Анайёслы сӥзем концерт (+фото)

Та нуналэ котькуд ёросын, пичи гинэ гуртъёсын но нылпиос яратоно анайёссэс шуныт праздникен ӟечкылазы. Оскисько, анайёс но та нуналэ сюлмаськыса, со дыре ик шумпотыса витизы, луоз, нылпиоссэс. Тросаз ёросъёсын, асьме Балтась ёросамы гинэ но, та нуналлы сӥзьыса концертъёс возьматӥзы. Вераме потэ Ципья культура юртын ортчем концерт сярысь.

Та концертэз арлы быдэ радъяло вал ке но, туэез аспӧртэмлыко ортчиз кадь, потӥз мыным. Котькуд концертэ пыриськись нылъёсты но пиосты калык тодэ ини, соослэсь ссэс праздниклы быдэ вите. «Радуга» эктон коллектив аслэсьтыз эктонъёссэ быдэстӥз, Гузель Даминова, Диляра Камалова, Анна Денисова огезлэсь огез чебересь кырӟанъёссэс кырӟазы. Библиотекаын ужасьёс Залия апай но Гульсина апай учкисьёслы юмористической номер но возьматӥзы. Евгения Михайлова мызганэн шудыса удмурт кырӟан но быдэстӥз. Соос сяна но кырӟасьёсмы но эктӥсьёсмы вань вал. Таиз концерт Ципья калык понна выль талантъёсты усьтӥз, соос сярысь ӧжыт вераме потэ. Нимысьтыз пусйысал Назипов Булатэз. Концерт кутскытозь нырысетӥ радын зӥбыт гинэ пукись пи сярысь нокызьы но уд малпа вал, сыӵе чебер куараеныз, сценаын ассэ возьыны быгатэменыз калыкез паймытоз шуыса. Ӧз жаля ик калык та пилы кичабонъёссэ. Ассэ сцена вылын воземез, чебер кырӟанъёсыз котькинлэн сюлмаз кылизы, дыр. Озьы ик висъяса верамон Аухадиев Фаннур но. Таиз кырӟась Ципья калыклы кемалась тодмо ни. Кема сцена вылэ потымтэысьтыз-а, оло, кырӟанъёсыз туж кельшемысь-а, Фаннур агаез сцена вылысь кошкыны ик ӧз лэзе. «Нош одӥг кырӟандэ ке но быдэсты ини», - куризы сое залын пукисьёс. Быдэстӥз. Кырӟаз. Кужмо кичабонъёсын Фаннур агаез сцена вылысен келязы. Вераме потэ на Ципья культура юртлэн выль директорез сярысь но – Аухадиев Раннур сярысь. Котьку серекъясь, котькинэн огъя кыл шедьтыны быгатӥсь Раннурлэн но та нуналэ сюлмаськемез шӧдске вал. Паймонэз ӧвӧл – кемалась ӧвӧл гинэ директор луиз со, ваньмыз умой гинэ мед ортчоз шуыса туж сюлмаськиз, луоз. Сюлмаськемез юнме вал – концерт ваньзылы туж кельшиз но ваньмыз умой гинэ ортчиз. Концерт йылпумъяськем бере, Ципья гурт поселенилэн главаез Нотфуллин Азат Газизуллович но вань кадь анайёсты, песянайёсты но озьы ик вань кадь нылъёсты – вуоно анайёсты – та праздникен ӟечкылаз.

Огъя вераса, котькудӥз учкись концертысь капчи, шулдыр мылкыдын кошкиз. Артистъёс понна та самой бадӟым дун луэ, дыр.