Хезмәт

«Азьлане» газетлэн 85 ар тырмонэзлы сӥзьыса

Калыклэсь улонзэ газеттэк син азе пуктыны уг луы. Газет – со культуралэн шорсюлмыз, шуыны луоз. Газет ивор сётэмысь дугдысал ке, цивилизованной калыкъёслы улонзэс радъяны шуггес луысал, дыр.

Озьы ке но, газет калыкъёслэн улоназы пӧртэм вакытэ пӧртэм инты басьтэ, газет ортче та ласянь кузь но секыт сюресэз.

Эмиль Лэбль, «Культура и печать» сочиненилэн авторез, «газет туж ӝог ивор вӧлмытыны быгатэ» шуэ. Роберт Прутц газетэз нима «даурлэн дневникез» шуыса, кудаз нуналысь нуналэ пӧртэм пуштросэн материалъёс гожтӥсько, ортчем историе пыкиськыса, критикалы дунъет сётон сюрес усьтыса. Озьыен, журналистика луэ даурлэн монологез.

Нырысь потӥсь газетлэн бадӟым кулэлыкез таӵе ӧй вал на. Со гожъяз пӧртэм иворъёсты, нокыӵе дунъет сётытэк. Берлогес ни кылдэ ортчем учыръёсты сэрттон-пертчон, политикалэсь ужпумъёссэ шараян, озьы азинскиз критика. Газет луиз тодмо партилэсь малпанъёссэ, ужпумъёссэ югдытӥсь, дурбасьтӥсь, кӧня ке адямиослэсь, ӵем дыръя быдэс нацилэсь куронъёссэ лыдэ басьтӥсь, калыклэн малпанъёсыныз улӥсь.

Газет озьы гинэ азинскемлэсь ӧз дугды, со киултӥз вакытлэсь азинскемзэ, со луиз вань калыкъёсыз югдытӥсь, кудъёсыз трос тодон басьтыны быгато газетысь.

Пресса кыӵе ке научной уж уг лэсьты, но со луэ быдэс странае сюрс пол ӝог вӧлмыны быгатӥсь маке. Озьыен, журналистикалэн ӧвӧл аслыз гинэ тупась огъя пуштросэз, со сое басьтэ улонлэн пӧртэм удысъёсысьтыз, калыкез тодматыны тыршыса.

Россиын нырысетӥ ӟуч газетлы инъет сётӥсь луэ Пётр I. «Ведомости о военных и иных делах достойных знания и памяти» шуэм листок потэ, кудӥзлэн ужпумез луэ армия сярысь иворъёсты вӧлмытон, приказъёсты печатлан. Со бере дауръёсын листоклэн бамыз бадӟымаса пӧртэм нимын газетъёс потыны кутско. Асьме удмурт калыклэн но визьмо нылпиосыз, асьсэ калыксы понна сюлмаськыса, ӟуч луымтэ пиналъёсты асьсэ анай кылынызы дышетон сярысь сюлмаськыса гожъяло. Нырысетӥ Российской револиция вакытэ И.С. Михеев аслаз тыршеменыз Казаньын поттыны кутске удмуртъёс понна календарь — «Удморт кылын календарь» ( 1904-1909 аръёсы потӥз). Валтӥсь ужпумез со календарьлэн вал удмуртъёсты сайкатон, шонер ужаны дышетон, музъем, пудо-животъёсты, бакча сиёнъёсты будэтон, мушъёсты вордон, сётӥськизы медициная кенешъёс но.

Нырысетӥ книгаос, календарьёс, листовкаос, сборникъёс инъет сётӥзы национальной периодической печатьлы кылдыны, кудӥз удмуртъёслэн кылдӥз Нырысетӥ дунневыл война аръёсы.

1915-тӥ арлэн январь толэзяз Вятка (Киров) городын потӥз нырысетӥез удмурт газет. Нимаськиз со «Войнаысь ивор». Нош 15 августысен 1917 арын газет потыны кутскиз «Удморт» нимын. 1918-тӥ арын издание дугдӥз. Граждан ож дыръёсы потӥзы «Горд гырлы», «Сюрло» нимын газетъёс.

1918-тӥ арын Елабугаын арняяз одӥг пол потӥз «Виль синь» газет. Редакторез вал эсер К.С. Яковлев. Газет ӧтиз удмуртъёсыз огазеяськыны, кенеш сётӥз музъем ужанын, эмъяськон амалъёсын тодматӥз, нырысетӥ гожъясь авторъёслэсь кылбуръёссэс, пьесаоссэс печатлаз. Советлы пумит сылӥсь заметкаосты но печатланы дӥсьтӥз. Гожъязы К.П. Чайников (Кузебай Герд), А.Г. Векшина (Ашальчи Оки), И.С. Михеев, К.К. Векшин но мукетъёсыз. 31 октябре 1918 арын Т.К. Борисов кивалтэм улсын «Гудыри» газет нырысьсэ потыны кутске. Тодӥськом, асьме дыръёсы со газетлэн нимыз «Советской Удмуртия» луэ, 1992 арысен туннэ нуналозь «Удмурт дунне» нимын потэ. Пиналъёслы сӥзем изданиос но толэзьлы одӥг пол потыны кутско, нырысьсэ Кузебай Герд 1920 арын «Муш» журнал поттэ. 1986-тӥ арын пичиослы «Кизили» журнал потэ ни. Озьы ик 1926 арын удмуртъёс понна общественно-политической «Кенеш» журнал потыны кутске. Та журнал будыны юрттӥз быдэс удмурт классикалы.

Цензураез куштэм бере (Закон РФ от 27 декабря 1991 года «О средствах массовой информации») удмурт прессалэн кутске выль периодэз. 90-тӥ аръёсы кылдо выль журналъёс: «Инвожо», «Вордскем кыл», «Ашальчи», 1999-тӥ арысен Вань удмуртъёслэн «Удмурт Кенеш» ассоциацизылэн газетэз ӟуч но удмурт кылын. Со газетлэн основной ужпумез луэ — калыклэсь асваланзэ будэтон, сям-йылолъёсты вӧлмытон, обществоын удмуртлэсь интызэ паськытатон, «Удмурт Кенеш» ассоциацилэсь финн-угор дуннеын
интызэ юнматон.

Нош Татарстан Элькунын Балтаси ёросын улӥсь удмуртъёслэн яратоно «Азьлане» газетсы потыны кутске 1934 арын. Валтӥсь редакторез вал Чакмин Николай Сергеевич.

Кема аръёс ӵоже 1980-тӥ арысен кутскыса 2009-тӥ арозь главной редакторлэн воштӥсез луыса ужаз Кунаев А.М. Сое воштӥз Васильева Г.К. Нош туннэ нуналэ та ужез быдэстэ Плотникова О.Ю.

Азьло аръёсы газетэз печатлаллям киын, нош али юрттэ компьютер.
Мон «Азьлане» газетэз пичи дырысеным ик яратыса лыдӥисько, али но солэсь уг люкиськиськы. Мылкыды лӧптэ ке вал, гожъяса сётӥсько вал адӟем карымон адямиос, шулдыр ортчытэм ужрадъёс сярысь. Соин валче заочно Удмурт кун университетын дышетскыкум но дипломной ужме газетэн герӟамы. Пуктэм ужпуммы луиз: эскероно ёросамы потӥсь «Азьлане» газетысь фольклорно-этнографической материалъёсты (йылолъёсты, сямъёсты). Макем соос потыло 1995-2005 аръёсы (дышетскыны пырим 2005 арын). Кыӵе инты басьто удмуртъёс сярысь статьяос, вань-а соослэн системазы? Кыӵе инты басьтэ «Азьлане» газет школаын дышетон-визьнодан ужын?

10 ар печатласькем газетэз эскерыса, сям-йылолъёсъя кӧня ке ужъёсты пусйи. Сям-йылолъёсъя ужъёс системая уг сётӥсько, календарьын радызъя мынэм праздникъёсты, сям-йылолъёсты газет трос уг печатла. Бырйи туж вашкала но тунсыко материалъёсты. Печатла мукет удмурт изданиосысь статьяосты, асьме палась удмуртъёслэсь одӥг-ог гинэ гожъямъёссэс пусйи : 31 январе 1998 арын 9 номераз Кургем гуртысь Лидия Губановалэсь «Сюан — концерт ӧвӧл со» гожтэмзэ, Сырья гуртысь Анна Сапожниковалэсь вашкала кырӟанзэ, В.П. Никитинлэсь бигер кылысь берыктэм кылбуръёссэ, Л.Д. Сапожниковлэсь «Удмурт шыкысысь ваньбуръёс» шуэм рубрикаысьтыз вашкала выжыкылъёсты, кудзэ газет печатлам 6 мае 1999 арын 35 номераз.

Адӟыны луиз, газетын кырӟанъёс тросгес печатласькиллям шуыса.

Та ужъё дипломной ужелэсь кыкетӥ люкетсэ кылдытӥзы.

Нош куинетӥ люкетын возьматӥ, газетын потэм кыӵе материалъёсты школаын уже кутыны луоно шуыса. Сям-йылолъёсъя ужъёс будӥсь егитъёс понна туж дуно «марӟан» выллем узырлык луо, кудъёссэ асьме палан улӥсь нылъёслы но пиослы дышетоно, улоназы пыӵатоно. Тодоно, чеберлыко кылоссыя ужъёс удмуртъёслэсь лулпушсэ возьмато. Соос ужез тодэм сяна, кырӟаны-вераны быгато, дунне вылын аспӧртэмлыко пытьы кельтыса улыны быгато шуыса.

Тӥни кӧня аръёс ортчиллям ни асьме палась удмуртъёс сярысь сюлмаськыса, соосты данъяса поттэм «Азьлане» газетлы но... Нырысь редакторлэн чылкыт малпанъёсыныз пачылмем уж туннэ нуналозь югдытэ ёросысь удмуртъёсты. Даурысен дауре, ог семья луыса кадь, ваче улӥськеммы бигеръёсын. Ужаськомы, малпаськомы ӵошен, улонын ӵошен вамышъяськом азьлань. Соосын ӵош асьме удмурт калыклэн но кылӥське ас кылыныз верам визьмоесь кенешъёсыз, малпанъёсыз, кырӟам кырӟанъёсыз. Котьку тазьы огазе улыса ӟеч улыны мед кылдоз асьмелы. «Азьлане» газет ёросын улӥсь удмуртъёслы туж дуно но яратоно газет. Малы ке шуоно котькинлы но аслазэз дуно но мусо. Аслад вордскем кылыныд лыдӟем материалъёс, ёросэдлэн улэменыз-ужаменыз тодматскон, маке но выльзэ шедьтон, гажано тыршись адямиос сярысь лыдӟыса тодон, соосын данъяськон мылкыд пыӵатон, ог-огед понна шумпотон кылдэ...

Табере «Азьлане» газетлэн ымнырыз но пуштросэз туж зол воштӥськиз ни, чеберскиз, будӥз. Сям-йылолъёсъя ужъёс трос уг ке но печатласько, тросгес лыдӟыны луэ удмурт гуртъёсысь тыршыса, ужаса улӥсьёс сярысь.

Только асьсэос, удмуртъёс, тросгес мед ыстысалзы вылэм тунсыко ортчытэм ужрадъёсты, дано адямиосты, визьмо верам малпанъёссы сярысь гожъяса. Соку газетлэн пуштросэз эшшо но узырмысал, умой луысал.

Редакциын ужась-тыршись нылъёслы сӥзем потэ азьланьын но пужалляськыса, асьсэ ужзэс, калыкез яратыса чебересь материалъёсын газетэз поттыны. Озьы ик, Вакиф Мансуровичлы но мур гажан мылкыдме вуттӥсько. Газетлэн 85 ар юбилееныз ӟечкыласько!

Учырен пайдаяськыса, ӟечкыласько ёросын улӥсь вань кадь калыкез. Огъя тупаса улыны но ужаны азьланяз сӥзисько. Та чебер но шулдыр, югыт дунне вылын шудо-шудбуро луыса, кема-кема мед улозы удмуртъёс, калыкъёс!

Нина Кумаева,
Ципья черкогурт.

Реклама
Нравится
Поделиться:
Реклама
Комментарии (0)
Осталось символов: