«Коллективын кусыпъёс ӟеч луизы ке, со газет вылын но шӧдӥське»

...Вакчияк вераса, вордске Зинаида Ивановна Вылын Ушма гуртын 1963-тӥ арын, крестьян семьяын. Атаез колхозын ужам, анаез — мех фабрикаын. Начальной тодон-валан Зинаида Улын Ушма школаын дышетске, собере Покчи Лӧзяе выже, нош 9-10-тӥ классъёсты Балтасьын йылпумъя ини. Казаньын кӧня ке ар дышетскемез бере гуртэ улыны но ужаны бертэ. Типографиын но редакциын ужам огъя стажез 32 ар луэ.

— Зинаида Ивановна, нырысь вералэ вал, кызьы тӥ типографиын ужаны кутскиды? Кызьы озьы пӧрмиз?

— Мон ведь Балтасьын школаез йылпумъям бере, Казане машинной наборен ужасьлы дышетскыны пыри. Со вал 1980-тӥ ар. Кык ар ӵоже дышетски, нош дышетскыкум татчы, Балтасе, практикае бертылӥ. Соин монэ типографиын умой тодо вал шуыны луэ. Нош ини дышетсконэ йылпумъяськем бере, татчы ик бертыса, аслам ӧнерея ужаны интыяськи.  Гуртысь нылэн валче, Гришкина Еленаен.

— Практикадэс кыӵе ӧнеръя ортчиды?

— Линотипен набирать карыса ортчи. Практикае дыръя трос тодон-валан басьтӥ. Шуыны кулэ, ми газет поттон бордын гинэ ӧвӧл, пӧртэм печатной продукция, районысь предприятиослы бланкъёс поттон бордын но тыршим, соин трос тунсыко ужъёслы дышетски. Со сяна, ужмы тазалыклы изъян вайись шуыса лыдъяське бере (линотип машинаен ужасьёс олово, свинец, сурьма выллем кышкыт веществоосын омырен шокано луизы — ред.), ми стипендия но тросгес басьтӥмы.  

— Соглаш луоды, дыр, практика ортчон — со одӥг. Нош официально уже интыськон — мукет. Татын ужез но тросгес, кылкутонэз но мабыдӟа. Секыт вал-а ужлы дышыны? Кышкан мылкыдъёсты ӧй вал-а?

— Мон дышыны туж секыт вал ӧй шуысал. Бен, котькуд ужлэн аслаз шуг-секытъёсыз вань, дыр. Но милям коллективын ужась адямиосын кадь ужад ке, ваньзылы ужаны дышыны капчи луысал (кытын ужад ке но, котькытын ужан мылкыд коллектив бордысен кутске). Мон сыӵе яратӥ аслэсьтым ужме. Огвыллем ке но вал со, сыӵе но кельше вал. Киос автоматически текстэз бичало вал ини.

— Коллектив сярысь кыл потэм бере, вералэ вал, тӥ ужаку, кинъёсын валтӥсь редакторъёс вал? Кинъёсын валче тӥдледлы ужаны тупаз?

— Ужаны кутскыкум типографилэн кивалтӥсез вал Нутфулла Ахмадуллин, Нурулла Галиев нош — редакцилэн. Дубляжъя редакторлэн воштӥсез — Александр Кунаев вал.

— Нош кыӵе муртъёсын тӥледлы нуналлы быдэ артэ, матын кусып возьыса ужано луиз?

— Ми ведь одӥг газетэз кӧня ӵошен ужамы. Машинкаен нимаз адями, бичась переводэн нимаз, корректор нимаз... Соин ваньзэсын та ужъёсты быдэстӥсь муртъёсын кусыпъёсмы матын вал ни.

— Мон тодэмея, тӥ нырысь линотип машинаен ужаллямды, нош собере берыктӥсь луыса ужаны кутскиллямды.

— Озьы. 1982-тӥ арысен 2002-тӥ арозь типографиын наборщица вал. Нош 2002-тӥ арын типография борӟаськемысь, ужтэк кыли. Отпуск вакытъёсы гинэ ужаны ветлӥсько вал, юрттыны. Нош 2004-тӥ арысен редакциын ужаны кутски, но табере ини берыктӥсь луыса. Татын 2016-тӥ арозь ужай.

— Али ужысь кошкемды бере но «Азьлане» газетын ужась нылъёс ӵемысь тӥледлы кенеш яке юрттэт курыса вазисько вал шуыса тодӥсько, Зинаида Ивановна. Та опытты бадӟым луэм бордын гинэ ӧвӧл, уждэс пыр-поч быдэстэмды бордын, дыр.

— Кӧня типографиын но редакциын ужай, котьку коллективен кусыпъёсы умой вал. Ваньмыз ласянь юрттӥзы. Быгатӥськод-а, уд-а уждэ быдэстыны — нокин но ӧз тышкаськы. Сыӵе умой кусыпъёс возьыны быгатон, юрттон, ог-огдэ валаса, тэрыса ужан — та котькуд ужлэн валтӥсь куронъёсыз луыны кулэ. Соку ваньмыз но умой пӧрмоз. Тӥледлы но сӥзисько валче, ог-огдылы юрттыса ужаны. Коллективен кусыпъёс ӟеч луизы ке, со газет вылын но шӧдӥське.

— Вераськемды понна бадӟым тау.

Зинаида Ивановнаен ӵошен ужаны тупам туннэ нуналэ газетын тыршись муртъёс но со сярысь умойзэ гинэ верало:  ужзэ радызъя быдэсъясь, пыр-поч тыршись, котьку юрттыны дась, туж ӝикыт, сан-сан кышномурт, малпанзэ ватыса уг улы – шонерен вера. Со понна ик гажамон. Та сямъёссэ ыштытэк ик улыны мед кылдоз Зинаида Ивановналы дано шутэтсконаз но.