21-тӥ тулыспалэ Вордскем кыллэсь калыккуспо нуналзэ пусйизы

Кыл асьмелэсь дунневаланмес, улон шоры учкеммес шарая. Соин ик котькуд кылэз гажаны кулэ. Но со гажан ас понназ кылдыны быгатэ меда? Вордскем кылыдлы яратон сярысь, мукет кылъёсты гажан сярысь ӧд ке малпаськы, соос уз быре меда? Ӵапак кылъёсты утён но азинтон понна, пӧртэм калыкъёслэн сям-йылолъёсынызы тодматон вылысь Анай кыллэсь калыккуспо нуналзэ пусйыны кутскизы. Та нуналлы сӥзьыса, районысьтымы школаосын гинэ но анай кылъёсты данъян вылысь ужрадъёс ортчизы. 
Покчи Лӧзя школаын 21 тулыспалэ благотворительной творческой ужрад ортчиз. 7-11 классъёсын дышетскисьёс пумиськизы Леонид Сапожниковен, Сырья клублэн кивалтӥсеныз. Пиналъёс но дышетӥсьёс Леонид Дмитриевичлэсь Римма Николаевалэн «Пӧртмась вень» пьесаезъя уськытэм любительской фильмзэ учкизы, озьы ик видео кылдытон сярысь, ужаз кыӵе программаосты кутэмез сярысь но кӧня ке тодӥзы. Леонид Дмитриевичлэн верамезъя, Покчи Лӧзяын учкисьёс (соос огъя 52 кузя вал) фильмез кужмо кичабонъёсын пумитазы. Нылпиослы таӵе кулэ луись пумиськон радъямзы понна тау карыны кулэ школаысь удмурт кылъя но литературая дышетӥсьёссылы Ольга Пчельниковалы но Наталия Антоновалы. Ӵапак соос ик, творческой ужрадлы кутскон сётыса, нылпиос азьын Анай кыллэн калыккуспо нуналэз сярысь вераськизы. Нялтас вераса, та благотворительной пумиськонын люкам коньдон Леонид Сапожниковлэсь бичетсэ поттон понна кутӥськоз. 
Озьы ик та нуналэ школаын «Халыкара туган тел» нимен бигер кылын классной час но ортчиз.