Карек-Сермаын сюлмысь шулдыръяськизы (+фоторепортаж)

Гурт бадӟым ик ӧвӧл ке но, татын мыло-кыдо адямиос уло, соос котькуд ужрадэз огъя кужыменызы ортчытыны тыршо. Тани мар вераз Карек-Серма клублэн заведующиез Зоя Никитина Йӧвылэпотонлы сӥзем туэез праздник ужрадзы сярысь:

— Йӧвылэпотонэз ми но палэнтӥ ӧм ортче, гуртоосмы понна праздник ужрад радъямы. Якимова Марияен табань пыжимы, самворен чай пӧзьтӥмы. Со дыре ик, табань пыжыку, Анатолий Семёнович Петров пӧртэм шудонъёсты ортчытӥз. Лаканэн бызьылӥзы, бодыен кыстаськизы. Нош шудонъёс йылпумъяськем бере, гуртомы Алексей Иванов мызганэн шудӥз, калык шулдыръяськиз, юмшаз. Озьы ик гурезьын но нискыламы (та понна Игнатьевъёслэн семьязылы бадӟым тау, гурезез соос дасязы). Огъя вераса, ужрадмы туж шулдыр пӧрмиз. Та понна празднике пыриськем ваньзылы гуртоосмылы тау.

Калык туж трос люкаськымтэ ке но, та ужрадлэн шулдыр но тунсыко луэмезлы люкетымтэ. Пичиос но, егитъёс но, бадӟымъёс но — ваньзы — та ӝытэ, сюлмаськон-куректонъёссы сярысь огдырлы ке но вунэтыса, мылысь-кыдысь шутэтскиллям.