«Анай кылэз дышетскисьёс трос ке луизы, кылмы уз быры»

2018-тӥ арысен 27 шуркынмонэ быдэс дуннеын Удмурт кыллэн нуналыз пусйиськыны кутскиз. Наталия Антонова, Покчи Лӧзя шоръёзо школаысь удмурт кылъя но литературая дышетӥсь, Балтась ёросысь удмурт кылъя но литературая дышетӥсьёслэн методической огазеяськонзылэн кивалтӥсьсы, таин валче «Азьлане» газетлы интервью сётӥз. Вераськонмы удмурт кылэз дышетсконын кылдэм шуг-секытъёсын герӟаськемын. Зэмзэ ке верано, таӵе темаен кемалась Наталия Львовнаен интервью ортчытэме потэ вал ини, но вераськонмы ӵапак Удмурт кыллэн нуналыз азьын луиз. Малпасько, та интервьюез тужгес но тунсыко луоз лыдӟыны анай-атайёслы.

— Наталия Львовна, кызьы вань, озьы ик вераны кулэ: удмурт кылэз дышетон туннэ нуналэ асьме ёросын (асьме ёросын гинэ но ӧвӧл али) бадӟым проблема луэ. Сыӵе проблемаос садикын но, школаын но ӵем кылдо. Соин нырысетӥ юанэ таӵе: Тӥ, дышетӥсь луыса, школаын нылпиосты удмурт кылэз дышетон ласянь кыӵе шуг-секытъёсты пусйысалды но соосты сэрттон-пертчон понна кыӵе амалъёс ӵектысалды?
— Удмурт кылэз дышетонын шуг-секытъёс вань ик, малы ке шуоно арысь аре покчи классэ лыктӥсь пиналъёс ӟучомыса вуо. Анай-атайёс паймо: кыӵе туркыме (группае) пиналзэс сётыны. Дышетӥсьлы но та трос могӟетъёс кылдытэ: кыӵе кылын, кыӵе амалэн соосын вераськоно-дышетоно?! Югдур герӟаськемын нылпи садын анай кылын занятиос ӧвӧлэн, озьы ик нылпи садъёсын удмурт визьнодасьёс ӧвӧлэн. Тужгес но сюлмаськытэ куд-ог анай-атайёслэн ас вордскем кылзэс туала улонын кулэтэмен лыдъямзы. Азьланяз тазьы луиз ке, «удмурт кылмы быроз» шуэм кыл та. Кыл быриз ке, калык но быроз. Та ужпумез сэрртон-пертчон  понна ми, дышетӥсьёс, озьы ик Балтаси ёросысь удмуртъёслэн НКА нимынызы Дышетонъя управление но вазиськимы ни вал, ужпум интыысьтыз ӧз вырӟы. Анай-атайёслэн туала дыре эрикрадзы (правозы) тросгес шуысал ке, ӧй янгышасал, дыр, мон. Соин ик, нылпи садын удмурт кыл мед чузъяськоз шуыса, ӵектысал куриськонэн Вылӥ органъёсы вазиськыны, оло, «дэмен изэз но вырӟытыны луысал…», уката вуоноез ар Анай кылъёслы но калык огазеяськонлы сӥземын.

— Кӧня ке ар талэсь азьло анай кылъёсты дышетон ласянь федерал катэ (законэ) воштӥськонъёс пыртэм бере, удмурт кыллэн часъёсыз кулэсмизы. Но со шоры учкытэк, сое дышетскон капчигес ӧз луы – тазьы верало анай-атайёс но, дышетскисьёс но. Зэм-а со? Маин со герӟаськемын?
— Зэм, федерал катэ (законэ) воштӥськонъёс пыртэм бере, часъёсмы кулэсмизы. Программной материалэз вакчиятоно луиськомы, соин ик нылпиос куд-ог темаез, оло, валатэк но кылё, дыр. Герӟаськемын со бигер кылэз дышетонэн но. Азьвыл бигер кылэз кун кыл шуыса, ваньмыз пиналъёс одно ик (обязательно) дышето ке вал, табере сое анай кыл интыын гинэ дышето ни, соин сэрен удмурт кылъя урокъёс но ичиёмизы. Азьло аръёсы ИКРН (история и культура родного народа) предметэз но нуиськомы вал ай. Мукет кылэз дышетӥсь пиналъёс но шумпотыса пыриськылӥзы урокъёсамы. Нылпиос туж тунсыкъясько вал удмурт калыклэн сям-йылолъёсынызы. Табере со сярысь «вал» гинэ шуыны луэ ини…

— Кыӵе программая дышетско нылпиос удмурт кылэз? Кин со программаез быръе – ёрос, школа, ачиз-а дышетӥсь?
— Али дыре школаосмы ужало удмурт кылэз валась нылпиослы (владеющих языком) чаклам программая. Куке но кылдэм вал мукет программае потон сярысь юан. Ёросысь удмурт кылъя дышетӥсьёслэн огазеяськоназы та юанэз эскерыса, палэнсконо луим, малы ке шуоно удмурт кылмес копак ӟучен дышетыса, удмурт кылмы быремлэсь кышкатскимы. Берло дыре ФГОСъя сотэк но удмурт кылъя но литературая учебникъёс уг берто, нош мукет программае выжоно луысалмы ке, воксё «умойтэм югдуре» шедьысалмы.

— Дышетскон программаез бырйыку, анай-атайёслэн (нылпиослэн) малпанъёссы лыдэ басьтӥсько-а?
— Та дырозь дышетскон программаез воштон сярысь юан ӧз кылды. Сыӵе юанъёсты ми ёросысь удмурт кылэз дышетӥсьёслэн огазеяськоназы эскериськом. Сюлмаськытэ анай-атайёслэн пиналэнызы ӟучен вераськемзы,  нылпи садысен лыктэм  пиналъёслэн гондырез «аю», ӵушъялэз «ёжик» шуэмзы.

— Зэм-а луоз вераны, нылпилэн удмурт кылэз тодымтэез (нылпи садын анай кылын занятиослэсь, визьнодасьёслэсь луымтэзэс лыдэ басьтытэк) тросаз учыре анай-атайлэн кулэ карымтэеныз герӟаське шуыны? Кызьы анай-атай нылпиезлы юрттыны быгатэ? Ма бордысен соослы кутскыны ӵектысалды?
— Шонерзэ верано ке, Балтаси посёлокын удмурт нылпи сад но, удмурт визьнодасьёс но ӧвӧл, озьы ке но пиналъёссы анай кылынызы верасько. Татысь валаны кулэ, ваньмыз та семьяысь потэ шуыса. Анай-атай ке кулэ каре, ас кылзэ но калыксэ яратэ, соку кылмы но, калыкмы но улоз. Эшшо мон покчи классъёсын дышетскисьёслы ӵектысал “Кизили” журналлы, 5-7 классъёслы “Ӟечбур” газетлы гожтӥськыны. Сыӵе но тунсыко та изданиос, конкурсъёссы но трос. Пиналъёслэн йырвизьзы но сайкытомысал, дырзы но пайдаё ортчысал. Мӧйыос, тӥ но берло дыре палэнэ кылиськоды, малы “Кенеш”-ез басьтэмысь дугдӥды??? Азьвыл та журналмы трос корка куно кадь пыре вал… Ёросын али 4-5 сяна, басьтӥсез ик ӧвӧл кадь. Дырдэс эн сётэ интернетлы но телевизорлы кузёяськыны. Мед семьяяды удмурт кыл улоз, куное ӵемысь мед вуылозы Ижысь газет-журналъёс.

— Наталия Львовна, малпасько, тӥ понна но, мукет удмурт кылъя дышетӥсьёс понна но секрет ӧвӧл, дыр, тросэзлы нылпиослы удмурт кылъя дорысь ужъёссэс анай-атайёссы, агай-апайёссы быдэсъяло шуыса. Куддыръя соос но уг быгато али куд-ог ужъёсты быдэстыны.   Мон но, 3-тӥ классын дышетскись сузэрелэсь удмурт кылъя книгазэ киям кутӥ ке, мар шуыны паймисько: сокем отын секыт, валантэм кылын ваньмыз гожъямын…
— Удмурт кылъя урокъёсын дорысь ужзэс быдэстыны юртто ке, мон шумпотӥсько гинэ. Юртто бере, значит, нылпизылэн тодон-валанзы сярысь сюлмасько. ФГОС стандартъя дасям выль учебникъёсын зэмзэ но трос валантэм кылъёс пумисько, тужгес но «Удмурт кыл» книгаын. Выль кылъёс тодосчиосын пыртэмын дышетӥсьёслэн но нылпиослэн йырвизязы пумен (постепенно) пыӵатон вылысь. Туж секыт со, веранэз ӧвӧл. «Существительноез макеним, суффиксэз кылӥтэт шуон» йырез но, кылэз но тӥя. Диалектной условиосын улӥсь (эшшо ӟученгес вераське ке) пиналлы туж секыт. Но таӵе югдур мукет программае выжон сярысь юан медаз кылдыты. Ӟучомем удмуртъёсты дышетонъя книгаын но сыӵе кылъёс данак гинэ.

— «Нылпиосы удмурт кылэз адӟонтэм луизы ини, малы ке шуоно соос туж секыт программая дышетско, вылаз ик дышетӥсьёс но трос дорысь ужъёсты сёто, пичи ке но янгышъёс понна но оценкаосты кулэсто. Туала дыре нылпиослэн удмурт кыл сяна но трос мукет дышетсконо предметъёссы ук, луонлыкъёс вань дыръя пӧртэм кружокъёсы но ветлэмзы потэ, но вутскемзы уг луы. Малы меда дышетӥсьёслэн ӧжыт поблажка каремзы уг луы? Оло, дышетӥсь ӧжыт валасагес, капчигес дышетысал ке, умой оценкаосты ӧй жалясал ке, нылпиослэн но дышетскыны стимулзы луысал?». Тазэ юанэз одӥгез анай сётӥз.
— Кыӵе школаосын, кызьы, дыр. Но «удмурт кылэз адӟонтэм луизы» шуыса верам кылъёс вань лулпушме  бугыртӥзы. Туж чурыт верамын. Аслам опытысьтым верано ке, пиналъёслы ноку но ужаны быгатымтэ уж лэземе ӧвӧл. Урокын мае ортчиськом, со выллем ужъёсты ик лэзисько доразы но (1 уж лэзисько ӵемысь), анай-атайёс уз пӧялэ. Литератураен тыршисько урокынгес произведениез лыдӟыны-эскерыны, малы ке шуоно покчигес классын быдэсак сямен текстэз ӟуч кылэ берыктыса валэктоно. Туала пиналъёс туж ӧжыт лыдӟисько, соин ик вераськон кылзы но куанер. Озьы ке но, тыршиськом ӟеч оценка пуктыны. Ӟучомем пиналлы, кылсярысь, туж секыт йӧтэ текстлэсь пуштроссэ мадьыны, нош ӟуч кылын ке пинал быгатэ вераны, озьыен, со дасяськем, 5-6 классэ вуыса, кылъёсты тӥяса ке но, пинал тырше ини лыдӟемъёссэ ас кылыныз вераны. Сыӵеослы мон оценкаез уг жаляськы. Соосын артэ ик вань удмурт кылын вераськыны быгатӥсьёсыз, но мылзы потымтэос… Сыӵеоссэ ӧжытак «дышетыны» (проучить) но кулэ, дыр, шуыса малпасько. Пинал урокын кылзӥське но, ваньзэ валаса, умой оценка басьтэ ке, солы дышетоно  предмет но, дышетӥсь но котьку кельшозы. Ужъюлтошъёсылы (коллегаосылы) но газет пыр вазиськеме потэ: нылпилы анай кылэз дышетон ноку адӟемпотонтэм медам луы. Со шумпотон но данъяськон мылкыд гинэ  мед ваёз. Анай кылэз дышетскисьёс трос ке луизы, кылмы уз быры.

— Кызьы тӥ малпаськоды, удмурт кылэз нылпиослы капчигес формаен дышетысалзы ке, югдур умой пала ӧжыт ке но ӧй воштӥськысал меда?  
—Капчи формаез утчанэз ӧвӧл. Калык верамъя, «Капчиез ӝӧк вылын». Проблема  нылпи садын кылэз дышетымтэ но семья куспын пиналэн вераськымтэ бордын. Малы ке но Балтаси посёлокын улӥсь удмурт семьяосын пиналъёссы бигер пӧлын улыса но, уг ӟучомо, куинь кылын верасько. Йылпумъяса вераме потэ «Мугез палэнысь утчано ӧвӧл, ачид пушкысь шедьтоно».

— Вераськемды понна бадӟым тау!

Фото: автор