Историез улӟытоме

Ваньмы но тодӥськом, «Азьлане» газет 2019-тӥ арын аслэсьтыз 85 аръем юбилейзэ пусъёз шуыса. 85 ар — газет понна бадӟым лыдпус. Но, жаляса верано, ми, егит поколение, район газетмылэн историезлэсь ӝынызэ но ум тодӥське. Тужгес но Ципья районын потон вакытэз сярысь, отын ужам адямиос сярысь. Нош 85 ар куспын кинъёс но ужаллямтэ, луоз, удмурт газетын. Соин но «Азьлане» газетлэсь историзэ но удмурт газетын ужам адямиосты тодон, зэмлыкез шараян вылысь тӥледлы, гажано лыдӟисьёс, юрттэт курыса вазиськиськом. Кылсярысь, газет Ципья районын потыку со зонаысь гуртъёсысь адямиос ужаллям, дыр. Историез адямиос кылдыто. Соин но соосты быдэс район, удмурт калык тодыны кулэ.

Газетмылэн вуж подшивкаосаз бугыръяськыку, куд-ог адямиослэн нимтулъёссы шараяськизы ик. Но кинъёс но кытысь соос тодмо ӧвӧл. Татын но тӥляд юрттэттытэк уг луы. Улӥын сётӥськом та нимтулъёсты: М.Н.Медведева (корректор луэм, газет кылдэм аръёсы ужам), Архипов, Овчинников Павел Тимофеевич, Семёнов, И.А.Андреев, П.И.Макаров, Т.В.Васильева (1940-тӥ аръёсы), Г.Н.Сезаев (1940-тӥ аръёсы), С.В.Романов, А.В.Трофимов, А.И.Абрамов, Д.Ф.Дабаков, Л.В.Бабинцев, М.П.Барышникова, С.И.Лобанов...Та милям шедьтэмез гинэ. Малпаськом, списокез азинтыны луоз, дыр, шуыса. Оскиськом, тӥляд юрттэменыды та ужез интыысьтыз вырӟытыны луоз шуыса. Витиськом тӥлесьтыд ӟеч иворъёс.

«Азьланеос»