Хезмәт

«Ачим но уг оскиськы, 90 арес тырмиз шуыса», — Антонида Семёнова

Кургем гуртын улӥсь Антонида Алексеевна Семёнова туж секыт улон сюресэз ортчем.

Та гуртысь трос нылпиё семьяын вордскем ныл семьяяз самой бадӟымез нылпи луэм, солэн кык выныз но кык сузэрез луэм. Соин Антонидалы пичи дырысеныз трос ужаны, шуг-секытъёсты адӟыса будыны кылдэм. «Атае жугиськонэ кошкиз, ми, вить нылпиос, анаенымы кылимы. Араз 170 нуналлэсь ӧжытгес ужаны потӥд ке, колхозысен номар но уг сётӥськы вал. Вылаз ик штраф но тыро вал. Анаелы юртто шуыса гужембыт, одӥг нунал кельтытэк, колхозэ ужаны ветлӥ. Ужам нуналъёсы анайлэн нимаз гожтӥськизы. Озьыен, арлэн пумаз анайлэн ужам нуналъёсыз тырмо вал али. Сиыны сиёнмы луымтэысь, жугиськон аръёсы кураськыны тупаз. Нырысетӥзэ кураськыса ветлэмме тодам возисько. Дурга гуртэ мынӥ. Нырысетӥ юртэ пыри, асме сютэм шуыса уг вераськы. Возьдаськыса, монэ медаз тодмалэ шуыса, Сизнер гуртысь шуыса верай асме. Тау, котькуд пырем юртын ӧжыт, огпол куртчымон ке но, асьсэ люкетсэс жалятэк, мыным нянь сётӥзы. Со нуналэ дорам бертэме бере, ваньмы — анай, вынъёсы но сузэръёсы, нянь сиимы. Кураськыса ветлон секыт йӧтӥз ке но, мынэсьтым люкам нянез сиыса, матысьёсы улэп кылизы... Жаляса верано, туннэ нуналэ одӥг сузэре гинэ вань, со Кировын улэ, мукетъёсыз кулӥзы ни», — тодаз уськытэ пичи дыръёссэ Антонида Алексеевна.

Секыт жугиськон аръёс сыӵе адӟонъёсын но шуг-секытъёсын ортчо. Атаез ожысь уг ни берытскы. Война йылпумъяськыку, Антонида ини вуэм ныл луэ. Ужлэсь кышкасьтэм, чебер, тыршись нылэз Кургем гуртысь ик егит пи Владимир синйылтэ. Антонидаез со ини нокытчы уг лэзьы. Оло, Антонида гырись луыса ужакуз яратонзы кылдэм (нялтас вераса, Антонида Алексеевна кунян утись луыса но ужам, бадӟым ошъёсты но утем), оло мукет мугъёс луиллям — таиз тодмо ӧвӧл. Но кызьы луиз ке но, егитъёс юн семья кылдытыса улыны кутско. Огзы сьӧры огзы пиоссы Павел но Валерий вордско. Колхозысь азьмынӥсь трактористлэн  Владимир Семёновлэн уж ласянь быгатонлыкъёсыз пиосызлы но выжтӥсько. 1994-тӥ арын кулэм семьялэсь главазэ нылпиосыз но, внукъёсыз но, ачиз но Антонида Алексеевна ӟеч кылын гинэ тодазы ваё. Павел пизы туннэ нуналэ Ижкарын аслаз семьяеныз улэ, нош Валерий — вордскем юртаз. Трос аръёс ӵоже соос Евгения кузпалэныз «Активист» обществоын ужало, ферма но куто. Табере соослэн Александр пизы но анай-атаезлэсь ужзэс азьланьтэ. Со — хозяйстволэн валтӥсь зоотехникез, кузпалыз Анастасия — бухгалтер. Огъя вераса, семьяын ньыль выжы улэ, котькудӥзлэн аслаз ужез вань. Дас скалъёсты вордо, мукет пудозы но тырмыт. 35 ар ӵоже юн кусыпъёсты возьыса сыӵе эшлыко но ужась семьяын улыны быгатонлэн валтӥсь мугез ог-огдэ валаса, гажаса но ог-огедлы юрттыса улэм бордын луэ, дыр. «Тыршыса улыкуд гинэ улонлэсь шӧмзэ валаськод», — шуо та семьяын. Антонида Алексеевналэн ортчем аръёсыз та кылъёслэн свидетелез. «Тани 90 арес но тырмиз ини. Ачим но уг оскиськы али. Мар карод ни? Улоно. Троссэ адӟыны кылдӥз ке но, уг ӝожтӥськиськы. Ваньмыз понна Инмарлы тау. Картлы но кыдёке ӧй кошкы — бускель пилы гинэ. Умой улӥмы, гумырлы ӵоже ужаса, ог-огмылы пыкет луыса улӥмы. Пересьмонме но вордскем гуртам, матысь адямиосыным ортчытӥсько. Ньыль внуке вань, вить правнуке, Инмарлы тау», — шуэ Антонида Алексеевна.

Котырес лыдпусэныз юбилярез ӟечкыланы вуэм Балтась ёрослэн главаез Рамиль Нутфуллин Антонида Семёновалы РФ-лэн Президентэзлэсь ӟечкылан открытказэ, Таукарон гожтэтсэ, сяська керттэт но тӧдьы кышет кузьмаз. Кугунур гурт поселенилэн главаез Руслан Егоров, «Активист» обществолэн кивалтӥсез Рафиль Закиев но юбилярез ӟечкыланы лыктӥзы. Соос но Антонида Алексеевналы шуныт мылкыд каронъёссэс вуттӥзы.        

 

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: юбилей
Нравится
Поделиться:
Реклама
Комментарии (0)
Осталось символов: