Асьме районын туэ Ымусьтонэз пусйизы-а?

Асьме районын но та праздникез сӥлы карыса арлы быдэ трос ужрадъёс ортчытӥсько — кытын концерт, кытын — тематической ӝыт. Туэ, жаляса верано, пӧртэм мугъёсъя Ципьяын но Шор Кушкетын сыӵе концертъёс ӧз ортчытӥське (кӧня ке ар ӵоже радъяськись концертъёслы калык дышемын вал ни), но Покчи Лӧзя гурт Ымусьтонлы сӥзем концерт радъянлэсь ӧз куштӥськы. Туэ но, черклэн юрттэменыз, гуртысь культура юртын традицилы пӧрмем праздник ужрад ортчиз.

Покчи Лӧзя культура юртысь художественной руководительлэн, Галина Денисовна Петровалэн верамезъя, концертлэн программаез арысь аре шулдыргес но узыргес луэ, адямиос тросгес но тросгес ветлыны кутско. Концерт программаын кырӟанъёс, эктонъёс, кылбур веранъёс, сценкаос сяна пӧртэм шудонъёс но вань вал. Соосты пичиослы Тол бабай шудытӥз. Та быдӟа ужрадэз ортчытон понна бадӟым кужымзэ понӥз Покчи Лӧзя черкысь вӧсьчи Рафаил. Ма, кичӧлтӥсез но со ик луэ. Соин но концертэ Покчи Лӧзя черке воскресной школае ветлӥсь нылпиос пыриськизы. Соос гинэ ӧвӧл, гуртысь мукет нылпиос но, анай-атайёс но, черке ветлӥсь прихожанъёс но. Отец Рафаил вань выступать карисьёслы, концертэ вуэм куноослы (Покчи Лӧзя гуртысь сяна татчы вуиллям вал Балтасьын, Ярак-Чурмаын, Ушмаын улӥсьёс) таукарон кылъёссэ вуттӥз. Со вань калыкез бадӟым христиан праздникен ӟечкылаз но нылпиослы ческыт кузьымъёс сётъяз. Кузьымъёсты дасяны спонсорской юрттэт сётӥзы Покчи Лӧзяысь «ФарМат», «Талисман», «Ялтра» магазинъёс, лэсьтӥськон материалъёсты вузанъя магазин, озьы ик ачиз черк но. Шумпотымон, празднике туж трос адями лыктэм, ваньзы праздникысь ӝутскем мылкыдын бертӥллям. Куноос шумпотыса пусйизы, туэ праздник концертэ матушка Наталья но, отец Рафаиллэн кузпалыз, пыриськиз шуыса. Концертлэсь программазэ но со ачиз дасям. 

Ципьяын 6-тӥ толшоре Ымусьтонлы сӥзем куасэн бызьылонъёс ортчизы

Та ужрадэ пыриськизы Ципья школаын дышетскисьёс, Ципьяысь нылпи  садэ ветлӥсь нылаш, Улисьялысь куасэн ветлӥсь пичи пи (самой покчиез со луиз). Нылпиос сяна бызьылонэ пыриськизы бадӟымъёс но. Радъяз та ужрадэз ДЮСШ-ысь тренер Роман Никитин. Зуфар Мухаматгалеев (со ик спонсор) но Раушан Халилов Роман Валентиновичлы та спорт ужрадэз ражъяны юрттӥзы. Соос куасэн ветлӥсьёслы ческыт плов, самоварын пӧсь чай, озьы ик конфет но печення (таизлы нылпиос тужгес но шумпотӥзы) дасязы.

— Милям тренерлы, Романлы, бадӟым таукаронмес вуттэммы потэ. Котькыӵе куазен но, шутэтскон нуналъёс шоры учкытэк, со нылпиосынымы спортэн вырыны дыр но, кужым но шедьтэ. Со котькуд воспитанникез понна умой пример луэ. Озьы ик нимаз висъяса бадӟым таукарон кылъёсмес вуттӥськомы спонсор луись Мухаматгалеев Зуфарлы. Тани 1-тӥ толшоре гинэ но раньӟытэк милям нылпиосмы понна шашлык дасяз, инкуазьын пайдаё гинэ ӧвӧл, шулдыр но дырзэс ортчытӥзы нылпиосмы, — шуо егит спортсменъёслэн анай-атайёссы.

Вераны кулэ, таӵе спорт ужрадъёс тренер ӵем ортчытъя. Со тросгес но тросгес нылпиослы таза улон сямез пыӵатыны, физической культура борды кыскыны, куасэн ветлонэз популяризировать карыны но гуртын улӥсьёс пӧлын та спортэз вӧлмытыны тырше.

Мукет гуртъёсын но Ымусьтон праздниклэсь палэнэ ӧз кыле. Кылсярысь, кӧня ке гуртъёсын ӝыт Ымусьтон дискотекаосты ортчытӥзы.