Хезмәт

Балтач районы

18+
2024 - Гаилә елы
Азьлане

«Азьлане» газетлы 85 ар

2019 арын, январь кутсконын 85 ар тырмоз Балтась районын удмурт кылын потӥсь «Азьлане» газетлы. Нырысь «Азьлане» нимаз потӥсь удмурт газет вылэм. Но Балтась район Арск районэн огазеяськем бере, 1962-тӥ арын бигер район газетлэн удмурт кылэ берыктэм газетэз луэм.

Удмурт газетлэн нырысетӥ редакторез

Балтась район 1930-тӥ арын кылдэ шуыса тодӥськомы. 1931-тӥ арозь район центр Тюнтерын луэ. Соку калыкез дышетонъя отделлы старшой инспекторе Николай Сергеевич Чакминэз тодмосто. Ӵапак со аръёсы Николай Сергеевич партилэн райкомезлэн бюроезлэн заседаниосаз районын удмурт кылын газет поттон сярысь ужпумез ӝутылэ.

Николай Сергеевич Чакмин вордске 1905-тӥ арын Вуж Кушкет гуртын. Куинь аресэн анайтэк кыле, но атаез но сюранаез Николайлы со дырлы тупась тодон-валан сётыны быгато. Школаез йылпумъяса кӧня ке ужамез бере, Можгаысь педтехникуме дышетскыны пыре. Татын дышетскыкуз Николай Чакмин матысен тодматске Григорий Медведевен, Михаил Коноваловен, Пётр Бурбуровен, 1926-тӥ арын педтехникумез йылпумъяса, Ципьяысь крестьян егитъёслэн школаязы (ШКМ) ужаны кутске. Соин ӵош отын ужаны кутско Иван Степанов (Средний Кушкет), Игорь Иванов (Сала Кушкет) но Пётр Афанасьев (Тылогурт). Та коллективын ик ужазы удмурт революционерлэн Максим Прокопьевлэн кышноез Евгения Васильевна Прокопьева, соослэн нылзы Людмила но пизы Геннадий. Тӥни сыӵе коллективын мытэ аслэсьтыз ужан сюрессэ Николай Сергеевич.

Район центр Балтасе выжем бере, партилэн райкомез удмуртъёс пӧлысь кивалтӥсь кадръёс бырйыны кутске. Райкомлэн инструкторъёсыз луыса ужаны кутско И. Демеева но А. Чегаев, Н. Чакмин — РОНО-ын, ВЛКСМ-лэн райкомаз — Г.Халтурин. «Азьлане» газетэз поттыны кутскон азьын Николай Сергеевич кӧня ке дыр ӵоже ужа Татарстанысь калыкез дышетонъя министерствоын (азьвыл Наркомпрос).

1933-тӥ арын 20-тӥ декабре ВКП(б)-лэн Балтась райкомез районын удмурт газет поттон сярысь постановление кутэ. Солы редакторе тодмосто Н.С. Чакминэз, кылкутӥсь секретаре — Г.Х. Халтуринэз. «Азьлане» газетлэн нырысетӥ номерез потэ 1-12 январе (шонер числоез тодмо ӧвӧл). Кык ӵошен соос селькоръёслэсь выступлениоссэс дасяло. Ачиз Николай Сергеевич отчы бадӟым статья гожтэ, отын со пыр-поч валэктэ газет азьын сылӥсь ужпумъёсты.

Удмурт шрифтъёс луымтэысь газет поттонын бадӟымесь шуг-секытъёс кылдӥллям. Нырысь букваосты бигер наборщицаос бичаллям, берлогес Ушмаысь, Лӧзяысь удмурт кадръёсты ӧтиллям. Н. Чакмин но Г. Халтурин котькуд удмурт гуртын селькоръёс мед луозы шуыса тыршиллям. Тужгес но мыло-кыдо селькоръёс луиллям Вуж Кушкетысь Иван Капралов но Василий Чакмин (Чакма Вася), Карек-Сермаысь Никитин, Тагашурысь Эшкеев, Кургемысь Иван но Григорий Халтуринъёс. Озьы ик гожъяллям Кукмор районысь селькоръёс но.

«Азьлане» газетэз поттонын тыршемез сяна, Николай Сергеевич бадӟым общественной уж но нуэ. Удмурт писательёсын юн кусыпъёс кылдытэ, со чотын Г. Медведевен но. Огшоры нуналъёсы газетын тыршиз, нош шутэтскон нуналъёсы гуртъёсы сюрес кутылӥз, селькоръёсын пумиськылӥз, ӟуч но бигер кылын гожтэмъёсты удмурт кылэ берыктылӥз, «Советской» Удмуртия» газетэ статьяос гожъяз. Коллективизация аръёсы калык пӧлын валэктон уж нуонлы но уно дырзэ висъяз со. Та сярысь книга гожтыны но малпам, гожтыны кутскем но. Но Сталинэз мултэс данъян аръёс кутскемен, вуоно книгаезлэн рукописьёсыз ышиллям. Ачиз кытчы ке но ватэм, дыр.

1937-тӥ арын республикаын потӥсь «Кызыл Татарстан» газетын асьме районын потӥсь «Югары унышка» газетлэсь ужзэ курлам бадӟым статья  потэ. Газетлэсь редакторзэ Рахим Хурматуллинэз отын пӧртэм ласянь курлало, янгыше уськыто. Кылсярысь, газетын зэм луисьтэм иворъёс печатласько, пе, ӝожтӥськыса гожтэм гожтэтъёс уг эскерисько, редакция райкомен ӵош рейдъёс уг ортчытъя, газетын печатласькем критической статьяослы ответ уг сётӥськы. Тӥни со статья потэм бере эскерон ужъёс кутско. Валамон ини, бигер газетлэсь редакторезлэсь ужзэ эскерон дыръя «Азьлане» газетлэсь ужамзэ но эскеро. Та эскерон уж быдэс ар мында кыстӥське. Вылӥын верамез сяна, Р. Хурматуллинлы но Н. Чакминлы трос пӧртэм мукет янгышъёсты но «ляко». Николай Чакминэз Удмуртиысь писательёслы уксёен юрттэмез понна, соосын кусып воземез понна янгыше уськыто. (Тодэммыя, удмурт гожъяськисьёсты «финн шпионъёсын» кусып воземзы понна янгыше уськытӥзы).

Тӥни со эскеронъёс бере, 1937-тӥ арын ноябрь толэзе,

Николай Чакминэз партилэн радъёсысьтыз потто. Сое ЦК-лэн 58-тӥ статьяезлэн 7-тӥ пунктэзъя янгыше уськыто, берлогес та статьяез 109-тӥ статьялы вошто но 1938-тӥ арын вить арлы пытсэт улэ пукто.

Николай Чакминлэн кузпалэз Екатерина Алексеевна Садакова (выжыезъя Ципьяысь) берлозэ соин 1939-тӥ арын сентябрь толэзе Казанысь Вахитов тюрьмаын пумиське. Соку Николай Сергеевич секыт висем ини, пумиськон но тюрьмалэн лазаретаз ортчем. 1939-тӥ арлэн пумаз Николай Сергеевич отын ик кулэм.

Тӥни озьы кысӥз районамы потыны кутскем удмурт газетлэн нырысетӥ редакторезлэн Николай Сергеевич Чакминлэн улонэз. Нош соку солы ваньзэ-ӧвӧлзэ 34 арес гинэ луэм. Улонэзлэн самой сяськаян дырыз, творческой ужъёсаз бадӟым малпанъёсын улон дырыз. Москваысь журналистъёслэн институтазы дышетскыны пырыны но вутскем вылэм ини со, районысь удмуртъёс сярысь книга гожтон малпанэн улэм.

Кызь ар ёрос мында ортчыса, Н.С. Чакминэз реабилитировать каро.

Александр Кунаев                                                           

 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: юбилей азьлане газет