«Дуслык» обществоысь адӟем карымон комбайнёр

Сала Кушкетысь механизатор Олег Павлович Яковлев ӵукна вить часысен пыд йылаз. Султэ, мисьтаське, сиське но ужаз дыртэ — «Дуслык» обществоын тырше со. Гаражысь мар ке кулэ луыку (воштос ёзъёс, техникаез тупатоно луиз ке, тракторез (комбайнэз) куддыръя гараже кыле яке кыӵе ке мукет мугъёсъя) нырысь отчы вамыштэ, кулэ ӧвӧл ке — соку ик бусые кошке. Отын, бусыын, сое тракторез яке комбайнэз вите ини. Собере, техника радын шуыса валамез бере гинэ, ужаны кутске. Октон-калтон дыръя котькуд шуымон нуналэз Олег Павловичлэн озьы кутске вылэм. Ма, али но, тулыс, ужъёсыз кулэс ӧвӧл. Озьы ик вазь султыса, со бусыын ужа.

— Мон егит дырысен колхозын ужай, школаез йылпумъям дырысен. 2003-тӥ арысен пӧртэм ужъёсты быдэсъясь (разнорабочий) луыса, 2005-тӥ арысен комбайнёрлэн юрттӥсез луи (атае но колхозын тыршиз, солэн юрттӥсез вал). Соку солы кутсаны юрттӥ, малы ке шуоно атае ю кутсан комбайнэн ужа вал. Кӧня асме тодӥсько, мынам но, атае кадь ик, комбайнэн ужаме потӥз. Атае мон понна пример луиз. Нош ини 2008-тӥ арын ачим комбайн сьӧры пукси. Ӵапак соку милемлы («Дуслык» обществое — ред.) выль «Полесье» комбайн вайизы, — вера асэныз тодматыса механизатор. — Огъя вераса, колхозын пӧртэм ужъёсты ужаса ути ини. Но техникаен ужаны мон понна самой кельшымонэз луиз. Ини 12 ар ӵоже комбайнэн ужасько. 

«Полесье» комбайнэн Олег Павлович зэмзэ но кема ужа вылэм ини. Нош 2013-тӥ арын тыршись но куара кылзӥсь механизаторлы эшшо одӥг техникаез оско — «Ягуар» комбайнэз. Котькуд техникаез механизатор аспӧртэмлыко шуэ. Котькудӥзлэн, пе, аслаз плюсъёсыз но минусъёсыз вань. Котькудӥныз но, тыршид ке, трос ужаны но вормонъёсы вутскыны луэ, пе.

— Бен, — юасько, — мӧзмыт ӧвӧл-а ужаны? Котькуд нунал руль сьӧрын. Тужгес но гужем, пӧсь куазен, куке бусыын ӟырдыт ужъёс мыно, нышырлы сиськыны дугдыны но дыр уг луы. Вылаз ик весь бусы но бусы, тузон...

Трос вераськисьтэм механизатор, кема малпаськытэк, ответсэ сётэ: «Куке ӟырдыт ужъёс мыно, мӧзмон сярысь малпаськыны дыр но уг луы. Ужаськод но ужаськод». Кызьы ке но сое вераськытон понна, шуак йырам лыктэм юанме сётӥсько.

— Кылэме вань, техникаен ужаку опытэн механизаторъёс кабинаязы воксё музыка но, радио гинэ но уг кылзӥсько вылэм шуыса. Техникалэн куараезъя ужлэсь кызьыгес мынэмзэ валаны луэ, пе. Техникаез гинэ, пе, кылзӥськоно ужаку. (Кытысен мон тае тодӥсько?). Та зэм-а? Тӥ музыка кылзӥськиськоды-а ужакуды?

Олег Павлович ӧжыт серекъя но валэктыны кутске.

— Зэм, озьы ик, дыр. Музыка туж ӵем уг кылзӥськы ужакум. Кылзӥськи ке но, куаразэ кужмо уг кариськы — мар луиз ке но, музыка ужъёслэсь палэнэ карыны кулэ ӧвӧл водителез. Зэмзэ вераса, мылкыдъя луэ со — музыка кылзӥськон. Куддыръя музыка воксё кылзӥськем уг поты.

Валамон: бусыын комбайнёръёслэн воксё шокчыны но дырзы ӧвӧл, лэся. Кыӵе ини отын крезьгур кылзӥськон. Гужем гинэ но ӧвӧл — ар ӵоже но уж шеде соослы. Али но тани Олег Павлович ужаз тырше — гусеничной тракторен ужа, тулыс ӵем дыръя усыясько, пе. Куинь комбайнёръёс (веран сямен, куиньназы ик комбайнёръёс удмуртъёс вылэм, вылаз ик ваньзы Кисаль гурт пиос) котьку огъя ужало, куспазы тупаса, ог-огзылы юрттыса.

Кылем арын сенаж тырыса азьмынӥсьёслэн радазы потэм Олег Павлович. Соин механизаторез «Азьмынӥсьёслэн слётазы» пусйизы. Но ассэ ушъяса верамез ӧз поты востэм воргоронлэн. Ми, пе, ваньмы но тыршыса ужаськомы. Куспамы, пе, ӵошатскеммы ӧвӧл. Котьку ӵош. Ваньзы одӥг гуртысь бере, ужаны но ӵош ветло. Бертыны но ӵош. Ӝыт. Гужемзэ уйин но бертыны быгато — ужез кельтыны уг луы ук.

Нош дораз Олег Павловичез вите семьяез. Кышноез Ольга но кык пиосыз — Артём но Денис. «Соос понна ик тыршыса ужасько», — шуэ воргорон.