Хезмәт

Каньыллыкез утёнын тыршем адями — адӟем карымон адями

Туала дыре внутренней ужъёсъя органъёсты куке но отын ужам ветеранъёстэк син азе пуктыны уг луы. Соос туннэ сӥё-дано шутэтсконын луо ке но, милициын ужам аръёссы сярысь ноку но уг вунэто.

Капитанъёс, лейтенантъёс, огшоры рядовой ужасьёс — соос ваньзы но, пенсиын луэмъёсыз но, али ужасьёсыз но, гажамон адямиос. Старшина званиен пенсие потэм Добромыслов Николай Григорьевич — соослэн одӥгез.

Тани 25 ар ӵоже Николай Григорьевич дано шутэтсконын ини. Солы туннэ нуналэ 78 арес. Огназ улӥсь пиосмуртлэн юртэз чылкыт, малпанъёсыз, тодэ ваёнъёсыз но сайкыт. 28 ар ӵоже Балтасьын милициын шофёр-милиционер должностьын ужан дыраз со, бадӟыматыса вератэк, район калыклэсь каньыллыксэ возьмасьёслэн одӥгез луэм. Соин воргорон трос пӧртэм наградаосын но грамотаосын пусъемын. Но та сярысь вераськыны уг яраты: адямиосты утён — со милям ужмы вал, пе.

Выжыезъя Николай Григорьевич Вылын Ушма гуртысь. Туннэ нуналэ Балтасьын улэ. Секыт война дыре вордскем, война бере аръёсы будэм пияшлэн малпанэз но вылымтэ милиционер луыны. Но  тросэзлэн пияшъёслэн соку милиционер луэмзы потэ ик вылэм — милиционеръёслэн формазы гинэ но адямилы макем оскон пыӵатэ ук! Покчи Лӧзя школаын сизьым классэз йылпумъяса (берлогес, ужаны кутскем бераз, вечерней отделениын 11-тӥ классозь дышетске), Николай колхозэ ужаны интыяське, соку ик шофёрлы но дышетске. Дырыз вуэ армиын служить карыны. Казахстанын куинь ар ӵоже вордӥськем музъемезлы пунэмзэ (долгзэ) сётыса бертэмез бере, нош ик колхозын ужзэ азинтэ. Но татын ини со кемалы уг ӝегатскы — гуртысьтыз участковойзы Балтасе милицие шофёр луыса ужаны ӧте. Кема малпаськытэк, Николай Григорьевич соглаш луэ. (Ужаны интыяськемез бере, кык толэзь ӵоже дышетскон курсъёсты ортче, занятиосы ветлэ. Нош шофёр специальностез луэм ни бере, нимысьтыз дышетсконо уг луы — Н. Ж.) но кык ар ӵоже милициын машиназы  уг луы, соин пиосмурт нырысь милиционер луыса ужа. Кык ар ортчыса шофёр-милиционер луэ. Ӵапак та должньостьын ик пенсие потытозяз но ужа.

Николай Григорьевич ужаны кутскыкуз, 70-тӥ аръёсы, милициын районъя 16 адями гинэ ужам. Тросэз малпало: совето дыре городъёсын но, гуртъёсын но каньыл вал, озьыен, йыруж лэсьтӥсьёс но ӧвӧл. Но кызьы луиз ке но, милициын ужасьёс ноку ужлы ӧз ёрме. Соос сельсоветъёсын юн кусып возизы, асьсэлэн луэм территориысьтызы котькуд адямиез тодӥзы. Кытын ке парсь ыше-а, кытын ке магазинын лушкаськись шеде-а — таӵе дыре котьку милиционеръёсты ӧтиллям. Нош соосын ӵош — шофёрез но.

— Мон шофёр луыса ужай бере, начальникъёсты ветлытон сяна, ӵем гинэ участковойёсты но вызовъёсы ветлытӥ. Мае гинэ адӟыны ӧз тупа сомында ар ӵоже. Пожар луиз-а, кытын ке кирпич лушказы-а — ӝог гинэ дасяськиськод но сюрес вылэ потӥськод. А ведь сыӵе учыръёс ӵемысь ӝыт яке уйин луылӥзы, — валэктэ Николай Григорьевич, — кышнодэ, семьядэ кельтыса ужаны кошкиськод вал.

Соиз ярам ай — транспорт но кулэ ук районъя пӧртэм гуртъёсы ӝог гинэ вуон понна. Николай Григорьевичлэн верамезъя, техника ласянь проблемаос ӧжыт луымтэзы. Отделлы луэм одӥг гинэ машина, одӥг мотоцикл но... куинь вал. Али ведь сюресъёс но начар югдурын вал. Ини берлогес, кӧня ке аръёс ортчыса, Николай Григорьевич ветлыны кутске К-69 машинаен, собере ВАЗ-эн, берло милицилы Жигули но сётӥллям. Ужаз шуг-секытъёс ӧжыт луымтэзы ке но, милицилэн ветеранэз ужам аръёсыз сярысь умойзэ гинэ тодаз вае: «Условиос времаезлы тупась вал. Соку улон сыӵе вал, туала улонэн ӵошатымон ӧвӧл. Туала дыр — со техникалэн дырез. Нош ми дыръя тросэз участковойёс велосипедъёсын ветлӥзы. Секыт ужлы нокин ӧз ӝожтӥськы. Шумпотыса ужаськомы вал егитъёсын но. Мон ачим но мыным прикрепить карем егитъёсты ужаны дышетӥ», — шуэ со.

Ужезлы ӝоӝтӥськытэк тыршись Николай Григорьевичлэн ноку званизэ но будэтэмез потымтэ — солы аслаз интыужез, аслаз званиез — старшина луэмез — кельшем. Нош ялан повышение лэзьыны турттӥсь кивалтӥсьёсызлы  солэн одӥг ответэз луэм: «Мынам аслам яратоно уже но звание вань».

Пенсие потэм бераз но (соку героймылы 53 арес луэ) юртъер котыраз со трос лэсьтӥське, уно пудо вордэ (соку кузпалэз Ольга улэп луэ али, солэн та дуннеысь кошкемезлы но 15 ар тырмем ини). Добромысловъёслэн кык нылпиоссы но асьсэ семьяосынызы уло ини. Марина нылыз — Германиын, Андрей пиез — Балтасьын. Тунсыко, Андрей Добромыслов но, атаез кадь ик, трос аръёс ӵоже милициын (нырысь Балтасьын, собере Казаньын) ужаса, дано шутэтсконэ потэм ини.

— Пенсие потэм бере, мыным мӧзмыт вал. Ужелэсь мӧзми. Сомында ар ужам бере, котькуд гуртын трос тодмоосы луизы. Туж шумпотӥсько, соос монэ али но тодо, али но гажало шуыса. Али валче ужам эшъёсы но вань. Кылсярысь, Ципьяысь Сабиров Салихзянэн ӵем гинэ вераськиськом, кусыпъёсмес ум ыштӥське. Эшшо но шумпотӥсько, полициын ужасьёс милемыз уг вунэто шуыса. Одӥг праздникез но кельтытэк ӟечкылало, али тани полицилэн нуналэзлы сӥзем праздник ужрадэ но ӧтизы, — шумпотэмзэ ватытэк вера Николай Григорьевич. — Милемлы шумпотон понна нош мар кулэ на? Учырен пайдаяськыса, мынам аслэсьтым коллегаосме вуоно Полицилэн нуналэныз ӟечкыламе потэ. Ужады каньыллык, семьяяды шудбур. Полицейскойёслэсь нимзэ данъяськыса нуллэ!

 

 

Реклама
Нравится
Поделиться:
Реклама
Комментарии (0)
Осталось символов: