Ципьяын ӟечлэсьтонлы сӥзем концерт ортчиз

Нимысьтыз ожгар операцие пыриськись воргоронъёсмылы юрттон ужрадъёсы аспалъёсмы кылем арысен мыло-кыдо пырисько ини: кин арбериен, кин уксёен — огъя вераса, кин кызьы быгатэ, озьы ик юрттэ. Ципья клубын ужасьёс но, волонтёръёслэн но мыло-кыдо гуртооссылэн юрттэменызы, кемалась ӧвӧл ӟечлэсьтонлы сӥзем (благотворительный) концерт радъязы. Люкаськем коньдонэн Ципья поселениысь нимысьтыз ожгар ужрадэ пыриськись воргоронъёсмылы (соос 19 кузя) посылкаос дасяса лэзизы.
Ӟеч ужлэсь кулэлыксэ валаса, ужрадэ Ципья гуртысь гинэ ӧвӧл, матысь гуртъёсысь самодеятельной артистъёс но, озьы ик Ципьяысь «Наз» центр, Ципья школаын дышетскись нылпиос, Балтасьысь ДШИ-лэн Ципьяысь филиалаз дышетскись пиналъёс пыриськизы. Огъя вераса, концертын 101 адями выступить кариз: 81 нылпиос но 20 бадӟымъёс. Пусйыны кулэ, концертэ мобилизовать карем воргоронъёслэн матысь адямиоссы ӧтемын вал. Соосты но вань люкаськем учкисьёсты Ципья поселенилэн главаез Азат Нотфуллин ӟечбураз, таукарон кылъёсын выступить каризы Пётр Чернов но Диния Валиева.
— Шумпотыса вераны быгатӥськомы, концертмы шулдыр ортчиз шуыса. Зал тыр люкаськем калык артистъёслы кичабонъёссэ ӧз жаля. Артистъёс но возьытэ ӧз усе: кырӟанъёсынызы, кылбуръёсынызы, эктонъёсынызы адямиослэсь сюлэмъёссэс бугыртӥзы. Фойеын «Подарок солдату» акция ортчытӥськиз — мылкыд карисьёс коробкаосы солдатъёслы кулэ луись арбериосты кельтылӥзы. Ципьяысь «Калыкъёслэн эшъяськонзы» музей адӟытон радъяз. Ужрад трос адямилэн юрттэменыз радъяськиз, но кӧня ке адямиосты нимысьтыз пусъеме потэ. Волонтёръёс Гулира Сабирова, Хилялия Мусина, Ципья школаысь дышетӥсьёс Миляуша Хрисанова, Ираида Романова, Алиса Зарипова, педагог-организатор Ирина Чупанова, директор Сайдаш Нурмиев. Малмыжысь куно луыса лыктэм артистмы но вань вал — Вадим Трухин. Со но учкисьёсмылы аслэсьтыз кырӟанъёссэ кузьмаз. Солы но, вань мукет артистъёслы но таукарон кылъёсмес вуттэммы потэ. Огъя луыса гинэ, сыӵе умой но пайдаё концерт радъяны быгатӥмы, — шуэ Ципья Лулчеберетъя юртысь устолыкъя кивалтӥсь Евгения Михайлова.
Концертын билетъёсты вузаса 21 сюрс 300 манет уксё люканы быгатӥллям, со сяна 7 сюрс 700 манет уксё благотворительёс нимысьтыз ящике понӥллям. Та люкаськем коньдонэн воргоронъёсмылы посылкаос (отчы соослы кулэ луись арбериос тыризы: сиён-юонъёс но, фонарикъёс но) келязы, нош со посылкаын, верам арбериос сяна, нылпиослэн сӥзёнъёсынызы гожтэтъёс но вал.
Туннэ нуналэ посылкаос басьтӥсьёссы доре вуэмын ини. Воргоронъёс матысь адямиоссы пыр посылкаос понна таукарон кылъёссэс но вуттӥзы — озьыен, ӟеч ужлэн бервылыз но вань ини.