Таҗлы вирус янә чолгап алды

Таҗлы вирус белән авыруның бу дулкыны озакка китте. Әлеге зәхмәт аркасында асыл затларыбызны да югалттык. Инде табиблар кайчаннан бирле аңлашылып бетми торган чиргә каршы көрәшә. Район госпитале янәдән тыгыз режимда эшли. Инде хәзер биредә эшләүчеләрне телгә дә алмыйбыз. Күнектекме шунда, әмма алар һаман да көн геройлары булып кала бирә. Күпме кешене үлемнән алып калды алар. Иң мөһиме, чирне зурга җибәрмәскә, вакытында табибка күренергә кирәк, диләр табиблар. Ә безнең районда чирен яшереп качып ятучылар да аз түгел. Аллаһы Тәгалә һәрбарчабызга да сәламәтлек бирсен, югалтулар язмасын.