Хезмәт

«Инмарен сётэмзэ улэме потэ ай», — Серафима Михеева

Зэмзэ но, юбилярлэн дышетон удысэ пыртэм люкетэз туж бадӟым, малы ке шуоно Серафима Михайловна школаын 38 ар ужам. Со быдэсак ассэ нылпиослы сӥзем — аслазъёсызлы но, мурт нылпиослы но. Тани 40-тӥ арзэ ини со дано шутэтсконын луэ. Туннэ нуналэ дышетскисьёсыз асьсэос но пенсиын ини, жаляса верано, куд-огъёсыз воксё та дуннеысь кошкемын...

30 мартэ Ципьяын улӥсь Михеева Серафима Михайловналы 95 арес тырмиз.

Серафима Михайловна 1924-тӥ арын Хлебников ёросысь Ведерники гуртын (туннэ нуналэ Марий Эл Республикаысь Мари-Турек ёросын) вордске. «Мариец» стеклозаводын сизьым аръем школаез йылпумъяса, со Арчаысь педучилищее дышетскыны пыре. Сое йылпумъям бераз, егит Серафима бигер Арбор гуртын ӟуч кылъя но литературая дышетӥсь луэ (1942-1946-тӥ аръёс). Василий Степанович но, Серафима Михайловналэн кузпалыз, Марий Элысь вал, Тюнтер школаын военрук луыса ужам (кулэмын ини). Кузпалъяськемзы бере егитъёс Ципья школае ужаны выжо. Татын кузпалъёс трос аръёс ӵоже, дано шутэтсконэ потытозязы тыршо.

Михеевъёслэн ньыль нылпиоссы пӧлысь куинез анай-атайзылэн пытьыостӥзы вамышто но дышетӥсьёс луо.

— Мон шумпотӥсько, нылпиосмылы адӟем карымон визьнод сётыны быгатӥмы шуыса. Эшшо шумпотӥсько, дышетӥсьлэн ӧнерезлы яратон мылкыд пыӵатыны быгатӥмы шуыса. Улонмы капчи ӧй вал, уг ватӥськы. Но нылпиосмы котьку дорамы вал, котьку юрттыса улӥзы. Али но со озьы. Тани мынам ньылетӥ арзэ ини синъёсы уг адӟо, соин муртлэн юрттэмезтэк улыны уг быгатӥськы. Со юрттӥсь муртъёсы — матысь адямиосы, мынам семьяе — Алевтина нылы, Равиль эмеспие, Рамиль внуке. Соос монэ одӥг но кур уг каро, Инмарлы тау, — шуиз юбиляр.

95 арес — кузь гумыр. Таӵе бадӟым юбилейзэ пусйыны, одӥг даурлы матэ луись улон сюресэз ортчем Серафима Михайловналэн матысь адямиосыз — пиосыз-нылъёсыз, кенъёсыз-эмеспиосыз, внукъёсыз бадӟым но узыр ӝӧк сьӧры люкаськиллям вал. Районысь исполнительной комитетлэн кивалтӥсез Айдар Хайрутдинов, социальной дурбасьтонъя отделлэн кивалтӥсез Алсу Гатиятуллина, Дышетон управлениысь представитель Резеда Гаязова юбилярлы Россилэн Президентэзлэсь ӟечкылан открытказэ но районысь администрацилэсь Таукарон гожтэтсэ вуттӥзы. Ципья гурт поселенилэн главаез но Ципья шоръёзо школалэн директорез шуныт ӟечкыланъёссэс вераса, дышетон удысэ бадӟым люкет пыртэмез понна тау каремзэс вуттӥзы.

— Тӥ кадь адӟем карымон дышетӥсьёсын ми туж данъяськиськом. Пенсие потэмдылы кӧня ар луиз ке но, тӥледыз али но туала дышетӥсьёслы примере понэммы потэ. Малы ке шуоно тӥ ас дырады дышетӥсьлэн секыт ӧнерезлэсь кышкатэк, та званилы гумырды ӵоже оскымон кылиды. Кӧня поколениез тӥ дышетӥды, кӧня поколениез будэтӥды, кӧня поколенилы визьнод сётӥды. Пумтэм тау ужамды понна, — ӟечкыланъёссэ вуттӥз Сайдаш Талгатович.

— Ми ужаку ведь нылпиосты тышкаськыса дышетоно ӧй вал, асьсэос кулэ карыса дышетскизы. Дышетӥсьлэсь кышказы но, гажазы но ваньзы дышетскисьёс, — ответ сётӥз Серафима Михайловна.

Зэмзэ но, юбилярлэн дышетон удысэ пыртэм люкетэз туж бадӟым, малы ке шуоно Серафима Михайловна школаын 38 ар ужам. Со быдэсак ассэ нылпиослы сӥзем — аслазъёсызлы но, мурт нылпиослы но. Тани 40-тӥ арзэ ини со дано шутэтсконын луэ. Туннэ нуналэ дышетскисьёсыз асьсэос но пенсиын ини, жаляса верано, куд-огъёсыз воксё та дуннеысь кошкемын...

— Кинлы ке трос улыны сётэ, нош кинлэсь ке улонзэ витьымтэ шорысь куспетӥ каре..., — шокчыса вераз Серафима Михайловна. — Ма, мыным но кык даур улыны кылдымтэ, дыр, но Инмарен сётэмзэ улэме потэ ай.

Серафима Михайловналэн улонэз юнме ортчымтэ. Лыдъяса быдтонтэм дышетскисьёсты дышетэм дышетӥсьлэн туннэ нуналэ дас одӥг правнукез но вань ини. «Соос понна ик улӥсько», — шуэ со пальпотыса. Тазьы пальпотыса, каньыл улыны мед кылдоз али Серафима Михайловналы.

Реклама
Теги: юбилей
Нравится
Поделиться:
Реклама
Комментарии (0)
Осталось символов: