Хезмәт

Гуртъёсын зэмос, таланто, быгатӥсь нылкышноос уло

Малпасько, котькудмылэн та чуръёсты лыдӟеммы бере син азямы асьмелэн вордскем шаермы пуксёз, дыр. Нюлэс, бусы, нюкъёс, ошмес... Ваньмыз соос асьмелы, гуртын улӥсь адямиослы, матын но дуно.

Гурт шоры ке мон потӥ ке,

Гуртэлы синмаськисько.

Ву дурады ай васькыса,

Ву куараез кылзӥсько.

Ошмесэ ке мон пыри ке,

Кезьыт вуэз юисько.

Кезьыт ошмес вуэныд

Сюлэмме буйгатӥсько.

Арамае ветлыса но,

Уӵыез мон кылзӥсько.

Уӵы чирдон ай дыръяд

Егит дырме малпасько.

Тэльёсы ке мон ветлӥ ке,

Кикыез мон кылзӥсько.

Нюк бамысь узы-борыедлэн

Ческытэзлы паймисько.

Возьвылъёсы ветлыса но

Сяськалы синмаськисько.

Ят шаере ке мынӥ ке,

Гуртэлэсь мон мӧзмисько.

Яратӥсько мон шаерме.

Вордӥськем но ай гуртме.

Гажасько мон гурт калыкме,

Вордӥськем но музъемме.

Малпасько, котькудмылэн та чуръёсты лыдӟеммы бере син азямы асьмелэн вордскем шаермы пуксёз, дыр. Нюлэс, бусы, нюкъёс, ошмес... Ваньмыз соос асьмелы, гуртын улӥсь адямиослы, матын но дуно. Та чуръёс котькуд гуртлы тупало ке но, соослэн асьсэ «кузёзы» вань — со Кӧргем гурт. Малы ке шуоно та чуръёслэн авторзы, Полина Валентиновна Поликарпова, Кӧргем гуртысь луэ. (Гожъяськыны со туж усто, котькуд ужрад сярысь соку ик кылбур гожтыса сётыны но быгатэ).

— Милям гуртамы номыр но ӧвӧл ни... Клубез но, магазинэз но, колхоз но... Озьы ке но вордскем гуртмы туж мусо, туж чебер потэ, — шуэ Полина Валентиновна.

Гурт нылкышно котьку сямен ужась, тыршись мурт но, кузё кышно но, анай но луэ. Со ноку дуно кузьымъёсты, ушъянэз уг утча, уг витьы. Та чуръёс Полина Валентиновналы но тупало.

Полина Валентиновна Кӧргемын 1960-тӥ арын вордске. Со аръёсы гуртазы али покчиёзо школазы но ужам, соин покчи классъёсын дышетскись нылпиослы гуртазы дышетскон понна ваньмыз луэм. Шор классъёсы Полина Ципья школае дышетскыны выже ни.

— Дышетскыны умой дышетски мон, — тодаз вае нылкышно. — Али кадь тодӥсько —  школаез йылпумъяме бере мынам туж географиен дышетӥсьлы дышетскыны мынэме потӥз. 

Но кылдымтэ. Нырысь Полина Казаньысь вузкаронъя колледже пыре но, отын сизьым нунал гинэ дышетскыса, Ципьяе бертэ (та колледжын дышетскон солы кельшымтэ, «сюлмы ӧз кыскы» шуэ ачиз героиня — Н.Ж.). Ципьяын кутам арбериосты лэсьтонъя фабрикаын ужаны кутске. Татын одӥг ар корзинкаосты керттэ но выльысь дышетскыны пырыны малпа. Озьы Полина Мензелинск городэ медучилищее фельдшер отделение вуэ. Сое со кык но ӝыны ар дышетскыса горд дипломен йылпумъя но нош ик вордскем палъёсаз берытске. Медицинской образованиез луэм бере, Полина Валентиновна 1980-тӥ арын Улисьял гуртысь медпунктын ужаны кутске. Со арын ик Кӧргем пилы, Валерий Семёнович Поликарповлы картлы кошке.

Кык ар ужамез бере декретэ «шутэтскыны» потэ, солэн Виталий пиез вордске. Декретэ шутэтскыны потэ шуыса вераны шонер но ӧвӧл, дыр, малы ке шуоно одӥг толэзьскын Полина Валентиновна нош ик ужаны кутске — Кӧргем гуртысь медпунктэ фельдшер кулэ луэ. 1985-тӥ арозь медпунктын ужа. Собере гуртысьтызы парсь фермаязы ветработник луыса ужаны кутске. Татын ужакуз 1990-тӥ арын кыкетӥ пиез, Иван, вордске. Кыкетӥ пизэ ваем бераз но 12 (!) нунал гинэ дораз пуке но, ужаны потэ. Та ужын ини со пенсие потытозяз, 2015-тӥ арозь, тырше.

— Ми бадӟым семьяен улӥмы бере, нылпиосмес утьыны семьяын котьку адями шеде вал. Мон анайзыен кызь кык ар ӵоже улӥ, со 2002-тӥ арын кулӥз, 1994-тӥ арозь али анайзылэн анайзыеныз валче улӥмы. Тӥни ма быдӟа семья вал милям, — шуэ Полина Валентиновна. — Соин нылпиос понна сюлмаськытэк, ужаны ветлыны быгатӥмы.

Со сяна, гуртын котьку пудо но утиллям... «Пенсие потыса но, пудо вордӥськомы али. Скалъёсмы вань, парсьёс, кунянъёс, ошакъёс... Гуртын сотэк уг луы». Кӧргемын нокыӵе каньыллыкъёс ӧвӧл ни шуыса уг уло вылэм, асьсэос шулдыръяськон программа малпало: куасэн ветлыло, концертъёсы пырисько, удмуртэн но, бигерен но кырӟало-эктыло.

— Пичи гуртын улӥськомы шуыса, тэк пукыны уг луы. Мар ке но кароно, выроно. Асьмеос данъяськыны кулэ, сомында калыкен валче шулдыр улыны быгатӥськомы, ог-огмылэн кылъёсынымы вераськиськомы шуыса. Пиналъёс, егитъёс мед валасалзы, туж умой дауре уло шуыса. Соослы вань луонлыкъёс кылдытэмын: анай кылзэс дышетскыны быгато, со котьку озьы луымтэ ук. Асьме кылмы гуртъёсын но, городъёсын но вӧлмон понна асьмеос тыршыны кулэ, ваньмыз асьме киосамы, — вера Полина Валентиновна.

Паймымон нылкышно та Полина Валентиновна. Зэм, со гумырез ӵоже гуртын улэ, арнялы быдэ киноосы но театръёсы уг ветлы, трос секыт гурт ужъёсты адӟе. Но со ассэ туж шудо нылкышноен лыдъя. Солэн матысьёсыз дораз, гуртаз юлтошъёсыз вань (улӥын одӥгзэ юлтошезлы сӥзем кылбурзэ ӵектӥськом), нылпиосыз Казаньысь куное бертыса уло. Одӥг кылын вераса — улонэз удалтэм.

 

Эшелы

Сьӧд йырсиё Васи пиед

Чебер нылэз синйылтэм.

Тоня шоры учкыса со

«Со мынам луоз» — шуэм.

Починка гуртэ мыныса

Лушкаса сое вае.

Тоня нимо ай нылэз

Пыраклы аслыз каре.

Тоняен Васиосыд

Туж ужась-тырыш луо.

Юртъерзэс ай лэсьто,

Колхозын но туж тыршо.

Огез сьӧры огез бӧрсьы

Куинь нылпиоссы вордско.

Яратыса, дышетыса

Пизэс-нылзэс будэто.

Аръёс сьӧры аръёс ортчо.

Дауръёс озьы ортчо.

Ньыльдон-витьтон аресъёсыд

Туж ик бен ӝог ортчо.

Тоня, Тоня, Тоня, Тоня,

Тоня — матысь юлтоше.

Яратыса, шумпотыса,

Со мынам оскон эше.

 

Реклама
Нравится
Поделиться:
Реклама
Комментарии (0)
Осталось символов: