Котькуд гуртын — нылпи площадка (+фото)

Но котьма шуид ке но, одӥгзэ пусйытэк уг луы: самообложение ӧй ке луысал, котькудаз сямен гуртын нылпи яке спорт площадка ӧй лэсьтӥськысал, дыр. Зэмзэ но, туннэ нуналэ тросаз гуртъёсын соос вань ини яке али лэсьтӥсько. Угось котькытын пиналъёссылэн дырзэс шулдыр но пайдаё ортчытонзы сярысь огкадь сюлмасько. Тӥни озьы Покчи Лӧзя но Ципья кадь бадӟымгес гуртъёсын артэ пичи гуртъёсын но таӵе площадкаос лэсьтӥсько. Тани, кылсярысь, туэ гужем гинэ вакчи дыр куспын Сизнер гуртын но выль ФАП-ен артэ нылпи площадка радэ султӥз. «Синъёс ик шумпото таӵе суредэз адӟыны. Али кӧня ке ар талэсь азьло гинэ та инты пӧртэм куакъёсын, пушнерен но люгыен нюртэмын вал. Нош табере урамтӥ ортчон гинэ но сюлэмлы каньыллык вае: выль ФАП-ез, яркыт нылпи площадкаез, гуртлэсь нуналзэ ортчытыны шуыса нимысьтыз чылкытатэм интыез адӟыса мылкыд ӝутске», — шумпото сизнеръёс. 
Сизнер гуртын ноку но ӧй вал нылпи сад, жаляса верано, покчиёзо школаез но кӧня ке ар талэсь азьло ворсазы. Туж шумпотымон, туннэ нуналэ та пичи удмурт гуртын но пиналъёслэн валче люкаськыса шудон интызы вань. Оскыны кыле, Ципья гуртысь жилищно-коммунальной хозяйствоын ужасьёслэн тыршемзы (ӵапак соос лэсьтӥзы та площадкаез) юнме уз луы, шудон площадкаын шулдыр нылпи куараос уз чалме, пиналъёс трос луозы шуыса.