«Кенешлэн» кенешоназ

Люкаськонын нырысь ик 2018-тӥ арын быдэстоно ужпумъёс но ортчытоно ужрадъёс тодмостӥськизы. Мазэ веранэз, таяз арын ортчытоно тужгес бадӟым ужрад – со «Гырон быдтон» праздник. Ваньмы тодӥськом, туэез республиканской «Гырон быдтон» асьме ёросамы луоз шуыса. Но та сярысь кенешонын нялтас гинэ верамын вал, малы ке шуоно таче бадӟым но кылкутымон ужрадэз ортчытон нимысьтыз люкаськыса вераськемез кулэ каре.

2018-тӥ арын озьы ик азинтӥськоз покчи классъёсын дышетскись но нылпи садъёсын визьнод басьтӥсь удмурт пиналъёс пӧлын ортчись республиканской «Мудорвай» конкурс. Шор но бадӟым классъёсын дышетскисьёс но палэнэ уз кыле. 5-8 классъёсын дышетскись пиналъёс понна «Николай Михайлович Никифоровлэн творческой наследиез» шуэм темая научно-практической конференция ортчытыны чакламын. Нош бадӟым классъёсын дышетскисьёс понна чебер сямлы пӧрмем пумиськон – асьме ёросысь школаосысь но Кукмор ёросысь Лельвиж гуртысь пиналъёслэн пумиськонзы, кудӥз туэ ортчыны кулэ Покчи Лӧзя школаын. Нылпиосын ужанлы чакламын эшшо одӥгез ужрад, кудӥз ортчыны кулэ Ципья шоръёзо школаын. Веранэ республиканской уровенен ортчись «Диалог культур» шуыса нимаськись научно-практической конференция сярысь.

Ужрадын эскероно ужпумъёслэн эшшо одӥгез вал 8-тӥ толсуре ортчем йылсан-быръён конференцилэсь решениоссэ быдэстон. Та ласянь куинь гожтэт дасямын Балтась ёросын Калыкъёслэн Эшъяськон юртсылэсь филиалзэ усьтыны курыса но удмурт лулчеберетэз азинтонысь азьветлӥсьёслы – Леонид Сапожниковлы но Галина Денисовналы – «Татарстан Республикаысь культура удысысь дано ужась» ним сётон пумысен ходатайствоен районлэн главаезлы Рамиль Нутфуллинлы. Ципья, Покчи Лӧзя но Ярак-Чурма гуртъёсысь нылпи садъёсын удмурт кылэз дышетонъя но азинтонъя воспитательёс ӧвӧл. Штатной единицаосты пыртыны курыса, эшшо одӥгез гожтэт дасямын вал районысь дышетонъя управленилэн кивалтӥсезлы Алия Закиевалы.