Дано адямилэн дано сюресэз!

Адями улытозяз трос муртэн пумиське. Кудӥз ке пыраклы сюлмаз кыле, кинлэн ке верамъёсыз вӧськыл кадь виымаз кырмисько, кин ке ас вераськон манереныз синмаськытэ но гажамон адями луыса кыле. Озьы котькуд адями кыӵе ке аспӧртэмлыко мылкыдэн но малпанэн герӟаськемын. Сыӵеос пӧлы пыре Анастасия Степановна Прокопьева но — лякыт сямо но визьмо кышномурт. Со ноку но ассэ вылӥе ӧз пукты, оло, соин но, берпуметӥ сюресаз но сое сыӵе ик лякыт сямо адямиос келяны лыктӥзы.

Мон ӧй быгатысал кылъёсме сыӵе юн оскыса вераны, но ас дыраз солэн дышетэмез улсын ачим но улонын кулэ луись трос пайдаёзэ басьтыны быгатӥ. Шор Кушкет шоръёзо школаын дышетскыкум, биологиен милемыз солэн племянникез — Владимир Петрович — дышетыны кутскиз вал ни. Егит дышетӥсь ас дышетсконзэ азьланьтыку, Анастасия Степановна школаын гужем ортчись практикалэн кивалтӥсез луиз. Соку со милемыз дышетӥз, кызьы помидоръёсты шонер думылоно. Али но тодӥсько на солэсь кылъёссэ: «Котькуд будослэн вань аслаз улонэз, сое луло карыса учконо: со но шока, лыз инбамез адӟе, зорез шӧдэ, соин солэсь „мугорзэ“ но сак карыса учконо, возьмано». Со дырысен ик табере тодӥсько будослэсь дунзэ. Солэн кивалтэмез улсын, кыӵе узыр школа бакча-сад луэ вал! Кызьы жадьытэк сыӵе бадӟым интыез утялтыны вутске вал, паймымон. 

Дышетскисьёсыз понна сюлмаськись, зэмлыко но котьку пальышась ымныро — тазьы тодо сое гуртоосыз но ӵош ужасьёсыз. Небыт сюлмыз нылпиосты бордаз кыскиз, нош тодон-валанъёсыз паймытӥзы. Соин но со предметъёсъя дышетӥсь гинэ ӧвӧл, зэмос визьнодась но бадӟым эш луиз. Ӵош ужасьёсыз но сое котьку данъяськымон адямиен лыдъязы. Соос ӵошен котькуд ужрадъёсы пыриськизы, шулдыръяськизы, ӵошатскизы но ваньзы огазе вылезлы дышетскизы. Зэмос дышетӥсьёслэн коллективзы котьку ӵош вал. 

Дышетӥсьёс сярысь трос гинэ шуныт, небыт кылъёс гожтыны луэ. Котькудӥз соос пӧлысь тырше нылпиосты нырысь ик ӟеч сямо но шонер адями карыса визьноданы. Азьло дыръёсысь дышетӥсь сыӵе трос «кагаз» ужъёсын зӥбемын ӧй вал, вань дырзэ но кужымзэ дышетонлы но визьноданлы сётӥз. Озьыен, нылпиослэн но тодон-валанъёссы интыяз пуксизы, аръёс ӵоже ӧз ӵушиське.

Прокопьева Анастасия Степановна трос дышетскисьёслы улонэ «сюрес» усьтӥз. Кӧня нылпи меда потӥз солэн дышетэмез пыр?! Кӧня адями солэн паймымон дышетэмезлы синмаськыса, озьы ик ассэ дышетонлы сӥзиз?! Кӧня дышетскисьёсыз али данъяськымон врачьёс луо?! Ваньзэс соосты люкад ке, одӥг бадӟым гурт кылдытыны луысал. Жаляса верано, Анастасия Степановна ас понназ гинэ лушкем шумпотылӥз соослэн вормонъёссылы. 

Вордӥськиз вуоно дышетӥсь Сала-Кушкет (Кисаль) гуртын 15 тулыспалэ 1949 арын. Анаез — Мария Григорьевна — Вуж Кушкетысь нылаш, Быдӟым Атыкай оже пыриськемын, «За оборону Ленинграда» медален пусъемын. Атаез — Степан Михайлович — Кисаль гуртысь ик пияш, Курской дуга ожмаськонэ пыриськемын, пӧртэм медальёсын но орденъёсын пусйиськемын. Со туж визьмо, трос кылъёсты тодӥсь вылэм, вань гуртоосыз со доры пӧртэм гожтэтъёс но заявлениос гожъяны ветлӥллям. Тодматскиллям соос Семык возь вылын. Егитъёслэн тужгес но шулдыр но сяськаясь вакытсы. Яратон кусыпъёссэс герӟазы 5 кузя нылпиоссы Анастасия (1949), Елизавета (1951), Пётр (1955), Михаил (1958), Ольга (1963).

Шор Кушкетысь тямыс классэз йылпумъяса, дышетсконзэ Анастасия Ципья шоръёзо школаын азинтэ. Дышетскон солы капчиен сётӥське, ачиз но трос гинэ лыдӟиське, тунсыкъяське. Со туж визьмо луэ, ваньзэ йыраз кельтэ. 

— Куддыр, апаен но агаен жугиськыны ик вутско вылэм, — тодэ ваёнъёссэ вераз Ольга сузэрез. 

1966 арын со Шор Кушкетысь тямыс классъем школаын лаборантка луыса ужаны кутске. 1967 арысен та школаын ик географияя дышетыны басьтӥське. 1973 арын Удмурт кун университетысь химия-биология факультетаз дышетскыны кутске. Таланто но сюлмаськись дышетӥсьлы 1975 арын оско классэн кивалтонэз но, внеклассной но внешкольной ужъёсты радъянэз но. Та ӧнеръёсын со ассэ умой кивалтӥсен но ужрад радъясен возьматэ, соин ик 1979 арын солы директорлэн воштӥсезлэсь ужзэ оско. 1982 арын Шор Кушкетысь тямыс классъем школаез реорганизовать каро, со луиз Тюнтер шоръёзо школа. 

1983 арын трос ужъёс пыр потэм но ассэ дано возьматэм дышетӥсь Удмурт Элькунэ кошке. 1983 арын ик сое Завьяловской ёросысь Ленинской тямыс классъем школае химиен но биологиен дышетӥсе куто. 1984 арын ужан сюресэз вуттэ Подшиваловоысь шоръёзо школае, татын со химиен дышетыны кутске. 4 ар ортчыса, солы оско директорлэн воштӥсезлэсь ужзэ. 

Вордскем палъёсаз егит дышетӥсь 1992 арын берытске. Шор Кушкет шоръёзо школаын аслэсьтыз предметъёссэ ик дышетэ. Солэн дышетэм пиналъёсыз нимысьтыз мур малпаськонъёсын, рос-прос тодон-валанъёсын но улонын кулэ луись быгатонлыкъёсынызы висъясько. Соин ик ёрос, элькун олимпиадаосын котьку вормись но призо интыосын пусйисько. Дышетскисьёсыз но сётэм ужзэс дыраз быдэсъяло. Ваньмыз та Анастасия Степановналэн юн тыршеменыз но дышетскисьлы нимысьтыз саклык висъяменыз вуэмын.

— Апаймылы туж секыт но йӧтӥз, дыр, ини. Агаймы кышнояськиз, апаймы соослы люкетонтэм вылысь кошкиз Удмуртие. Малпаз вал, агаймы интыяськоз анай-атай юртэ. Но агаймы Балтасе кӧчиз. Анаймы висьыны кутскемен, апаймы берытскиз вордскем гуртаз, анаймес утялтыны но солы юрттыны. Со туж каньыл сямо вал, ваньзылы юрттӥз, ноку секыт кылын ӧз вазиськы, — синкыли пыр верало сузэръёсыз Лиза но Ольга.

Соос понна зэмзэ но та бадӟым ыштон луиз. Ольга Степановна но Елизавета Степановна ас улон сюрессэс озьы ик Удмурт Элькунэн герӟазы. Ас ужазы данъяськымон адямиос, эмтодос (медицина) удысысь ӧнерчиос. Апайзэс соос гажало, сюлэм вӧсь луэмзы вераськон пыр ик шӧдӥське. Матысь адямилэн кошкемез котькин понна секыт югдур, нокыӵе кылъёсын но валэктыны луонтэм вӧсь луон. Адӟиське, кыӵе тырттэм соослэн сюлэмзы но лулзы, кызьы отысь басьтӥллям кыӵе ке тылзэ.

— 2022 арлэн 31 куартолэзез ми понна самой кышкыт нунал луиз. Кызьы агаймы вера: «Бадӟым апай (озьы шуэ вал Анастасия Степановнаез Ольга сузэрез — ред.) мар ке ивор тодэм. Корка пыриз но бускель Ӟаны гуртысь дышетӥсьлы — Евгения Георгиевналы — жингыртыны кутскем. „Умой-а, Женя!“ — солэн берпуметӥ кылъёсыз луиллям. Телефон трубкаез усиз, пал кыл но ӧз вера ни».

Со нуналэ ик бертӥм гуртэ. Тани куартолэзе кык ар луоз ни гуртын улэммылы. Туж бадӟым ыштон та ми понна, ноку но ӧм малпалэ, таӵе дыр вуоз шуыса, — секытэн верало матысьёсыз.

Аслам тодэмея гинэ, трос вылӥ интыосын пукись адямиослэн нылпиоссы ветло вал Анастасия Степановна доры экзаменъёслы дасяськыны, тодон-валанъёссэс будэтыны, нокинлэсь куронзэ палэнэ ӧз кар, коньдон вылысь ӧз тыршы, котькуд нылпиез аслэсьтыззэ кадь дышетӥз. Солэн киыныз люкам альбомзэ учкиськод ке, сюлэм ик небӟе кадь, котькуд туспуктэм вылысен тон пыр учке кадь со. Солэн радызъя, лад-лад тырем альбомъёсыз паймыто, котькудӥз бадӟым инты басьтэ. Пальышась, фотогеничной, лачмыт гинэ кышномурт учке тон шоры туспуктэмысен, со — дано дышетӥсь Анастасия Степановна Прокопьева. 

— Самой тодэ кылись урокъёсыз вал солэн. Со туж яратылӥз секыт, юмок юанъёс сётылыны. Одӥг пол тодӥсько на химияя административной контрольноймес вань классэнымы кыклы гожтӥм. Соку быдэс классэнымы дораз ветлӥм, тодон-валанъёсмес будэтыны. Собере ваньмыз ас радызъя кошкиз, химиез но яратыны кутски, олимпиадае но мыныны луонлык кылдӥз. Сыӵе дышетӥсьёс Инмарен кузьмамын, дыр, — тазьы тодаз вае дышетӥсьсэ Юлия Тимофеева, кудӥз табере ачиз Шор Кушкет шоръёзо школаын англи кылъя дышетӥсь луыса тырше.

Дышетон сяна, со ассэ пӧртэм мукет ужъёсын но эскерыса вуттӥз: пӧртэм ӵошатсконъёсы, ужрадъёсы пыриськиз, сцена вылын кырӟаз-эктӥз, ёрос коллективе но пыриськиз. Котькытчы вутскись кышномурт!

Нылкышно шудзэ Анастасия Степановна ӧз шедьты ке но, солэн улоназ котьку оскымон пыкетъёсыз луизы — племянникъёсыз но сузэр-вынъёсыз. Владимир Петрович — ас дыраз озьы ик Ӟаны шоръёзо школаын биология но химия предметъёсын дышетӥз. Туннэ нуналэ мукет ӧнере выжиз. Ас семьяеныз со улэ Балтасьын ик. Екатерина Петровна семьяеныз улэ Ижкарын, ужа эмтодос удысын. 

— Туннэ нуналлы мылкыд ӝутӥсь инъетмы ӧвӧл ни. Со ми понна анай интыын вал. Адямилэн секыт кыло но сӥялэс мылкыдо луэмез таӵе югдуре вуттӥз, малпасько. Кӧня гуртоослы со юрттӥз, кӧня нылпиосты экзаменъёслы дасяз, кӧня ӟечсэ со лэсьтӥз, нокинлы чурыт кыл но ӧз вера. Тросэз сыӵе бадӟым юрттэт сётэмзэ, жаляса верано, вунэтӥзы. Со сяна, солы туж секытэсь иворъёс но кылъёс веразы. Апаенымы сыӵе секыт югдур луэм дырысен, ужан сюрессэс кутскем дышетӥсьёс гинэ тунсыкъяськизы, Ӟаныысь Антонида Васильевна но Кисальысь ик Галина Алексеевна котьку валче вал. Иван Васильевич но мукет дышетӥсьёс телефон пыр юалляськизы. Тау шуэме потэ, кин лыктӥз, кин юрттӥз, соос ӧжыт вал ке но, самой матысь луизы. Адямиез гажано, куке со улэп на. Ужъёсыз сярысь телефон пыр ке но юалляськид ке, адямилэн мылкыдыз ӝутӥське ук! Туж куректӥсько дыраз ёрос больницаын но, гуртын но, поселенилэн кивалтэтэз но юрттэт ӧз сёты, ӧз тунсыкъяськы улонэныз, — кӧтӝожъёссэ кисьтэ сузэрез. 

Зэмзэ но, гуртын улон — со адямиослэн валче тыршыса но ог-огзылы юрттыса улон. Вашкала дыре семьялэсь но матын бускелез адӟизы. Котькыӵе праздникъёс луизы ке но, азьло ик бускелез ӧтизы, кыӵе ке секыт учыр — озьы ик бускель юрттӥсь луэ. Малы адямиос сое шӧдтэк шорысь вунэтӥзы? Малы пиналъёсты арлыдоосты гажаны ум дышетӥське? Кыӵе адями луыса будозы азьпал поколенимы?! Та юанъёс сюлмаськыто, валэктонъёс кышкато, мар луоз азьпалан...

Но асьме дано дышетӥсьмы ас улонзэ чылкыт но шонер сюрестӥ гинэ ортчиз. Солэн серекъямез, ӟеч кылъёсыз, лякыт сюлэмез котькуд адямилэн тодэ ваёнъёсаз кылёзы. Оскон кылдэ: макем трос ӟеч ужъёс лэсьтэ улоназ адями, сокем сопал дуннеын но солэн улонэз капчи но шундыё луоз. 

Ӟеч кӧлэ, Анастасия Степановна... Нылпиос азьын тыршемды, адямиос понна сюлмаськемды но лэсьтэм ужъёсты лыдъянтэм трос! Сопал дуннеын улон сюресты но ӟеч адямиосын гинэ мед герӟаськоз! Быдэстэм ужъёсты понна музъемозь йыбырттӥськом но пумтэм тау кариськом!