Кристина Григорьева — асьме пичи Чебераймы

— Ми Удмурт Элькунлэн палэназ улӥсь удмурт нылпиос пӧлын вормись луимы. 19 декабре милемыз ӧтизы сӥлы карон ужрадэ, кудӥз ортчиз Удмуртиысь Калыкъёслэн эшьяськон юртазы, — шумпотон мылкыдъёссэ вера Кристиналэн анаез, со дыре ик кивалтӥсез, Анна Владимировна Григорьева.

— Кузьымъёссы туж умоесь вал. Вормисьёсты дипломен, бадӟым небыт шудонэн (2023-тӥ арлэн символэз — лудкеч) шумпоттӥзы. Озьы ик РФ-ысь Кун Думаысь депутат Лариса Буранова нимысьтыз котькуд вормисьлы Выль арлы ческыт саламъёсын кузьым ыстэм. Данъетан ужрадын нылпиос но, ми но Выль арлы сӥзем представление учкимы, шудӥмы, удмурт флешмоб эктӥмы, шулдыръяськимы. Праздникез радъясьёс но нуисьёс туж капчи мылкыдоесь вал. Шуныт мылкыдъёс но тодэ ваёнъёс гинэ кылизы та конкурс сярысь. Азьланяз но одно ик пыриськыны тыршомы. Татчы пыриськемзы луэ нылпи садэ ветлӥсьёслэн но, покчи классъёсын дышетскись пиналъёслэн но. Ми али 3-тӥ классын дышетскиськомы, озьыен, вуоно аре но пыриськеммы луэ на, — шуэ пичи Чебераймылэн анаез.

Вормисьёсты сӥлы каризы 19-тӥ толсуре Ижкарын Калыкъёслэн эшъяськон юртазы. Кызьы ивортэ «Удмуртия» агентство, отчы Удмуртиысь но бускель улосвылъёсысь 54 пиналъёс но соослэн дышетӥсьёссы, визьнодасьёссы но анай-атайёссы ӧтчамын вал. Туэез вожвылъяськон Россиын улӥсь калыкъёслэн лулчеберет мерассылэн арез улсын ортчем.

Ужрад куинетӥ арзэ ини онлайн амалэн нылпи садэ ветлӥсь но покчиёзо школаын дышетскись пиналъёс пӧлын радъяськем. Жюрилэн ёзчиосыз, пыриськисьёслэсь видео ужъёссэс эскерыса, вормисьёсты шараяллям. Озьы, нылпи садын визьнод басьтӥсь но покчи классъёсын дышетскись пиналъёс пӧлысь Удмуртилэн уйпал, шор, лымшор ёросъёсысьтыз, каръёсысьтыз но бускель улосвылъёсысь «Пичи Чеберайёсты» но «Пичи Батыръёсты» бырйиллям. Со сяна, пӧртэм номинациосын вормем пиналъёсты но пусйиллям. Сӥё-дано ужрадэз но пиналъёсты Тол Бабай но Лымы Ныл, «Ӟечбур!» газетысь Гири но Капа нимо геройёс шулдыртӥллям.

Нялтас вераса, «Удмурт нылкышно кенеш» огазеяськонлэн кичӧлтэмезъя удмурт нылпиос понна радъям та вожвылъяськон 20 арлэсь тросгес историеныз но ушъяськыны быгатэ вылэм ини. Туннэ нуналэ элькун конкурсэ палэнысь улосвылъёсысь нылпиос но пыриськыны быгато бере, вожвылъяськонэз улоскуспо шуыса но ниманы быгатӥськомы ини.

Нылпилэн котькуд вормоназ анай-атайлэн, матысьёсызлэн люкетсы бадӟым луэ. Кристиналэн вормонэз сярысь но озьы вераны луоз, дыр. Соин но асьме ёросысь муспотон нылашлэн «Пичи Чеберайёс но Батыръёс - 2022» вожвылъяськонын вормемез сярысь тодэм бере, Вукогуртысь Григорьевъёслэн семьяенызы матысенгес тодматскем потӥз. Анаеныз, Анна Владимировна Григорьеваен, кусып тупатӥ:

— Анна, вал-а тӥляд азьло но та конкурсэ пыриськылэмды?

— Та конкурсэ ми нырысьсэ пыриськимы. Положенизэ интернетысь шедьтыса, милемлы туж тунсыко потӥз. Кулэ вал, 3 куронъёсты лыдэ басьтыса, видеоролик дасяны. Нырысетӥез курон — «Мон но мынам калыке» шуыса нимаськем визитка. Отын ачид но аслад калыкед сярысь верано вал, маин со тунсыко но маиныз данъяськыны быгатэ. Кыкетӥ заданиея нылпи аслэсьтыз творческой быгатонлыкъёссэ, устолыксэ возьматыны кулэ вал, кылбур верано яке кырӟан кырӟано, я спектакль пуктоно. Куинетӥез курон — калыкедлэн узырлыкез, лулчеберет мерасэз сярысь веран. Котькудӥз люкет ог 2-3 минутъем луыны кулэ вал. Вераны кулэ, со капчи уж ӧвӧл. Одӥг люкетсэ гинэ но олокӧня пол кутскыса уськытӥмы, озьы ке но милемлы туж кельшиз та конкурс.

— Удмурт ужрадъёсы ӵем-а пыриськиськоды?

— Ми тунсыкъяськиськомы удмурт лулчеберетлы сӥзем конкурсъёсын. Мыным аслым нырысь ик ваньмыз та ужрадъёс кельшо. Собере нылме но пыртӥсько ини, тыршисько со но мед гажалоз анай кылзэ, мед яратоз но данъяськоз удмурт калыкеныз шуыса. Котькуд аре «Мудорвай» конкурсэ пыриськиськомы. Кылем арын Казане но «Мудорвайлэн» гала-концертаз мыныны шуд усиз. Туж шумпотӥмы соку. Озьы ик кемалась ӧвӧл «Кылбугор» шуыса нимаськем нылпиослы сӥзем улоскуспо фестивале пыриськимы но, кылбур вераса, нырысетӥ инты басьтӥмы. Гала-концертэз Менделеевскын ортчиз. Таиз но вормонмы милемыз бурдъяз. Тыршиськомы пыриськыны удмурт лулчеберетлы сӥзем ужрадьёсы, одӥгзэ но кельтытэк, малы ке шуоно котькудаз одно ик мар ке но выльзэ тодӥськод, удмурт кылдэ волятӥськод, шонер, чылкыт но рос-прос вераськыны дышетскиськод. Кызьы верай ини, мон ачим но сюлмысь пыриськисько удмурт лулчеберетлы сӥзем ужрадъёсы. Кемалась ӧвӧл гуртысьтымы самодеятельной коллективенымы пыриськимы «Вордскем пал крезьгуръёс» («Родные мотивы») шуыса нимаськем фестивале. Одӥг арын «Эшъяськонлэн ошмесэз» («Родник дружбы») конкурс радъямын вал. Отчы но пыриськимы.  Оглом вераса, мыным мыло-кыдо улонэн улыны кельше.

— Бен, «Вордскем пал крезьгуръёс» фестивальлэн гала-концертаз ачим но ветлӥ вал. Зэмзэ но, Вукогуртъёслэн выступлениоссы сюлмысь кельшизы. Паймыса но шумпотыса учки номеръёстэс. Туж зол дасяськиллямды. Та котьма шуид ке но, клубен кивалтӥсьлэн гинэ тыршемез ӧвӧл, огъя тыршемлэн бервылэз луэ шуыса малпай со минутъёсы. Сыӵе команда луыку, клубен кивалтӥсьлы но умой, ужаны мылкыд но ӝутске… Озьыен, гурттылэн улоназ мыло-кыдо пыриськиськоды?

— Зэм, милям командамы туж зол. Бадӟым тау Залкеева Марина Валерьевналы, со милям устолыкъя кивалтӥсьмы. Ваньзы но ансамбле ветлӥсьёсмы милям туж устоесь кырӟаны но, эктыны но, инструментэн но шудыны. Мылысь-кыдысь ветлӥськомы репетициосы, гужем гуртамы праздникъёс ортчытӥськомы. Татын вань гурт калыкмылы бадӟым тау шуоно, соос милемыз поддержать каро шуыса, нимысьтыз гуртмылэн старостаезлы Степанов Юрий Афанасьевичлы. Огъя вераса, шулдыр но валче улӥськомы.

— Туж умой. Шумпотымон но мукетъёслы адӟем карымон. Котькуд гуртын сыӵеос мед луозы вал. Шонер ке тодӥсько, Вукогурт тӥляд вордскем гуртты ӧвӧл, бызем гуртты. Нош кытысь тӥ асьтэос, кызьы ми пала вуиды?

— Мон ачим Удмуртилэн Кизнер ёросаз вордӥськемын. Йылпумьяй Удмурт кун университетысь удмурт кылосбуръя факультетэз (удмурт но англи кылъя ёзэтсэ). Мынам вал Вуж Кушкетысь эше. Со тодматӥз вуоно кузпалэным, Сергеен. Нырысь интернет пыр кусып возимы, собере мон та пала куное ветлӥ, собере Сергей ветлӥз... Озьы ик ӵош луимы.

— Мон котьку ми палан улӥсь тупал удмуртъёслэсь (тодӥськоды, дыр, ини, Удмуртиысь удмуртъёсты татын озьы шуо шуыса) юасько, секыт вал-а татын улыны дышыны. Ведь котьма ке но, бигеръёс пӧлын уло бере, татысь удмуртъёс мукетгес, вераськонзы но, сямзы но мукет. Асьтэ сямен ик вераськиськоды-а яке ми кадь-а? Ведь кин ке гумырыз ӵоже улыса но ас диалектэныз вераське.

— Капчи ӧй вал дышыны, мазэ веранэз. Татын ваньмыз мукет. Чылкак мукет. Эшшо бигер школаын, бигеръёс пӧлын ужасько. (Анна Владимировна Нуринер школаын англи кылъя урокъёсты нуэ — О.П.). Но мон тыршисько ас диалектэным вераськыны. Котьма ке но, со мыным матынгес.

— Бен, котькинлы аслазэз матынгес. Со озьы луыны кулэ но шуыса малпасько мон. Туж гажамон асьтэ вераськеттэс утьыны тыршемды... Озьыен, семьяяды удмурт кылын вераськиськоды?

— Озьы, семьяямы одно ик удмурт кылын вераськиськомы. Озьытэк, «Чеберай» вожвылъяськонэ но пыриськыны ӧм быгатысалмы, малы ке шуоно конкурслэн валтӥсь куронэз вал нылпилэн удмурт кылын чылкыт, вольыт вераськыны быгатэмез.

— Нош бигер кылэз тодӥськоды-а?

— Валасько, но уг вераськиськы.

— Семьяды сярысь но кӧня ке верамды уз поты меда?

— Кузпалэ ужа МЧС-ын пожарной луыса. Улӥськомы анай-атаенымы валче. Анайзые Евгения Константиновна но атайзые Пётр Афанасьевич милемыз котьку поддержать каро. Ог-огмес валаса улыны тыршиськомы ми.

— Туж бадӟым тау тӥледлы, Анна Владимировна, вераськемды понна. Эшшо огпол ӟечкыласько огъя вормонэныды, сӥзисько выль вормонъёс, тазалык но сӥясьтэм мылкыд.