Бөрбаш авылындагы «Ура, авылга» дип атлаган түләүсез лагерьга 60 бала йөри

Бүген районыбызда Бөрбаш, Смәел, Урта Көшкәт авылларында «Ура, авылга» лагере старт алды.

Лагерьның максаты — балаларның татар теле дәрәҗәсен үстерү, җәйге яллар вакытында яшьләрне туган телебезгә җәлеп итү, гореф-гадәтләребез, милли йолаларыбыз, якыннанрак авыл тормышы белән таныштыру.

Мәсәлән, Бөрбаш авылында эшләп килүче лагерьга 60 бала йөри икән, күпчелеге шәһәрдән авылга туганнарына, әби-бабасына кунакка кайткан балалар.

«Программа бик кызыклы, ул үз эченә төрле чаралар, экскурсияләр, очрашулар, мастер-классларны ала, — ди «Алдынгылар» хәрәкәте волонтерлары.

Лагерь эшчәнлеге «Алдынгылар» хәрәкәте волонтеры, авыл җирлеге, мәктәп белән берлектә оештырыла.

Район тормышына кагылышлы иң мөһим яңалыкларны безнең Макс каналыннан да белә аласыз!