыз: Давлекова Нина Николаевна но Чириков Александр Геннадьевич

(Вакчиятыса сётэмын)