Хезмәт

Историез адямиос кылдыто

Бен, историез адямиос кылдыто. Ӵапак та веранэз лыдэ басьтыса, кылем арлэн пумаз ми, газетын ужасьёс, лыдӟисьёсмылы нимысьтыз куронэн вазиськимы

Кулэ вал тодыны куке но «Азьлане» газетын ужам адямиос сярысь вакчияк ке но информация. Сётӥмы вал вуж 1935-1960-тӥ аръёсысь газетъёслэн подшивкаосысьтызы шедьтэм нимтулъёсты, оло, кин ке мар ке вераны быгатоз шуыса. Жаляса верано, та куронмы пумысен редакциын кусып тупатӥсьёс трос ӧз луэ, кык-куинь мурт гинэ. Озьы ке но соослэн юрттэменызы но газетлэн вуж подшивкаосаз бугыръяськемлы луыса, мар но со тодыны луиз.

Мария Петровна Барышникова

«... Мария Петровна Барышникова вордскиз 1914 арын Село Ципьяын шоро-куспо улӥсь крестьян семьяын.

Мария Петровна Барышникова Советской власть дыръя будӥз. Со отлично дышетскиз школаын. Чырткем но етӥз будӥсь Мария Петровна неполной средней школаын дышетсконзэ 1929-тӥ арын быдэстӥз. Собере 15 аресэн Ципьинской начальной школаын дышетэ. Мария Петровна азьланьын дышетскыны мылкыд карыса, со Арской педагогической училищее дышетскыны пыре.

Жадёнэз валатэк дышетскиз Мария Петровна. Педагог луыса бертон но вордскем колхозаз вань кужымзэ сётыса, пиналъёслы умой воспитание сётон понна малпа вал со. Солэн малпамъёсыз зэмазы. Мария Петровна педучилищеын дышетсконзэ 1935 арын быдэстӥз.

Со дышетӥсь луиз... Сюосын солэн дышетэм адямиосыз дышетӥсьёс. Советской армиын офицеръёс, лётчикъёс, партийной но советской ужасьёс луизы.

Школаез, нылпиосты пумтэм яратон солэн быдэс улоназ пыӵаз.

Правительство котьку бадӟым дан сётэ таӵе ӟеч ужасьёслы. Барышниковалы «1941-1945 аръёсы Быдӟым Отечественной война дыръя дано ужам понна» медаль сётэмын.

Мария Петровна Барышникова — калыклэн осконо нылыз...» Тазьы гожтэмын «Азьлане» газетлэн 1947-тӥ арын 24 ноябре потэм номераз. Газетамы вазиськонмес печатлам бере ик ми доры редакцие Елена Васильевна Чакмина вуылӥз. Утёд ке, Мария Петровна Барышникова солэн анайзыез луэм, кузпалызлэн анаез. «Мария Петровналэсь «Азьлане» газетын ужамзэ уг тодӥськы», — шуиз со. Озьыен, янгышаськеммы. Но котьма ке но, ас дыраз, трос мукет дышетӥсьёс выллем, «Азьлане» газетэн со юн кусып возем, вылды, малы ке шуоно солэн нимыз вуж подшивкаосын пумиськылэ. Эшшо на ке, Мария Петровна Барышникова «Азьлане» газетлэн нырысетӥ редакторезлэн, Николай Сергеевич Чакминлэн, ичименез — вынызлэн Василий Сергеевич Чакминлэн (со но «Азьлане» газетлэн активной селькорез луэм) кышноез. Кузпалъёс кыкназы но дышетӥсьёс луиллям. Валче ужаллям, нырысь Покчи Лӧзяын, бератаз Ципьяын. Василий Сергеевич Покчи Лӧзя школалэн директорез но луэм. Мария Петровналы кузпалэн кема улыны кылдымтэ. Василий Сергеевичез войнае басьтӥллям но 1944-тӥ арын со Белоруссиын бырыны шедем. Елена Васильевналэн верамезъя, анайзыез 40 ар ӵоже витем кузпалэзлэсь бертэмзэ. Мария Барышникова 1989-тӥ арын кулэм. Висеменыз сэрен пенсие потытозяз ужамтэ. Берло аръёсы удмурт кылъя урокъёсты нуэм.

Григорий Николаевич Сезаев

«...Григорий Николаевич Сезаев вордскиз 1902 арын ТАССР-ысь, Таканышской районысь Верхни Шунь гуртын куанер улӥсь крестьян семьяын. Григорий Николаевичлэн трудовой ужез кутске 1913 арын. 1913 арысен 1918 арозь Кукморын капиталистлэн гын сапег лэсьтон фабрикаяз ужа. 1918 арысен 1924 арозь Кукмороысь «Красной текстильщик» гын сапег лэсьтон фабрикаын ужа. 1924 арысен 1927 аръёсы Горд Армиын служить каре. 1928 арын семьяез колхозэ пыре. 1927 арысен 1936 аръёсы ужаса улӥсьёслэн депутатъёссылэн сельской Советэзлэн председателез луыса ужа. 1931 арысен ВКП(б)-лэн членэз.

1936 арын июньысен 1937 арлэн нояброзь ВКП(б) райкомлэн инструкторезлэсь ужъёссэ быдэсъя. 1937 арын ноябре ВКП(б)-лэн Кукморской райкомез Сезаев эшез бырйиз ВКП(б) райкомлэн куиньметӥ секретаре, отын 1942 арозь ужа.

1939 арын ужаса улӥсьёслэн депутатъёссылэн Кукморской районной Советэ депутатэ но президиуме членэ быръемын.

1942 арын январысен 1943 арлэн июлёзь Ципья районысь Димитровской МТС-лэн политотделэзлэн начальникез луыса ужа.

1943 арын июле ВКП(б) райкомлэн пленумез Сезаев эшез бырйиз райкомлэн кадръёсъя секретаре. 25 номеро Старо-Кушкетской избирательной округысь бырйисьёс Сезаев эшез ужаса улӥсьёслэн депутатъёссылэн районной Советаз депутатэ кандидатэ ӵектӥзы». («Азьлане» 24 ноябрь, 1947-тӥ ар, #56)

«Азьлане» газетлэн 1943-1946 аръёсысь подшивкаосаз Григорий Сезаевлэн кылкутӥсь редактор понна ужамез пусъемын.

Семён Иванович Лобанов

«...Семён Иванович Лобанов вордскиз 1924 арын 9 сентябре Вукогуртын. Со дыре шор ёзо школаез йылпумъяны туж секыт ке но вал, соослэн выжыязы дышетскем адямиос луэмысь, сое но дышето, шор ёзо тодон-валан сёто... Дышетӥсь луон малпанзэ улонэ пыӵатыны малпаса, Казаньысь педагогической училищее дышетскыны пыре... 1943 арын Семён Лобановлы но черод вуэ, со но жугиськонэ кошке... Со арын ик секыт сӧсырме. Бакуысь госпитальын кема дыр эмъяськемез бере, сое дор палъёсаз лэзё.

Жугиськонысь бертэм дышетӥсьлы соку ик уж сёто. Со Сырьяын но мукет гуртъёсын пиналъёслы тодон-валан сётэ. 1947 арын Кургем гуртысь дышетӥсь луыса ужась Надя нылын улонзэ герӟа. 1949 арын Ӟаныын сизьым аръем школа усьтон сярысь решение луэм бере, солы директоре кинэ тодмоян пумысен кема малпаськыса ӧз улэ. Дышетон ужын шӧдскымон опытэз луэм, хозяйственной ужъёсты но ӟеч валам Семён Ивановичез Ӟаны сизьым аръем школалы директоре тодмояло... Ӟаные нырысетӥ лыктэменыз, Семён Иванович татысь коллективен 1954 арозь кивалтӥз. Татын ужан аръёсы Семён Иванович ужлэсь люкиськытэк Ижевскысь педагогической институтлэсь биологияя факультетсэ йылпумъяз...

Ньлыь ар ӵоже Кургемысь школаын, Ципья райкомын инструктор луыса, «Азьлане» газетлэн редакцияз ужамез бере 1958 арын сое выльысь Ӟаны школалы директоре тодмояло...

Улонэзлэн берло аръёсаз Семён Иванович Ципья шор ёзо школаын дышетӥз. Туж вазь, 1977 арын 55 аресэн югыт дуннеен люкиськиз...»

«Азьлане», 12 июнь, 1999 ар, Александр Кунаевлэн Ѓаны школалэн 50 аръем юбилеезлы сӥзем гожтэмысьтыз»

Иван Андреевич Андреев

Иван Андреевич Андреевлэн но нимыз «Азьлане» газетлэн вуж подшивкаосаз пумиське. Кылсярысь, 1938-тӥ арлэн подшивкаосызъя учконо ке, со редактор понна ужам шуыса валаны луэ. Со ик дыре ВКП(б)-лэн райкомезлэн секретарез но луэм. Иван Андреев вордскемын 1903-тӥ арын Пор-Кутеш гуртын. Кушкет гуртысь церковно-приходской школаез йылпумъя. 1932-тӥ арысен ВКП(б)-лэн членэз. Пыриське Быдӟым тыложе, старшой лейтенант званиен бертэ, кык орденэз вань. Тани ма гожтэм вал со сярысь одӥгаз орденъёсын пусъем аспалъёсмылы сӥзем статьяяз Василий Никитин: «...Ожмаське 3-тӥ Украинской фронтын 291-тӥ стрелковой полкын. 25 июле Каунас городэ пырон палась Василишка гурт дорын лейтенант Андреев кышкасьтэм луэмзэ но взводэн усто кивалтыны быгатэмзэ возьматэ. Солэн взводэз фашистъёслэсь кык контратаказэс пезьгытэ, соин тушмонлы трос ыштон вае. Миномётэн ыбылыса, 17 немецкой пехотинецъёс погыртэмын вал. Та жугиськонын Андреевлэн чотаз но куинь гитлеровец. Командирзы гвардиысь подполковник Уфинцев лейтенант Андреевез «Горд Кизили» орденэн наградить карыны ӵектэ...» Дораз бертэ 1945 арын. Иван Андреевич ужамын сельсоветлэн но колхозлэн председателез луыса. Пенсие потытозяз асьсэ гуртазы магазинын вузкарись луыса тыршем. Кузпалэныз ӵош вить нылпи вордӥллям». («Азьлане», 13 май 2016 ар, # 34)

Александр Владимирович Трофимов

«...Трофимов Александр Владимирович вордскемын 1921 арын (Пор-Кутешын — ред.). Войнае 1941 арын басьто. Службазэ разведчик-эскерись (наблюдатель) луыса ортчытэ. Куинь пол сӧсырме. Днестр шур вамен потыкузы, ассэ кышкасьтэм, дӥсьтӥсь, дисциплинированной луыса возьматэ. Бессарабиын ожмаськыкуз, гитлеровецъёслэн интыяськемзы, соослэн вошъяськылэмзы сярысь янгышатэк шонересь сведениос сётъялля. «Вань сюлмыныз сётскемын Ленинлэн партиезлэн но родиналэн ужъёсыз понна», — гожтэмын наградной листаз «Горд Кизили» орден сётыны ӵектыса. Война бере Трофимов эш улэ Киров улосын, пӧртэм кивалтон ужъёсты быдэсъя». («Азьлане», 13 май 2016 ар, # 34, Василий Никитинлэн гожтэмез)

А. В. Трофимовлэн нимыз 1950-тӥ аръёсысь подшивкаосын пумиське.

Газетамы вазиськон потэм бере Турья гуртысен Макаровъёс но жингыртӥллям вал. Соос П.И.Макаров сярысь вакчияк информация сётӥзы. Пантилеймон Иванович Макаров вордскем Ушма гуртын. Улон сюресэз вуттэм сое Турья гуртэ, кытын со семьяеныз улэм. Пантилеймон Иванович дышетӥсь луыса ужам, нош 1940-тӥ аръёслэн кутсконаз «Азьлане» газетын тыршем. 1941-1942 аръёсы кылкутӥсь редактор луэм.

Редакцилэсь: Та статьяез дасяны юрттэм адямиослы, милям вазиськонмылы мылкыдтэм кыльымтэзы понна, тау кареммес вераськом. Тани соос: Чакмина Елена Васильевна, Андреева Нина Николаевна, Макарова Наталья Андреевна. Оскем потэ, соослэсь адӟем карыса, мукетъёслэн но асьсэ выжы нюжаосынызы тунсыкъяськон мылкыдзы усьтӥськоз шуыса.

Реклама
Нравится
Поделиться:
Реклама
Комментарии (0)
Осталось символов: