Ас ужзылэн патриотъёсыз тросгес мед луысалзы

Туэ та нунал 12 гудырикошконлы тупа. Праздниклэн историез 1939 арысен кутске, но синпель нуналъёс пӧлы со 1980-тӥ арын гинэ пыре: праздникез СССР-ысь Вылӥ Кенешлэн Президиумезлэн указэныз юнмато.

Али дыре физкультурая урокъёс тужгес но кулэ: тросэз нылпиос компьютер, телефон сьӧрын пукыса, асьсэлэсь тазалыксэс лябӟыто. Cое юнматон но таза улон сямъёсын тунсыкъяськон мылкыдзэс ӝутон бордын школаосын физкультурая дышетӥсьёс тыршо. Соос дышетонлэн сӧзнэтаз вужере кылё ке но, асьсэлэсь ужзэс яратыса но гажаса быдэсто. Асьсэос ик верало: валтӥсь данъетсы — нылпиослэн тазалыксы но спортэз гажамзы. 
Котькуд нылпи улонзэ спортэн ӧз ке но герӟа, азьпал улоназ кыӵе ке но спорт луыны кулэ. Нош кин ке но аслэсьтыз улон сюрессэ спортэн герӟа. Татын физкультурая дышетӥсь юрттыны кулэ: дыраз нылпилэсь тунсыкъяськонъёссэ шараяны но соосты шонер сюресэ поттыны быгатыны кулэ.

Туннэ одӥгез сыӵе тыршись дышетӥсь сярысь вераме потэ. Со али дыре Шор Кушкет шоръёзо школаын дышетэ. Озьыен, статьямы Руслан Эрнстович Михайлов сярысь луоз. Быдэс ёрос понна тодмо дышетӥсь, тренер, кудӥз кужымзэ жалятэк тодон-валанъёссэ нылпиослы сётэ, выль амалъёсын тунсыко урокъёс дася, троссэ ачиз практика вылын возьматэ, солэсь нылпиос пример басьтыны быгато.

Руслан Эрнстович вордӥське Ципья гуртын 11 толшоре 1977 арын. Семьяязы соос 3 пиос но 1 ныл будо. Эдуард агаез туннэ нуналэ Кугунур шоръёзо школаын ОБЖ но физкультура предметъёсъя дышетӥсь луэ, Эльвир агаез — школаын пӧртэм ужъёсты ужась, Сирена сузэрез нылпи садын воспитатель луыса ужа. Анаез Фаузия Тимергалиевна Ципья гуртысь кутам арбериосты лэсьтонъя фабрикаын тыршем, атаез Эрнст Фёдорович Ципья гуртысь школаын физкультурая дышетӥсь луыса ужам. Дышетэм пиналъёсыз али но сое шуныт кылъёсын гинэ тодазы ваё. Михайловъёслэн бадӟым семьяязы ог-огзэс валаса но гажаса улӥзы, гуртын будэм котькуд пинал кадь ик, нылпиос пичиысен ужлы дышизы.

Егит пияш 1994 арын Ципья шоръёзо школаез йылпумъя но азьпал сюрессэ Казаньысь педагогикая кун университетлэн физической лулчеберетъя факультетэныз герӟа. 1998 арын университетсэ йылпумъяса, Шор Кушкет шоръёзо школаын физвоспитания дышетӥсь луыса ужаны кутске. 1 ар ӵоже Шор Кушкет гурт поселенилэн главаез луыса но ужаны вутске, калык понна сюлмаськись воргорон ас ужаз вань кужымзэ поныса тырше, но сюлмыз берен школае кыске. Нылпиослэн шумпотоназы яратоно дышетӥсьсы выль кужымен нош ик школаын ужаны кутске. 

Руслан Эрнстовичлэн урокъёсаз нылпиос бурдъяськем мылкыдын пыро. Занятиос огкадь уг ортчо: упражнениосы выль элементъёс, шудонъёсы пӧртэм лайфхакъёс пыртыса, котьку капчи мылкыдын. Ӵошатсконъёсы но котькинлы пыриськыны луонлык кылдэ. «Мылкыдыд вань ке — быгатонлык но луоз», — шуэ дышетӥсь.

Руслан Эрнстовичлэн мылкыдыз солэн дышетонъяз адӟиське. Ужез аслыз тунсыко потӥз ке, нылпиос но со борды кыстӥсько, аслыз но ужез шумпотымон луэ. Школаын спортзал ноку буш уг луы: дышетскон вакытэ пиналъёс пӧртэм шудонъёсын шудо, кружокъёс ортчо. Ӝытазе нош ик спортзаллэн тылъёсыз ӝуало: татын ӵошатсконъёсы ветлӥсь нылпиос нимысьтыз тренировкаос ортчытъяло. Дырзэ жалятэк, мыло-кыдо тырше Руслан Эрнстович нылпиослэсь буш дырзэс пайдалыко карыны. Зэмос дышетӥсь!

Озьы ик анай-атайёсын но ужаны дыр шедьтэ на: ӵошатсконъёс, ужрадъёс ортчытъя. Школаын радъяськись одӥг спортивной ужрад но сотэк уг ортчы. Ваньзэ рос-прос малпаське, дася. 

Берло дыре Руслан Эрнстовичлэн волейболъя пиослэн командаез тужгес ик тодмо луиз: 2022 арын соос «Школьной Волейбольной Лига» ӵошатсконъёслэн берпум этапаз призёр луизы, ёрос ӵошатсконъёсын ялан вормисе потылӥзы, призо интыос басьтылӥзы, туэ понна но дышетӥсьлэн копилкаяз пӧртэм ӵошатсконъёсысь данъетъёсыз вань. Ачиз ик шудӥсьёслы форма вурон ужъёсъя ветлӥз. Дано тренер луэмзэ дышетскисьёсыз но валало: котькудӥз бордаз кыстӥське, переменалы быдэ бызьыса васько, котькуд ужрадъёсаз мыло-кыдо пырисько. 

Гажано дышетӥсьлэн огъя дышетон стажез 20 ар пала луиз ини, соин ик удмурт, бигер, ӟуч кылын шугъяськытэк вераське. Котькуд нылпиен огъя кыл шедьтыны быгатэ, аслэсьтыз нылпиоссэ но мукетъёсыз пӧлысь уг висъя. Сыӵе ик луыны кулэ тренер: тыршись, ас ужзэ валась, нылпиослы мугор кыдатон мылкыд пыӵатӥсь. Ӵош ужасьёсыз но сое данъяло: соин котьку вераськыны луэ, котькуд ласянь вераськон каньылэн мынэ, котькуд учыръёсын юрттыны дась.
Егит дышетӥсь луыса ужаны кутскыкум, нырысь ик со мынэсьтым мылкыдме буйгатӥз, азьло секыт луиз ке но, азьланяз волялод, ужад юн пыриськод, шуиз. Туннэ нуналэ но солэн кылъёсыз пель сьӧрам чузъясько на. Астэ дышетэм дышетӥседлэсь ӟеч кылъёссэ кылыны котьку шумпотымон.

Школаын ужан сяна, дораз но ужез тырмыт на: пудо-живот вордо, бакча сиёнъёс мертто, ваньзэ дэмен лэсьтыны тыршо. Руслан Эрнстовичлэн гурт ужлэсь кышкамтэез синмаськытэ но паймытэ: пӧсь яке ӟырт кезьыт куазь луиз ке но, аслэсьтыз ужзэ рос-прос быдэстэ. Тазалык гурт ужын ик юнма, дыр, нокыӵе спорт тӥрлыкъёс но кулэ ӧвӧл.

Эшшо лулчеберет удысын пӧртэм вожвылъяськонъёсы но пыриськыны дыр шедьтэ на. Удмурт но бигер кырӟанъёсты-эктонъёсты капчи мылкыдын быдэсъя, уг висъя. Удмурт гуртын улэ бере, котькуд калык аслыз дуно потэ. Кыӵе гинэ талантъёсыз ӧвӧл! 

Гуртоосыз пӧлын но мур гажамон адями луэ, бускельёсыз но дышетӥсьёс, ог-огзэс валаса улыны тыршо, визь-кенеш сётыса уло. «Дуслык» возёсын спорт ужпумъёсъя зэмос юрттӥсь луэ. Ёросын ортчытӥськись спорт ужрадъёсы но мылысь-кыдысь пыриське, солэн кенешъёсыз котькинлы кельшымон луо.
Туннэ нуналлы Руслан Эрнстовичлэн семьяез адӟем карымон луэ: кышноез — Татьяна — Ӟаны гуртысь лулчеберетъя юртын ужа, Дина нылыз ёрос понна «егит кизили», туэ школазэ йылпумъяса, дышетскон сюрессэ Казаньысь лулчеберетъя институтын азинтоз, Максим пиез, 2 классэз йылпумъяз, атаез кадь ик спортэн тунсыкъяське, котькуд вожвылъяськонъёсы но ӵошатсконъёсы пыриське. 

— Атай — туж умой адями. Мон понна со визьмо, юн тыршись, амало. Ми понна со яратӥсь атай, анаймы понна — оскымон кузпал. Ужез борды мылысь-кыдысь басьтӥське, котькуд дышетскисезлы нимысьтыз подход шедьтыны тырше. Мон солэн нылыз ке но, ӧз висъя, мукет дышетскисьёс шоры кадь учкиз: ӵектонъёс сётылӥз, тупатъяз. Куддыръя тросгес куронъёс но пуктылӥз. Дышетскисьёсыныз, нимаз ик бадӟым классъёсысь пиналъёсын, эшъёсыныз кадь вераське: кенеш сётэ, серекъя, маскаръяськыса иса но. Озьы ке но тодӥсько: дышетскисьёс сое гажало. Мон туж данъяськисько солэн нылыз луисько шуыса, — шуныт мылкыдъёсын вера атаез сярысь Дина нылыз.

Азьланяз но зэмос дышетӥсьлы, тренерлы, азьветлӥсьлы сӥзиськом юн тазалык, каньыл мылкыдэн гинэ улыны. Улон сюресаз ӟеч адямиос гинэ мед пумиськозы, нош дышетскисьёсызлы сётэм дырез но кужымез бадӟымесь вормонъёсын мед берытскозы!