Кытын кызьы шулдыръяськизы Йӧвылэпотон нуналэ?

Котькуд гуртын пӧртэм шулдыръяськон ужрадъёсты ортчытон кемаласен чебер традицилы пӧрмиз ини. Кылем арын но, коронавирусэн сэрен кылдэм шуг-секытъёс шоры учкытэк, ёросысь тросаз гуртъёсын сыӵе ужрадъёс радъямын вал. Туэ но куд-ог клубъёслэн кивалтӥсьёссы, гуртысь активистъёслэн юрттэменызы, Йӧвылэсултон (Йӧвылэпотон) нуналэ шулдыръяськон ужрадъёс радъяллям.

Вукогуртын но туж мыло-кыдо, активной калык улэ. Одӥг адями кыӵе ке ужрад ортчытыны кичӧлтӥз ке, кыкетӥез поддержать каре, куинетӥез радъя… Туэ вукогуртъёс Йӧлвылэпотонлы гуртысьтызы ӵыпетазы пыласькон инты лэсьтӥллям. Тросэз вуэ пырисьёс 18-тӥ толшоре ӝыт но уйин пыласькиллям ке, мукет нуналаз вукогуртъёс шулдыръяськон ӝыт ортчытӥллям. Тани мар вераз та сярысь Вукогуртысь клублэн заведующиез Антонида Перемечева: 

— Шулдыръяськонмес клуб азьын ортчытӥмы. Кӧня ке пӧртэм шудонъёс радъямы: гозыен кыстаськон, футболэн шудон. Сиимы ческыт табань, юимы пӧсь чай. Ортчытӥмы дискотека но. Адями туж ик трос ӧй вал ке но, ужрадмы  шулдыр пӧрмиз шуыса малпасько, кӧня ке нылпиос но лыктӥзы. Аслад шулдыръяськемед потӥз ке, мылкыдэдлы номыр но люкетыны уз быгаты.