100 аръем юбилеез но мед луысал

Мон дырозь кема аръёс ӵоже «Азьлане» газетмес поттӥсь коллективен кивалтэм Николай Григорьевич Борисовлэн гожъямезъя, газетлэн нырысетӥ номерез лыдӟисьёс доры вуэм 1934-тӥ арлэн кутсконъёсаз. Нош тани январь толэзьлэн кыӵе нуналаз потэмзэ, архивъёсын кема бугыръяськыса но, Николай Григорьевич шонер тодыны быгатымтэ. Со озьы ик «Азьланелэсь» нырысетӥ номерзэ но шедьтымтэ. Нош тани Балтась районын 1934-тӥ арысен удмурт кылын газет поттыны кутскон сярысь кутэм КПСС-лэн обкомезлэн бюроезлэн постановлениеныз ас синъёсыныз тодматскем.

1980-тӥ арын август толэзе партилэн райкомезлэн со дырысь куинетӥ секретарез Рашида Аглиулловна Кариева витьымтэ шорысь монэ ас дораз ӧтиз. Со дыре мон район исполкомысь физкультурая но спортъя комитетлэн председателез луыса ужасько вал. Солэн верамысьтыз валай, район газетлэн валтӥсь редакторезлэн удмурт дубляжъя воштӥсез Николай Борисов секыт висе вылэм. Рашида Аглиулловна мыным солэсь ужзэ азинтыны ӵектӥз. Мон пумит луыны но, кельшыны но ёрми. Кызьы уд ёрмы, мынам таӵе уж сярысь малпаськеме но, вӧтам но пыремез ӧй вал. Газет поттон ужен ноку но ӧй выры ук. Зэм, спорткомитетын ужакум спортъя ужрадъёс сярысь, шер-шер ке но луиз, статьяос гожъясько вал. Та уже монэ Николай Григорьевич ӵектэм вылэм. Тӥни озьы ас улон сюресам меӵак воштӥськон луиз, витьымтэ-малпамтэ шорысь «Азьлане» газетэз поттонын ужаны кутски.

Та выль уженым монэ матысен тодматӥзы со дыре бигер кылысен удмурт кылэ берыктӥсьёс (переводчикъёс) Гондыргуртысь Александр Петров но Пор-Кутешысь Валентина Самсонова. Со дыре район газетлэн валтӥсь редакторез Ахат Фазулзянов вал. Мон туннэ но паймисько Сандрагайлэн аслэсьтыз ужзэ туж ӟеч тодэмезлы. Нимысьтыз дышетскемез ӧй вал ке но (бигерысен удмуртэ берыктыны туннэ но нокытын уг дышето), машинистка вӧзы пуксьыса, олома быдӟа статьяосты удмурт кылын диктовать карылӥз. Александр Сергеевич ужакуз кыллюкамъёсын (словарьёсын) туж шер пайдаяськылӥз. Мынэсьтым берыктыны курадӟем статьяосме тупатъяса гожмаса быдтылоз вал. Нош ноку вожзэ ӧз поттылы, каньылэн гинэ валэктӥз, ужен тодматӥз. Валентина Самсоновалэн но та удысын опытэз бадӟым вал, ӟуч текстъёсты но каньылэн удмурт кылэ берыктылӥз. Палэн гуртъёсысен лыктыса ужаны секыт луэмысь Сандрагай но, Валя но ужзэс куштоно луизы. Со дыре машинаен печатлась Мария Борисова, корректор Зоя Павлова но палэн гуртъёсысен лыктыса ужазы. Мария Борисоваен кема аръёс ӵоже ӵош ужамы. Сӥзьыл дэриен но, толалтэ гӧпъёсы но Гондыргуртысен дыраз лыктыса вуылӥз. Висён дыръёсыз но луылэм, дыр, нош солэсь «больничной» басьтэмзэ одӥг но уг тодӥськы.

Вылӥын верам берыктӥсьёс ужысьтызы кошкемзы бере, та ужен тодмо луэм адямиосты шедьтон зэмос «чехардалы» пӧрмиз. Кинъёсын но ужаны ӧз тупа со дыре, туннэ ини ваньзэсты тодам уськытыны но секыт. Куд-огез кӧня ке толэзь гинэ ужаз. Бигер текстэз удмуртэ берыктыкузы котькуд кылэз кыллюкамысь учкисьёсыз но вал. Сыӵеос выль кыллюкамез кӧня ке толэзьскын макулатуралы пӧрмытылӥзы. Берыктэм ужзэс лыдӟыса тупатъян понна кӧня ке час дыр кулэ, лыдӟиськод, тупатъяськод, йыр ик висьыны кутске, гожъямзэс выж вылэ куштыса лэзиськод, нош кияд кутӥськод, тупатъяськод. Тӥни соку малпаськод ини: кытын меда Петров но Самсонова выллем берыктӥсьёс!

Та уже бигер кылэз мынэсьтым но ӟеч тодӥсь Галина Степановаен (али Васильева) Зоя Фёдорова лыктэм бере, ужмы ас ӧраз пырыны кутскиз. Удмуртъёс сярысь ӧжыт гожъяськоды шуэм ӝожтӥськонъёс луэмысь, удмурт гуртъёсы ветлыса, ожысь ветеранъёс сярысь статьяос гожъяны но дыр шедьылӥз, соку газет лыдӟисьёсмес Ушма, Покчи Лӧзя, Ципья, Вукогурт, Ӟаны, Пор-Кутеш, Сала Кушкет гуртъёсын луэм ожысь ветеранъёсын тодматыны быгатӥмы. Соослэн ожын возьматэм батырлыксы сярысь статьяос бигер газетын но печатласькизы. Жаль, туннэ ини соос югыт дуннеен люкиськизы. Кылысь кылэ берыктон пумысен вераку, берло аръёсы ӵош ужам Вылын Ушмаысь Зинаида Гришкинаез но ӟеч малпанъёсын гинэ тодам уськытӥсько. Ас улоназ секыт ыштонъёсты адӟем Зинаида Ивановна ваньзэ чидаз, секыт улонзэ коллектив пӧлын возьматыны ӧз тыршы, ужаз но ӧз шӧдыты.

Ахат Фазулзянов бере район газетлэн коллективеныз Хамит Фазулзянов кивалтӥз. Со аръёс секыт луэменызы тодэ кылем. Уждунэз ӝегаса сётылӥзы, газетэз поттыны уксёлы ёрмимы, кагаз шедьтон бадӟым проблемалы пӧрмиз. Огдыре газетмы йӧл-вӧй комбинатысь басьтэм зӧк пурысь кагазэ печатласькиз. Сыӵе кагаз вылэ печатлам газетысь фотоосты тодманы, букваосты лыдӟыны туж шуг вал. Казане мыныса кагаз ваён понна сьӧрад одно ик «салам» басьтоно, уждунэз дыраз басьтон понна коньдон ужпумъёсъя отделын ужасьёсты «кӧяно-вӧяно». Таос «кризис» шуон аръёс вал.

Бен, «Азьлане» удмурт кылын потӥз ке но, солэн бамъёсаз районысь удмуртъёс сярысь гожъямъёс ӧжыт вал. Лыдӟисьёс ӝожтӥськизы, нош асьсэос пӧлын гожъясьёс чиньыосын гинэ лыдъямон вал. (Югдур али но сыӵегес шуыса тодӥсько). Со аръёсы киязы шер ке но ручка кутэмъёс сярысь верано ке, Тагашурысь Нина Кумаеваез, Покчи Лӧзяысь Пётр Байтугановез, Иван Кушаевез (кулэмын ини), Ѓаныысь Антонида Ермаковаез, Сырьяысь Леонид Сапожниковез, Кургемысь Лидия Губановаез (кулэмын ини) но мукет куд-огъёсты пусйысал. Улонысь туж вазь кошкем улосчимы Николай Никифоров лыдӟисьёсмес аслаз кылбуръёсыныз, серемес веросъёсыныз, повестьёсыныз шумпоттылӥз. «Азьлане» газетмес ӧжыт ке но «удмурт шӧмо» карон понна пӧртэм амалъёсты утчамы. Огдыре арняяз одӥг пол «Шумот ӝытэ» шуэм бам дасяны кутскимы. Со бамын вашкала удмурт сямъёсын но йылолъёсын, ӝӧксьӧр но лекрут кырӟанъёсын, такмакъёсын, котырскыса шудон кырӟанъёсын тодматыны тыршимы. Та кырӟанъёсты, такмакъёсты люкаса газетын печатланэ районысь арлыдоосты кыскыны быгатӥмы. Соос туж мылкыд карыса та уже, соослэн уноез туннэ асьме пӧлын ӧвӧл ке но ини, соосын люкаса редакцие ыстэм кырӟан-такмакъёс туннэ но «Азьланелэн» бамъёсаз возьмасько, люкаськыса шулдыръяськонъёс дыръя ӝӧк сьӧръёсын, урамъёсын, возьвылъёсын чузъясько. Районамы удмурт культурая общество кылдэм бере, обществолэсь ужзэ югдытӥсь бамъёс дасяллямы, «Литературной страница» бамез но яратыса лыдӟо вал шуыса тодӥсько.

«Азьлане» газетлэн 1980—1990-тӥ аръёсы «шокамез» сярысь вераку, сое дасянэ люкет пыртэм типографиын ужасьёсты но пусйыны кулэ, дыр. Бен, туннэ газет поттонын выль технологиос кутӥсько. Киын печатлан машинкаос, букваосын сюресъёсты киын, линотипен (металлэз ӵыжатыса сюрес бичан машина) бичанъёс, печатать карон станокъёс но мукетъёс историе пырыса кылизы. Нош азьвыл газет поттонэз типографитэк син азе пуктыны уг луы вал. «Азьлане» газетэз поттонын кема аръёс ӵоже тыршизы Шор Ушмаысь Мария Григорьева (туэ гинэ улонысь кошкиз, интыез узьмагын мед луоз), Ярак-Чурмаысь Алевтина Петрова, Вылын Ушмаысь Зинаида Гришкина но удмурт кылэз чылкак тодӥсьтэм бигер нылкышноос. Со аръёсы район газет арняяз куинь пол потылӥз (кӧснуналэ, покчиарняе но шумотэ). Ѓучарнябернуналэ уже лыктӥськод, со нуналэ ик кӧснуналэ потоно номерез печатлано, нош ортчем арнянуналысен кылем букваосын сюресъёсты учкиськод но, йырдэ кормаськод. Ма, Инмаре, газетэз дасян понна одӥг визь кузьда гинэ сюресъёс кылемын ук! Тӥни собере лумбыт тыл вылэ лёгем коӵыш кадь бызьылӥськод ини. Куддыръя газетлэсь быдэс бамзэс букваосты киын бичаса тырмытоно луэ вал. Огдыре линотип тӥяськемен газетмылэсь куинь номерзэ дыраз поттыны ӧм быгатэ. Котькыӵе шуг-секытъёс луизы ке но, ар ӵоже 150 номер газет поттоно вал. Та пумысен Казаньысен но, районысен но юн контроль луиз. Та секыт югдурысь ватсаса бамъёс поттыса гинэ потыны быгатӥмы, ар пумын югдур тупатскиз.

Кӧня ке кыл газетлэн тиражез сярысь но вераны кулэ, дыр. Со аръёсы та пумысен шуг-секытъёс ӧз кылдэ шуыны луэ. Районысь котькуд удмурт семья «Азьлане» газетэз басьтэм, дыр, шуыса малпасько. Тае тиражлэн быдӟалаезъя но валаны луэ вал. Со арлы быдэ сямен 800-лэсь ӧжыт ӧз луы. Мукет сямен вераса, газетлы одӥг пол гожтӥськем лыдӟись арлы быдэ сямен гожтӥськылӥз. Тодэмея, газетлэн электрон формаез кылдэм бере гинэ та ласянь югдур шугомыны кутскиз, «улэп» газетэз лыдӟисьёслэн лыдзы кулэсмыны кутскиз. Бен, улон интяз уг сылы, ваньмыз воштӥське, выльдӥське. Нош та воштӥськонлэн мукет палыз но вань. Азьпалан но тазьы азинтӥськиз ке, Балтась удмуртъёс асьсэлэн газетэнызы пыраклы уз люкиське меда. Озьы медаз луысал. «Азьлане» газетмес 85 ар ӵоже утьыны быгатӥськеммы вылэм, нылпиосмылы, соослэн нылпиоссылы газетмылэсь 100 аръем юбилейзэ но пусйыны мед кылдысал. Сое кылдытонын нырысетӥ вамышъёссэс лэсьтэм Чакмин, Халтурин выллем ас калыксэс, анай кылзэс гажасьёс газетмылы со понна улон сётӥллям, дыр.

Александр Кунаев