Хезмәт

Быдӟым тылож но нылпиослэн улонзы

Быдӟым тылож вакытэ, воргоронъёс оже кошкем бере, вань пӧртэм ужъёс песяй-бабайёс, нылкышноос но пиналъёс вылэ кылё, гуртын, фронтын кадь ик, туж секыт улон кутске.

Жугиськон кутскем бере ик Ципья школаысь ас мылкыдэнызы фронтэ кошко 24 дышетӥсьёс. Пӧртэм аръёсы бырыны шедё Наздеков Иван Павлович, Сидоров Алексей Андреевич, Афанасьев Пётр Афанасьевич, Захаров Михаил Иванович, Чакмин Василий Сергеевич.

1941 арын Овчинников Павел Тимофеевич оже кошкем бере, Ципья школаен кивалто нылкышноос: Каверина Мария Семёновна (1941-1942), Мейева Вера Николаевна (1942-1944), Вахрушева Мария Капитоновна (1944-1945), Булатова Зухра Фатыховна (1945-1946). Школаын дышетскон но мукет пӧртэмгес луэ. Лыдӟисьёслы со аръёсы Ципья школаын дышетскем Наздеков Анатолий Михайловичлэсь тодэ ваёнзэ вуттӥсько: «1939 арын, II Мировой война кутскем бере, сюлэмшугъяськыса, кышкаса улон кутске, ожмаськон гинэ медаз кутскы шуыса. Ми дюлтошъёсын шудӥськомы вал урамын, вестовой секыт но кышкыт ивор вайиз, жугиськон кутскиз шуыса.

1941 арын дышетскон кутскиз азьло кадь ик 1 сентябре. Тол со аре туж кезьыт вал, ми, школьникъёс, каждой нунал школае одӥг пис вайыны кулэ вал, классъёсысь гурез эстыны. Сӥзьыл, урокъёс бере, колхозлы юрттоно картка октыны, каждой семьялы норма сёто, сое одно ик быдэстоно. Милям семьялы, 6 адямилы, сёто вал 1,5 кг нянь. Зӥбыт валъёсыз фронтэ келяло, валъёс уг тырмо, соосыз пыд йылысьтыз погыртэ сютэм но чидантэм секыт уж... Арлы быдэ тулысысен бер сӥзьылозь кутьы возьмано, бусыын ужано, кут кутано... Сиён тырмытэк кынмем карткаез поттурынэн сураса сиён времаос вал соку. Шуг-секытъёсыз вормыны юртто вал таӵе лозунгъёс: «Тылын — фронтын кадь», «Ваньмыз фронтлы, вормонлы».

1942 арын Украинаысь эвакуированной дышетӥсьёс вуизы: Вера Николаевна Чернявская, Нина Петровна Борсук, Екатерина Степановна Гарагуля, Мария Ивановна Копосова. Мария Ивановна дышетӥз литератураен но пениен, первой кырӟан, кудзэ со дышетӥз луиз «Священная война». Классын борддорын ошемын вал бадӟым карта, кудаз дышетӥсь фашистъёсын басьтэм город шоры сьӧд флажок бышкалтэ вал, нош горд флажок — ку асьме солдатъёс городэз мозмыто. Урокъёсы ӵем ке бере кыльыса вуиськод, наряд сёто пу вандыны. Улон туж секыт ке но луиз, дышетскыны тыршимы. Уноез 7 классэз йылпумъям бере, дышетсконзэ ӧз ни азьланьтэ. 1942 арын 10-тӥ классын дышетскисьёс Наздекова Мария, Захарова Анисия но Морозова Мария ас мылкыдэнызы фронтэ кошко».

Ѓуч кылъя но литературая дышетэ Нина Петровна Борсук, со Западной Украинаысь, Чернигов городысь эвакуированной луэ. Солэн тодэ ваёнъёсысьтыз: «Ож вакытэ Ципья школаын ужазы 23 дышетӥсьёс: ӟучъёс, бигеръёс, удмуртъёс, украинецъёс но одӥг белорус. Каждой нунал урокъёс кутскон азьын линейкаын докладывать кароно вал, кин дышетскыны ӧз лыкты. Военрук, Дропченко Александр Анисимович, демобилизовать каремын вал ранениен, одӥг пыдыз протезэн, кык киосаз ик чиньыосыз ӧй вал. Ваньмы туж жаляськом вал сое. Али кадь син азям: нылпиос начар дӥсен, уноезлэн пыдъёсазы кут, сӥзьыл, ыштырзы (портянказы) медаз котмы шуыса, кут бордазы пулэсь кӧтырма (пу колодкаос) думо вал, нош эвакуированной пиналъёслэн — ботинкаос. Жаляса верано, кезьыт дыръя соослэн пыдъёссы туж кынмо вал. Секыт ужен, сютэм улыса нылпиос ӵем висьылӥзы. Каждой нунал школаын пӧзьтӥзы «болтушка» — пизен сурам ву. Ми сое дышетскисьёсын огазе туж ческыт потыса сииськомы вал... Чидано, улыны тыршоно, нылпиосыз воспитать кароно... 1943 арын Киевез фашистъёслэсь мозмытэм бере, шумпотыса бӧрдӥ, кык пиосы «Домой! Домой!» шуыса черекъяло. Тае верасько мукет поколение мед тодоз, мед валалоз, кыӵе шуг-секытъёс пыр потӥз асьме калык, осконэн, няньлы, каньыл улонлы дунъет сётыны быгатозы шуыса».

Быдӟым тылож вакытэ но, ожмаськон йылпумъяськем бере но нылпиослэн пельпумзы вылэ шуг-секытъёс пуксё. Нуныяськыса ӧз будэ, пичи сюлэм секыт улонлэсь шӧмзэ вала, киос могӟытозь, ньыльдылӥськытозь ужаны тупа соослы. Нылпиослэсь пичи дырысен ужаны кутскемзэс возьмато калык кырӟанысь таӵе чуръёс:

Сизьым арес мон луи но,

Черсыны косӥз мемие...

Укмыс арес мон луи но,

Алача ку, — шуиз мемие...

Дас кык арес мон луи но,

Геры кут, — шуиз мемие.

Улон эшшо но секыт луэ, огез бӧрсьы огез похоронкаос вуыны кутскем бере. Соос берпум осконэз быдто, куректон ваё. Туж трос юанъёс кылдо, кызьы азьпалан улоно, мар сиёно, маин гурез эстоно, нылпиосыз дӥсятоно, кызьы пыд йылазы султытоно. Наздеков Анатолийлэн тодаз ваемез: «Анайёс, песяй-бабайёс, дышетӥсьёс быгатӥзы чидантэм секыт пыр потыны, соос синвуоссэс нылпиослэсь ватыны тыршизы ке но, ми котьку шӧдӥськомы вал, кыӵе секыт соослы. Вормон нуналэз тодӥ возь вылын, кутьы возьмаку, шумпотон пумтэм вал».

Ож вакытэ трос нылпиослы, кудъёсыз вордӥсько жугиськон кутскем бере, атайёссэс адӟыны но уг кылды. Соку уноез анайёс трос нылпиен, киязы вож нуныен кылё. Кызьы соослэн сюлэмзы чидаз меда? Тодам вайисько Сидоров Геннадий Александровичлэсь бадӟым классъёсын дышетскисьёс но дышетӥсьёс азьын верамъёссэ. Со вордӥське 20 феврале 1942 арын, атаез соку фронтэ кошкемын луэ ини. Пиезлэсь вордскемзэ тодэ кузпалэзлэн Агафьялэн гожтэтысьтыз. Атаез пумтэм шумпотэ, гожтэтаз гожтэ таӵе кылъёс: «Мынам яратоно, мусо Агафьюшкае! Тау тыныд пи ваемед понна. Мон туж шудо. Ачимелэсь пимес возьма, тыршы, со мед улоз, со тынад азьпал улонад опора луоз». Та гожтэтэз анаез солы трос пол лыдӟе, атаезлэн гожтэм кылъёсыз солы наказ кадь луо. Зэм ик, со анаезлы пыкет луэ, апайёсызлы, аслаз Мария кузпалэзлы но вить нылъёсызлы. Со вера: «Урдсад атаед ӧвӧл бере, пулэсь автомат лэсьтӥсь но ӧвӧл, сыӵе рогатка но, кыӵееныз бадӟым пиос куакаосыз кышкато колхоз бусыез возьмакузы. Котьма верасал, пичи дыръя кызьы муш леказ, кӧня чорыг кутӥ... Огпол но уг вунэтӥськы, анай базаре мыныку, чебер туймеен дэрем басьтыны кури. Урамын анайлэсь бертэмзэ возьмасько, пумитаз бызисько, нош со сюлэмшугъяськыса вера, вакчиесь дэремъёс гинэ вань вал туннэ, чебер туймеосыныз ӧй вал, нош мукетъёсыз воксё туйметэк. Будэм бере ваньзэ валаськод вылэм, анайлэн соку дэрем басьтыны уксёез ӧй вал шуыса но. Анай вуриз дэрем, материал басьтыса. Уйбыт дораз пукыса вити, ӧй чида, умме уси. †укна кровать доры анай дэрем понэм, кудӥз мыным самой дуноез, чеберез вал, мон сое туж возьмаса нуллӥ. Сюлэмы шумпотонэн пачылме, Лиза апаелэсь семыке мыныны брюки басьтэмзэ тодэ вайыса но.

Ож бере секыт аръёсы ми, пичи пиналъёс, бусые, музъеме виям ю тысез бичаны ветлӥськом вал... »

Кӧня ке примерен гинэ, жугиськон дыръя но жугиськон быдмем бере будэм поколенилэсь улэмзэ гожтыса быдтод шат?!. Жаляса верано, улон сюресъёссы соослэн соку туж секыт луо. Нылпиос котьмалэсь кадырзэ валаса будо, азьпалан шуг-секытъёсты вормыса, гажамон но кужмо адямиос луо. Каньыл улон кутске. Азьпалан умой воштӥськонъёслы оскыса, ваньзэ чидаллям, только война гинэ медаз луы шуыса.

Али будӥсь поколенилы песянай-песятайзы вӧзы пуксьыса, шуныт киоссэс кутыса, шокамзэс шӧдыса, мусо кисыриё ымныр шоразы учкыса юалляськыны кулэ, кызьы ортче соослэн улон сюрессы. Ӵошатыны быгатыны кулэ, азьло сютэм но курадӟыса улонэз али дырысь тыр улонэн.

Али дыре куд-ог Западной государствоосын пӧртэм сямен фашизмез вормонын СССР-лэсь, асьме калыкмылэсь рользэ кулэстыны тыршо, асьмелы сётӥськоно ӧвӧл, асьме армия но калык котьку но вормись луылӥз. Вормон нуналэз арысен аре юн данъяны кулэ.

Екатерина Ракова

Вукогурт

Туспуктэм Сидоровъёслэн семья архивысьтызы. Сидоров Геннадий Александрович нырысетӥ радын анаеныз но бадӟым апаеныз артэ.

18.06.1941 ар. Ципья школаез йылпумъям егит нылъёслэн но пиослэн выпускной ӝытсы. Шор радын бурысен витетӥез со дырысь школалэн директорез — Овчинников Павел Тимофеевич. (Туспуктэм авторлэн архивысьтыз).

Реклама
Нравится
Поделиться:
Реклама
Комментарии (0)
Осталось символов: