«...Анаелэн верам кылъёсыз сюлэмам...»

Мынам егит пинал дыры ортчиз Балтаси ёросысь одӥг тужгес чебер сэрегаз — Вукогуртын. Та шудо улонмес асьмелы кузьма анаймы. Тани ачим но песянай луи ини, нош мусо но дуно анайме котькуд нунал тодам вайисько. Али но солэн небыт киосыз, оло, вешало кадь, шуисько, ужаны но улыны дышетэмез ваньмыз кадь пуксе син азям. Анаелэн ми сизьым кузя нылпиосыз вал. Мон бадӟымез, соин ик, оло, тросэз сюлме юн пыӵаса но кылиз луоз. Туннэ нуналын мар со трудодень сое ум ни тодӥське. Соку ужам ужлы дун тыронэз юэн сётылозы вал, куд-ог дыръя гинэ коньдонэн. Анаелэн гур пыдсын пыжем ческыт нянез али кадь тодам, кыӵе шумпотыса, ческыт карыса сииськом вал ми сое. Кино арнялы огпол гуртамы вайылӥзы, отчы но курегпузэн пырылӥмы. Киномеханик ведрае люкаса мынэ вал. Киное черодэн пыриськомы вал. Гожтӥд ке, трос луэ гожтыны, сое гинэ вераме потэ, анаймы милемлы огпол но ӧз кесяськы, умоен гинэ валэктоз вал. Уг вунэтӥськы, ми куать нылъёс но одӥг вынмы туж тупаса улӥмы. Атаймы гынсапег лёге вал. Соин ик одӥг учыр тодам. Одӥг воргорон ыжгонэн пыриз, анае пуксьыны косӥз. Мон соку школаысь бертэм бере выжез миськиськем вал, нуналлы быдэ выжез ӵушыса басьтылӥ, ваньмылэн но ужмы люкемын вал милям. Со бигер воргоронлэн тазьы юамез али но пель сьӧрам кадь: «Эудӥ (Анаелэн нимыз Евдокия вал, бигеръёс вакчиятыса озьы шуизы), сызнын балагыз куб дип айталар, курынмилар, уйыгыз шул хетлэ чиста!» Кызьы вань, озьы ик гожтӥ. Мон соку 10-тӥ классын дышетскисько вал. Лыдӟисьёс малпалозы, нош кытын нылпиоссы? Азьло дырын пичиос, кин ке пырись луиз ке, гур сьӧры ватӥськозы вал, туж кышказы. Милемыз анай корка пушкез, юрт котырез чылкыт возьыны дышетӥз. Школае собрание ке но ветлылӥз, бертыса шумпотыса вералоз вал, чылкыт нуллӥськод нылпиостэ, кышъям ке но.

Мынам анаелэн улон сюресэз туж секыт ортчемын. Соин ик со милемыз та улонын шонер сюрестӥ вамыштыны дышетӥз, луоз, нокинлэсь сюлэмзэ вӧсь карытэк, ужез яратыса, ужлэсь кышкатэк, калыкез гажаны но быгатыны кулэ шуоз вал.

Анае Сырья гуртын вордӥське, солы куинь арес дыръя анаез — ӵужанай — та улонысь кошке. Нош атаез, анаелэсь агайзэ, Осип нимо пизэ, басьтыса кошке, озьыен анае куинь арескын огназ кыле. Анайме жаляса одӥг нылкышно басьтэ, кудӥзлэн нылпиез уг луы, сое анай «ӵужапай анай» шуоз вал. Нош улон котьку но тырше азьлань вамыштыны. Ӵужапай анаезлэн 1937-тӥ арын пиез вордӥське, Семён нимо, анае 1927-тӥ вал. Пиез вордӥськем бере кӧня ке арскын ӵужапай анаез (нимзэ уг ни тодӥськы) пиеныз городэ улыны кошке. Нош ик анаелы огназ та улонысь шӧгзэ но кузьытсэ трос веръяно луэ. Нош та кышномуртлы, кудӥз та улонысь туж кема аръёс ӵоже ке но кошкемын, анаез сюдэмез-вордэмез понна, эшшо тыршем тодон-валан сётон понна дышетыны. Туж бадӟым тау кылме вераме потэ. Со дырын сизьым класс быдтэмъёс туж ӧжыт вылэм, анае сизьым классэз быдтэм, трос кылбуръёсты тодэ вал со. Мон дасэтӥ классын дышетскыку ӵужапай анаез бертылыса кошкиз. Ӵошен пашпумульы (орешник — ред.) бичаны ветлӥм. Туннэ нунал кадь син азям, кызьы со мыныса-мыныса анайме вешаз. Ас понназ, оло, малпаз, луоз, ӵошен улэм нуналъёссэ. Нош атаез, ӵужатай шуыны ымы уг пыры, уг быгатӥськы, сыӵе адямиез адями шуыны но уг луы. Кыӵе сюлмын, мар малпаса аслэсьтыд нылдэ куштыса кельтод? Кырын улӥсь пӧйшуръёс но тыршо асьсэлэсь пиоссэс утялтыны. Соизлы гинэ паймисько, кызьы со монэ утчаса лыктыса вуиз, куинь пол ветлӥз со ми доры, лыктэмезлы быдэ вазьыса кельтэ вал куное. Огпол таӵе кылъёс вераз: «Квартираез но кӧня уксё вань тыныд кельтӥсько». Со дырын араз кык-куинь пол тыршисько вал вордскем музъемам вуыны. Сабантуй праздник дыръя бертыку со кылъёсты анаелы верай. Со соку ик, марлы паймыса улӥськоды шуиз. Кӧня аръёс ортчизы ини со дырысен, анаелэн верам кылъёсыз сюлэмам. Кыӵе шонер вераз со, анаез бӧрдытыса, сютэм кезьытъёсын нулдэмзэ малпаса, озьы сьӧлыксэ берыктыны малпа, дыр, анаелэн синмаз, оло, учкыны берло ӧз быгаты, луоз.

Озьыен, адямилы улон огпол гинэ сётэмын. Сое тодыса-валаса, вордэм анай-атай асьме поннамы туж дуно но матын мед луоз. Тау кылме вераме потэ монэ утись-вордӥсь анаелы но атаелы.

Мария Александрова

Башкортостан, Шудек гурт