Хезмәт

Балтасьысь делегация Калыкъёслэн Эшъяськон юртэ ветлӥз

1-тӥ южтолэзе Казаньын Татарстанысь удмуртъёслэн НКА-оссылэн 2016-2018 аръёс ӵоже ужамзылы йылпумъян лэсьтонлы сӥзем заседание ортчиз

Дышем сямъя, котькуд арлэн кутсконаз, кылем арлы йылпумъян лэсьтон но вуоноезлы быдэстоно ужъёс тодмостон вылысь Казаньысь Калыкъёслэн Эшъяськон юртазы бадӟым люкаськон ортче. Таяз учыре но та ужрадэ Балтась районысь делегация мынӥз — Ильгам Гайнутдинов, Владислав Никитин, Леонид Сапожников, Лариса Михайлова. Люкаськонэ пыриськизы интыысь автономиос (Татарстанъя соос 11 — Балтась, Кукмор, Менделеевск, Елабуга, Бавлы, Саба, Мамадыш районъёс но Казань, Нижнекамск, Набережной Челны городъёс). Озьы ик пумиськонэ вуизы Удмуртиысь куноос — Т. В. Ишматова, вань удмуртъёслэн «Удмурт Кенеш» мер огазеяськонзылэн тӧроез, Удмурт Элькунысь Кун Кенешлэн депутатэз; Л. Н. Буранова — Удмурт Элькунысь йӧскалык политикая министр. Пыриськизы на И. И. Шарипов — Калыкъёслэн Эшъяськон юртсылэн директорез, Татарстанысь Кун Кенешлэн депутатэз; Д. М. Мустафин — ТР-ысь Президентлэн пуш политикая департаментысьтыз йӧскалык политикаез азинтонъя управленилэн кивалтӥсез; Н. М. Владимиров — Татарстанысь калыкъёслэн ассамблеязылэн исполкомезлэн кивалтӥсез; А. С. Герасимов — Татарстанысь удмуртъёслэн НКА-зылэн тӧроез; М. А. Иванова — Татарстанысь удмуртъёслэн НКА-зылэн тӧроезлэн кивоштӥсез но трос мукет тодмо куноос.

Заседание дышем сямъя кык люкетэн ортчиз. Нырысетӥ люкетаз выступать каризы интыысь автономиос. Тӧрооссы, ортчем куинь ар понна йылпумъянъёс лэсьтыса, вакчияк выступлениос дасяллям вал. Огъя вераса, докладчикъёслэсь выступлениоссэс лыдэ басьтыса, таӵе йылпумъян лэсьтыны луэ: арысь аре интыысь автономиос тросгес но тросгес ужаны кутско. Удмуртъёслэсь сям-йылолъёссэс утён понна вань кадь удмуртъёс улӥсь районъёсын но городъёсын бадӟым ужъёс лэсьтӥсько. Ортчытӥсько пӧртэм фестивальёс, конкурсъёс, спорт ужрадъёс, пумиськонъёс, этнодискотекаос, этноадӟытонъёс... Асьме районын, кылсярысь, чебер традицилы пӧрмыса, удмурт компонентэн дышетскись Ципья, Шор Кушкет но Покчи Лӧзя школаосын бадӟым классъёсын дышетскисьёс пӧлын пумиськонъёс ортчытъяло. Та пайдаё ужрадэ Кукмор ёросысь Лельвиж шоръёзо школаысь дышетскисьёс но пырисько. Пиналъёс зэмзэ но та пумиськонэз витё — соос татын удмурт кылын верасько, удмурт костюм, сям-йылолъёс сярысь тодо. Нимаз нокыӵе районэз висъяса уг гожтӥськы, малы ке шуоно котькудаз аспӧртэмлыко, тунсыко ужрадъёс ортчытӥсько вылэм (тае интыысь автономиослэн тӧрооссы презентация пыр возьматӥзы). Кытын ке со егитъёсын ужам, кытын ке — мӧйыосын. Кызьы луиз ке но, ваньмыз ужрадъёс удмурт кылэз, удмурт лулчеберетэз утён понна радъясько. Озьыен, республикаысь НКА-ос калыкен бадӟым уж нуо, адямиосты удмурт лулчеберетэ кыскыны тыршо (ваньмы валаськомы, туала дыре та туж кулэ луэ шуыса).

— Гажано эшъёс, мон туж шумпотӥсько, туннэ та ужрадэ пыриськыны быгатӥ шуыса. Республикаын трос калыкъёс уло, но ми ваньзылы саклык но, дыр но висъяны кулэ. Удмуртъёс сярысь верано ке, пусйыны кулэ, та туж эшлыко калык шуыса, соос котьку лулчеберетсы, кылзы понна тыршо, со дыре ик соос позицизэс акыльтытэк вуттыны быгато. Берпуметӥ кӧня ке аръёсты басьтӥд ке, республикаын но республикалэн палэназ удмурт калыклы, удмурт кыллы сӥзем ужрадъёс туж трос ортчытэмын вал. Мон малпасько, сыӵе ужрадъёс удмуртъёсты огазеянын, герӟанын бадӟым инты басьто шуыса. Туала улонын со туж кулэ. «Мудорвай» конкурсэз гинэ басьтом — со трос калыкъёсты огазеясь конкурслы пӧрмиз ни, ми талы туж шумпотӥськом. Республикаямы трос фольклор коллективъёс. Та но удмуртъёс активной улонэн уло шуыса возьматэ. Туннэ ортчытэм собрание куинь ар ӵоже тыршыса быдэстэм ужъёстылы йылпумъян лэсьтоз шуыса малпасько, — вераз Данил Мустафин.

Заседанилэн кыкетӥ люкетаз пӧртэм юанъёсъя докладъёсын выступлениос кылзӥськимы. Кыл сётэмын вал Андрей Герасимовлы но Марина Ивановалы, озьы ик Татарстан Республикаысь удмурт егитъёслэн огазеяськонзылэн активистъёссылы. Ваньзылэсь тросгес выступать кариз Андрей Сергеевич — со вераз, 2016-2019-тӥ аръёс понна удмуртъёслэн НКА-зы кыӵе ужрадъёс ортчытэм, кыӵеоссэ ортчытыны кулэ луоз таяз аре.

— Малпасько, НКА-осмылэсь ортчем аръёсы быдэстэм ужъёссэс умоен лыдъяны луэ шуыса. Асьмеос докладъёсысен валамы ни: котькуд районын трос ужрадъёс ортчытӥсько. Ми но со паласен ӟеч ужамы шуыса вераны быгатӥсько. Котькуд ужрадэз ми тыршим рос-прос радъяны, мындалаез (количествоез) сьӧры ӧм уйиське, нырысь ик котькуд ужрадлэн ӟечлыкез сярысь малпаським. Шумпотӥськом, «Мудорвай» кадь конкурсъёсы удмурт нылпиос сяна мукет калыкысь нылпиос но пырисько шуыса. 2016-тӥ арын 315 нылпиос та конкурсэ пыриськизы ке, 2017-тӥ арын соос 829 луизы. Кылем арын ини сюрслэсь тросгес пиналъёс та конкурсэ пыриськизы. Сыӵе конкурсъёсы мукет калыкысь нылпиос но пырисько бере, соос удмурт лулчеберетэн тунсыкъясько шуыса вераны быгатӥськом, талы шумпотыны гинэ кыле, — шуиз Андрей Сергеевич, «Мудорвай» конкурслэсь кулэлыксэ валэктыса.

Ижкарысь вуэм куноос пусйизы, Татарстанын котькуд калыклы, котькуд нацилы кулэ уровеньын саклык висъяське шуыса. Озьы ик соос Татарстанын улӥсь удмуртъёслэн улонзылы синмаськемзы сярысь  веразы. Та кылъёсты юнматон вылысь Лариса Бурановалэн выступлениысьтыз одӥг люкетсэ гожтӥсько: «Бӧрдоно кадь, сыӵе шумпотӥсько тӥ понна. Малы ке шуоно, куинь ар куспын тӥ туж будӥды. Со адӟиське, со кылӥське. Ми туж данъяськиськом тӥледын (Татарстанысь удмуртъёсын — ред.). Тӥледлы ми котьку юрттыны но дась. Шумпотыса ӟечкыласько, сӥзисько ваньзэ умойзэ».

Зэм, берпуметӥ аръёсы Татарстанысь удмуртъёс асьсэды возьматыны кутскизы. Та нырысь ик Татарстанысь удмуртъёслэн НКА-оссылэн умой ужамзылэн бервылыз. Табере удмуртъёс но адско, трос нациё Татарстанысь мукет нациё калык пушкын уг ышо. Уг возьдасько. Шумпотымон, туннэ нуналэ Калыкъёслэн Эшъяськон юртазы трос егитъёс ужало. Соос пӧлын Балтась егитъёс но вань. Азьпалан но та егитъёслэн асьсэ калыксы понна тыршыны мылкыдзы медаз кысы, кужымзы медаз быры вал.

Ваньзы шуымон люкаськемъёс та нуналэ Татарстанысь удмуртъёслэн НКА-зылэн тӧроезлы, Андрей Герасимовлы, таукарон кылъёссэс вуттӥзы. Удмуртъёслэн трос выльдӥськонъёссы, азинсконъёссы вань шуыса шӧдӥське. Та ваньмыз Андрей Сергеевичлэн но солэн командаезлэн тыршем ужезлэн емышез. Соин заседаниын тӧролы нош ик Андрей Сергеевичез быръемлы нокин но ӧз паймы кадь.

 

Реклама
Нравится
Поделиться:
Реклама
Комментарии (0)
Осталось символов: