Туж шулдыр ужрад ортчытӥллям Пор-Кутеш гуртын но.
Туж шулдыр ужрад ортчытӥллям Пор-Кутеш гуртын но. Тани мар та сярысь вераз Нина Трофимова, Пор-Кутеш гуртысь активист, ужрадэз радъясь адямиослэн одӥгез:
— Праздникез малпамтэ шорысь радъямы. Гуртоосынымы вераськимы но, гуртамы гурезь лэсьтыса, нискыланы потомы шуимы. 18-тӥ толшоре, тракторен донгем лымыез радъяса, гуртысь нылъёсын-пиосын гурезез лэсьтӥмы. Ма, гурезь вань бере, ойдо табань но пыжомы шуимы. Собере шудонъёсты но ортчытыны кулэ шуыса малпан лыктӥз… Огъя вераса, тӥни озьы гинэ куспамы вераськыса, сыӵе шулдыръяськон ужрад радъяны малпамы. Гурт калыкмы, шумпотымон, активной — 30 корка ке но, шулдыр улыны тыршиськомы. Котьку но озьы мед луысал.
Огъя кужыменызы пор-кутешъёс ушъямон но туж шулдыр ужрад ортчытыны быгатӥллям ик. Нылпиос понна нимысьтыз шудонъёс но, пичияк призъёс но дасяллям (мылкыдтэм луисьтэмъёслэн юрттэменызы).
— Пичиезлы но, бадӟымезлы но шулдыр луиз. Музыкамы но вань вал. Ят гуртысь адямиос но ужрадамы пыриськизы, шумпотымон. Таӵе чебер ужрад радъяммы понна таукарон кылъёссэс вуттӥсьёс но шедизы. Адямиос но буш киын ӧз лыктэ — ваньзы сьӧразы саламъёсты вайизы. Ческыт табань пыжимы, пӧсь чай юимы. Малпасько, та шулдыръяськон ӝытмы ваньзылы кельшем, дыр, шуыса. Ваньзы гуртоосы ужрадэз радъянэ мыло-кыдо пыриськизы. Тужгес но Ольга Макарова, Елена Лаврентьева. Мынам кенъёсы но, пие но пыриськиз. Огъя вераса, валче тыршыса, ог-огмылы юрттыса, ӵошен луыса, таӵе шулдыр ӝыт ортчытыны быгатӥмы, — шуэ Нина апай. — Нылпиос сям-йылолъёсмес медаз вунэтэ, мед азинтозы кадь потэ милемлы. Тани малпамтэ шорысь но кыӵе шулдыр ужрад пӧрмытыны луэ вылэм, мылкыд гинэ мед луоз. Отын ик эктӥмы, отын ик шулдыръяськимы, отын ик шудонъёсты ортчытъямы. Нылпиосмы ми шоры учкыса, вуоноын сям-йылолъёсмес вунэтытэк, мед ортчытозы сыӵе ик праздникъёсты, шулдыръяськонъёсты.
Пусйыны кулэ, Пор-Кутешын кӧня ке ар радысь ини Йӧвылэсултонлы люкмес но радъяло. Отын 18-тӥ толшоре уйин пыласькисьёс но луиллям, 19-тӥ толшоре праздник ужрад бере но мынӥсьёс луиллям.
Нет комментариев