Валъёс Сабантуез витё

Ильнур, 5 июнь 2014 - 08:57

1318

2005-тӥ арын, азьвыл кивалтӥсьсылэн Рамиль Нутфуллинлэн кичӧлтэмезъя кутскем уж - таза выжыысь валъёсты будэтон, вӧлмытон - туннэ нуналэ та хозяйствоез мукетъёслэсь одӥг йырлы вылӥе карыса возьматӥсь нимаз удыслы пӧрмиз.

Зэм, та прибыль вайись удыс ӧвӧл. Тае хозяйстволэн али дырысь кивалтӥсез но уг ваты, прибыль вайись карон понна, сюосын вал вордыса, тросэн вузаны кулэ, шуэ.

- Валъёсты вордыны кутскыку ик, ми, доход басьтон малпанэз ӧвӧл, нош лулпушмес узыртон, нылпиосты визьнодан ужпумез валтӥсь каримы, - шуэ хозяйстволэн кивалтӥсезлэн воштӥсез Рафис Галимуллин. - Тани кӧня аръёс ини татысь нылпиос уг быдмо. Асьмелэнъёс гинэ ӧвӧл, Чапшарысь, Соснаысь ветлӥзы. Зоотехник Ильдар агайзы дышетонъёс ортчытъя, вал вылын ворттӥсь воргоронъёс кенешъёссэс сёто.

Хозяйстволэн нош одӥг преимуществоез - татын ӟеч выжыысь валъёслэсь «кылзэс» валась, ӵукна сизьымысен ӝыт куатёзь соос пӧлын «пӧзись» фанатъёс но вань. Районъя тодмо луэм жокейёс - Марсель Шафигуллин, Рамис Галимзянов, Рушан Латыпов, Рафис Сибгатуллин, зоотехник Ильдар Фатыхов ӟеч выжыысь валъёс сярысь часъёс ӵоже вераны быгатымон трос тодо, али ялан но дышетско, утчасько.

- Мукет районъёсысь, улосъёсысь ӟеч выжыысь валъёсты будэтӥсьёсын ялан кусып возьыса улӥськом, - шуэ Ильдар. - Но котькинлэн аслаз секретэз, аслаз технологиез. Ворттӥсь валъёс сярысь нокин но ваньзэ пумозяз вераса уг быдты...

- Ворттӥсь валъёс Сабантуез шӧдо шуо, зэм-а со? - тунсыкъяськисько Ильдарлэсь.

- Шӧдо но азьвыл дасяськыны кутско, - шуэ со.

Туннэ нуналэ хозяйствоын 4 пӧртэм выжыысь 20 вал вань. Туэ

Сабантуйёсы соос пӧлысь дасэз пыриськоз шуыса чаклало. Соослэсь котькудзэ нимаз дистанцилы, нимаз программаен, пӧртэм ӝоглыкен дасяло вылэм. Ворттӥсь вал нунал потэм 8-10 иськем ортчыны кулэ, толалтэ кезьыт нуналъёсы но сое ӝегатыны уг яра, соослэн асьсэлэн трассазы вань, шуо. Та валъёсты нимысьтыз диетая сюдыны, миськыны-утялтыны, туж тыршыса утьыны кулэ. Вакчияк вераку, бырйиськись, трос саклык висъямез кулэ карись валъёслэсь синмаськымон ворттӥсь вал карон понна трос адямилэн буйгатсконэз тодытэк ужамез кулэ.

Хозяйстволэн кивалтӥсез Айнур Нутфуллин но татын ӵем луылэ. «Таиз чуньы нимаз ик эрки, нокинлэсь уг кышка» шуыса, чебер чуньы доры дугдӥз со. Со али пичи гинэ ке но, солэн но ворттӥсь валлэн «вирез» шудэ ни ук - эркын кардае потэмез бере, эрки чуньымы чылкак воштӥськиз!

Мукет аръёсы «Пегас», «Кавалер», «Парк», «Ландыш», «Лачын» нимо ворттӥсь валъёсын тодмо луэм салаусьёслы туэяз Сабантуйёсын но азинсконъёс мылкыд кароме.