Дипломен бертӥзы

Тямыс районысен лыктэм коллегаоссы пӧлын улосчиосмы луэмысь-а, асьмелэнъёслэн выступленизы нимаз ик чебер малпанъёс кельтӥз. Асьсэос но тыршиллям. Валтӥсь ужзы сяна дыр шедьтыса, та фестивальлы одӥг толэзь ӵоже дасяськиллям. Юрттэт-кенеш сётон понна сценалэсь ветеранзэ, Балтась культурая центрын ужась Назип Аминовез но ӧтиллям. Асьмелэнъёс кадь куинь куараен кырӟась хор одӥг коллективын но ӧй вал. Суд заседанилэн секретарезлэн Рамиля Тазетдиновалэн кырӟамез, вокал-солоя выступлениос пӧлын самой умоез луиз кадь. Рамилялэн дӥсез, ассэ сценаын воземез, кырӟанэз-крезьгурез - ваньмыз но синмаськымон вал. Озьы ке но, жюри солы та номинацияя кыкетӥ интыез гинэ сётӥз. Нырысетӥын - мукет районысь судьялэн выступлениез. Судья луысал ке, нырысетӥ инты одно ик Рамилялы сётӥськысал шуыса, сипыртӥз зал. Бен, татын интыез адями ачиз яке учкись гинэ сётыны уг быгаты. Ваньмыз но жюрилэн кияз - судын выллем. Отын но судья янгыш луэм муртлы утьыса огшоры но, огшоры луымтэ но решение поттыны быгатэ. Та конкурсэз судьяос тӥни сое асьсэ вылын мед адӟозы али шуыса но радъямтэзы меда, уд тоды... Татын лэсьтэм ужъёссы (быдэстэм выступлениоссы) понна асьсэос решение витьыса уло. Нош жюри судья выллем. Азьпалзы солэн кияз.

Та конкурсэ мыныса районысь суд системаын кырӟан-крезьгурез, искусствоез яратӥсь адямиосты адӟыса, сцена вылэ потон азязы соослэсь ог-огенызы пичиос выллем вераськемзылы, сюлэмшугъяськемзылы, ог-огзылы кызьы ке но юрттыны тыршемзылы синмаськыса бертӥ. Тӥни район судьялэн юрттӥсез Алсу Камалиева, татысь самой мӧйы ужасьёслэн одӥгез Сания Бариева, специалист Галия Шагиева, мировой судья Афзал Хайруллин, суд участоклэн консультантэз Светлана Сафиуллина, суд заседанилэн секретарез Оксана Мухина, огъя вераса, ваньзы но одӥг быдэс луыса огазеяськиллям но котькуд удысын азьмынӥсьёслэн радазы луэм Балтасьлэн данэзлы ярамон выступлениос возьматӥзы. Адямиослы решение поттӥсьёсты ялан серьёзной но чурыт карыса адӟыны дышемысь-а, татын соосты туж каньыл вераськисен, лякыт сюлэмоен но огшорыен адӟон ӧжытак паймымон но потӥз.