Балтач пенсионерлары әзерләнә торыгыз, киләсе елда, бәлки, сез дә катнашырсыз

24 августта Казанда пенсионерлар арасында компьютердан файдалану буенча россиякүләм ярышлар башланып китәчәк. Ике көн дәвам итәчәк әлеге ярышта Россиянең 70 төбәгеннән һәм 6 чит илдән килгән пенсионерлар үзара көч сынашачак. Араларында Абхазия, Белоруссия, Бельгия, Польша, Словения һәм Финляндия кебек ил вәкилләре дә бар.

75 мең пенсионер укыган инде

Әлеге чемпионатның төп максаты - пенсионерларны компьютер технологияләренә өйрәтү, аларга дәүләт электрон хезмәтләренә юл ачу. Әлеге чара бишенче ел рәттән уздырыла һәм өлкән буын вәкилләре арасында көннән-көн популярлаша бара.

Кызык, ә Балтач пенсионерлары арасында компьютерны иң яхшы белүчене ачыкларга туры килсә, кем җиңүче булыр иде икән. Райондашлар арасында Түнтәрдән Рәфхәт Зарипов, Ордан Вәзил Вәлиев, Салавычтан Рамазан Фәрзиев, Балтачтан Гыйльмулла Зәкиев һ.б. кебек көндәлек социаль челтәрдәге яңалыклар белән кызыкчынучылар бездә дә бар бит. Хөрмәтле өлкәннәребез, әзерләнә торыгыз, киләсе елда, бәлки, сез дә бәйгедә катнашырга теләк белдерерсез...