Дуннеез котыртыса но уд шедьты

Та праздниклэн аспӧртэмлыкез луэ анайёсмес «Ана даны — Материнская слава» медален  пусъён. Шумпотымон, районамы Татарстанлэн дано кузьымезлы тупамон муртъёс вань. Та юнматэ, районамы синмаськымон семьяос уло шуыса, куинь но солэсь уно нылпи вордэм анайёсмы адӟем карымон луо, обществолы пайда вайись пиосты но нылъёсты будэто.

Терентьевъёсын кылдытэм семья кусыпъёс гуртооссы, бускельёссы, ӵыжы-выжыоссы но эшъёссы понна адӟем карымон луо. Со кусыпъёс яратон но ог-огдэ валан вылэ пыкъясько. Та туж эшлыко семья Ӟаны гуртын улэ. Нина Николаевна но Василий Степанович Терентьевъёс ас нылпиоссылы котыр дуннелы яратон мылкыд, арлыдо поколенилы гажан пыӵато. Та семьяын котьку нырысетӥ интыын зэмлык, ӟеч сямо луон сылэ. Нина Николаевналэн картэз Василий Степанович Ципьяысь жилищно-коммунальной хозяйствоын ужа. Со семьялэн адӟем карымон главаез: яратӥсь кузпал, ӟеч сямо атай но быдэс семьялэн пыкетэз. Василий Степанович котькыӵе ужын кузпалэзлы юрттэ, нылпиоссылы но пример луэ.

Александр, Олег, Юрий, Юлия но Василий нылпиоссы котьку но анай-атай яратонэн котыртэмын. Бадӟымез пизы, Александр, умой тодон-валан басьтӥз, армиын служить кариз. Покчи вынъёссэ но сузэрзэ визьноданы но юрттӥз. Александр ужез гажась егит воргорон. Кузпалэныз Кирилл пизэс будэто. Олег, армиын служить карыса бертэмез бере, Казаньын исправительной колониын прапорщик луыса ужа. Со пыр-поч малпаськись, дисциплинированной адями, ӵошен ужасьёсыз но сое гажало. Туэ гужем кузпалъяськиз. Куинетӥез пизы, Юрий, каньыл сямо, возьдаськись егит мурт, но со дыре ик аслыз но мукет муртъёслы со вылӥ куронъёс пуктыны быгатэ. Ципьяысь жилищно-коммунальной хозяйствоын машинист-экскаваторщик луыса ужа. Ужын со ассэ кылкутӥсь но ужез гажась луэмзэ возьматэ. Юлия нылзы 10-тӥ классын, Шор Кушкет школаын дышетске. «5»-лы гинэ дышетскемез сяна, нылаш мыло-кыдо пыриське пӧртэм конкурсъёсы но внеклассной ужрадъёсы. Со улонэз яратӥсь нылмурт, бадӟымъёслы но огъёзоосызлы но котьку гажанзэ возьматэ. Покчи Василий пизы 7-тӥ классын дышетске. Со анай-атаезлэн юрттӥсез луэ, яратыса быдэсъя юрт котырысь ужъёсты. Василий туж усьтэм мылкыдо но вераськись, арлыдоосын но ӵош дышетскисьёсыныз со ассэ туж лякыт возе. Ачиз Нина Николаевна — яратӥсь анай. Нылпиоссэ уте, сюлмаське соослэн тазалыксы сярысь, соослэн нравственной, духовной но мугор кыданзы сярысь. Со «Дуслык» обществоын фермалэн заведующиез луыса ужа, Татарстан Республикаысь сӥё-дано пудо утисьлэсь нимзэ нуллэ, «Ужын вормонъёсыз понна» медален пусъемын. Нина Николаевна сярысь шуо, секыт дыръя со котьку адямиез валалоз шуыса, юрттэт кизэ мычоз. Терентьевъёс бадӟым хозяйство нуо, пудозы уно. Озьы ке но вуо таза улон сям нуыны — пӧртэм культурной ужрадъёсы пырисько, инкуазе потаны ярато. Со сяна, Нина Николаевна вутске керттӥськыны но пужыятӥськыны. Улонын люкам опытэныз но визьмыныз, анай яратонэныз но шунытэныз Нина Николаевна котьку шедьтэ секыт югдурысь потон сюрес. Гуртоосыз пӧлын но, ужаз но сое гажало.

Нош трос нылпиё Арыковъёслэсь семьязэс адӟем карымонэн лыдъяло Дурга гуртын. Куамын ар ӵоже соослэн семья улонзы яратонэн но ог-огдэ валанэн юнмам. Анайзы Роза Сагделисламовна Арыкова али дыре кык ужын тырше: Дургаысь культура юртын утялске но гуртысь магазинын вузкаре. Ӟеч сямо, яратӥсь но яратоно нылпиослэн анайзы, оскымон кузпал картэзлы, со котьку сюлмаське нылпиоссылэн тазалыксы, лулпуш узырлыксы сярысь. Борис Тихонович Арыков «Активистын» шофёр луыса ужа. Семьялэн главаез адямиослы пример луэ: со ужез яратэ, кылкутӥсь, валась, ӟеч сямо, но со дыре ик чурыт кариськыны но быгатэ но туж яратэ кузпалзэ но нылпиоссэ. Бадӟымез нылзы Алёна кузпалэныз но пиеныз Казаньын улэ, Людмила нылзы Казаньысь информационной технологиосъя техникумез йылпумъяса, Казаньысь одӥгаз почта ёзэсын связья оператор луыса ужа. Денис пизы, армиын служить карыса, 2018 арлэн августозяз монтажник луыса ужаз, али дыре анай-атаезлы юртъер котырын юрттэ, мыло-кыдо спортэн выре, егитъёс пӧлын сое гажало. Татьяна нылзы Казаньысь лэсьтӥськонъя колледжын кыкетӥ курсын дышетске. Тыршись, котькуд сётэм уж шоры кылкутыса учкись нылаш. Со сяна, ки кужымез мертанъя Россиысь спортъя мастере кандидат луэ. Вероника нылзы Ципья школаын, 7-тӥ классын дышетске, озьы ик туж активной нылмурт, умой дышетске, пыриське пӧртэм конкурсъёсы но ужрадъёсы.

Эшлыко луон, ог-огдэ валан, ог-огед понна кыл кутон — Арыковъёслэн семьязылэн инъетсы. Татын арлыдоослэн ужзы шоры гажаса учкон сямез пыӵато, аслыд но ужез яратыны дышето. Семьялэн ас хозяйствоез вань. Пудоез утьыны нылпиос но юртто. Озьы ик нылпиос дышетско арлыдоосты, анай-атайзэс гажаны, лулчеберетэз. Котькыӵе шуг-секытъёсысь потыны сюрес соос ваньзы ӵошен, кенешыса шедьто. Нылпиос котьку шӧдо дорзылэсь шунытсэ. Роза Сагделисламовна усто кузёкышно но анай, нылпиос понна со ваньзэ лэсьтоз, улонын соос адӟем карымон адямиос мед луозы шуыса, вань шунытсэ соослы сётыса тыршоз.

Котькуд нылпи анаезлы дуно, шуиськом. Котькуд анай но нылпиез понна дуно мед луысал! Та праздник анайёсмылэсь сюлэмзэс мед шумпоттысал.