Улисьялда очраштылар

Хәтерләсәгез, элекегерәк елларда колхозлар колхозлар белән, авыллар авыллар белән очрашып, бер-берсенә тамаша-концерт куялар иде. Бу чын мәгънәсендә эчкерсез аралашу, бер-береңне рухи яктан якынрак белү өчен менә дигән мөмкинлек булды. Кызганыч, бу традицияләр нигәдер онытыла башлады.

Ә менә районыбызда бердәнбер булган, мари халкы яшәгән Улисьял авылына Сырья авылы үзешчәннәре килеп үзенчәлекле очрашу үткәргәннәр.

Удмурт халкының сәхнә осталыкларын күрсәткәннән соң, мари үзешчәннәре дә, гореф-гадәтләрен югалтмауларын күрсәтеп, үзләренең биюләрен тәкъдим иткәннәр. Мәдәният йортындагы очрашуга килүчеләр бергә чәй өстәле артында гәпләшкәннәр, район сәхнәләрендә чыгыш ясаган чакларын искә төшергәннәр. Соңыннан янәдән бергәләп удмурт-мари биюләрен башкарганнар.

Менә безгә дә Сырья авылына барырга җай чыкты, ди Улисьял авылы старостасы Валентин Максютов. Кунак ашы кара-каршы була бит, без дә әзерләнеп удмурт дусларыбыз янына барырга җыенабыз. Халыклар дуслыгы елында бераз онытылган очрашуларны үткәрү һәр ике милләт вәкилләре өчен бик файдалы, дип ассызыклады авыл старостасы.