Асьмелэнъёс «Наш дом — Татарстан» фестивальын

Отын возьматэмын вал Татарстанын улӥсь калыкъёслэн лулчеберетсы но творчествозы, творческой коллективъёсысь самодеятельной но профессиональной быдэсъясьёслэн тужгес усто кырӟан но эктон номеръёссы.

Гала-концертын куноос луизы ТР-лэн Президентэз Рустам Минниханов, ТР-ысь Государственной Советлэн Председателез Фарид Мухаметшин, ТР-ысь Премьер-министр Алексей Песошин, Казаньлэн Мэрез Ильсур Метшин, Татарстанысь муфтий Камиль хазрат Самигуллин, православной духовенствоысь но мукет конфессиосысь представительёс.

Асьме районысь но та фестивале делегация концерт учкыны ветлӥз. Соос пӧлын вал Балтась удмуртъёслэн «Кенеш» НКА-зылэн тӧроез, Шор Кушкет школалэн директорез Владислав Никитин, ёросысь поръёслэн огазеяськонзылэн кивалтӥсьсы Валентин Максютов но мукетъёс.

Ужрад асьмелэнъёслы туж кельшем — ваньзы пусйизы концертлэсь вылӥ уровенен ортчемзэ. Владислав Валентинович но Валентин Васильевич веразы, таӵе ужрадъёс туж пайдаё луо шуыса. Соослэн верамзыя, Татарстанын котькуд калыклы ас кылзэ азинтон понна трос луонлыкъёс кылдытэмын. Соин но, дыр, калыкъёс но куспазы туж тупаса уло.

Вераны кулэ, та фестиваль ини нырысетӥзэ уг ортчытӥськы — со ӟеч традицилы пӧрмиз. Со республикалэн территорияз улӥсь калыкъёслэсь ог-огзэс валанэз, ӵошен луонэз но куспазы эшлыко улонэз юнматон вылысь радъяське.

Туспуктэмез Владислав Никитинлэн