Кужымзэс жалятэк тыршизы уж доразы

Нылпиослы но капчи ӧй вал соку, 12-13 аресысен ужаны кутскизы, сиён но соослы тырмыт ӧй вал. Ӵем дыръя пичи нуныос но доразы ас коже кыльылӥзы. Озьы ке но вань шуг-секытъёс пыр йыгмыт вамыштӥзы, гажан мылкыд кельто улон сюресазы.

Вукогуртысь гажано мӧйы адямиосмы сярысь вакчияк вераме потэ. Соос пӧлын Олька апай Степанова. Туж каньыл но мыло-кыдо песянай: нунокъёссэ чаклано-а, висись пересьёсты эскероно-утёно-а, бускельёслы юрттоно-а — котьку вазиськыны дась. Киужлы но туж усто. Гуртын улӥсьёслы дэремъёс вурылӥз, мыным но школаез йылпумъяку выпускной дэрем вуриз. Картэзлэсь, Опонь агайлэсь Маня племянницазэ дӥсятылӥз со дырлы тупась модая, ас киыныз вурем дэремъёсын-костюмъёсын. Ми, солэн эшъёсыз, вожъяськиськом но вал. Опонь агаен ӵош Маняез быдэ вуттӥзы асьсэлэн нылпизы кадь ик, со сяна асьсэлэсь вить нылпиоссэ будэтӥзы ай. Нош Валя апай Никитинаез «ходячая энциклопедия» шуысал, оло, егит дыръяз клубын но библиотекаын ужамысьтыз, оло анаезлэсь верамъёссэ пеляз пыртыса кельтэмысьтыз — мур тодыса вераны быгатэ гуртоосмы сярысь. Гуртмы сярысь егитъёс ӵем дыръя юалляськыло вашкала дӥськутъёсты но ужтӥрлыкъёсты утисьлэсь Зина апай Кузнецовалэсь. Солэн племянникез, кибашлы Юра Кузнецов, колхоз мастерскойын станокъёсын ужакуз пӧртэм детальёс лэсьтылӥз, куддыр быдэстыны луонтэмъёссэ но. Егитъёсты ужаны но дышетоз, визь-кенеш но сётоз. Гуртамы уно аръёс ӵоже вузкарись луыса ужаз Зоя апай Перемечева. Толалтэ кезьыт магазинын ужаны чидаз, валэн товар но нуллӥз ачиз ик. Туж кулэ дыръяз адямиос дорысьтыз но ӧтьылӥзы магазинэ, котьку юрттылӥз шуг-секытысь потыны. Фермаын быдэс улонзэс тыршизы Зина апай Перемечева, Люда апай Кузнецова Вася агаен ӵош, Надя апай Щербакова Егор агаен ӵош, Таня апай Филиппова, Лиза апай Сидорова. Ас дыразы таослэн ваньзылэн ужзы туж секыт вал: скал кыскон, кыед поттон, скалъёслы юон, сиён дасян-сётъян — ваньзэ киын быдэсъязы. Тросэзлэн секыт ужаса тазалыксы лябӟемын ни. Анна апай Пашкеева туж усто суредаське вал, ми егитъёс со доры пужыятӥськыны узоръёслы пыраллямы. Кема аръёс ӵоже аптекаын ужаса пенсие потӥз Валя кенак Лобанова. Зоя апай Туктарова ужан аръёссэ герӟаз нылпиосты дышетон удысэн. Пусъеме потэ гурт калыкен гажамон, туж мыло-кыдо, вазиськись но котькыӵе ужрадэ пыриськись мӧйы воргоронъёсты: Геня агай Мурсатовез, Гурьян агай Перемечевез, Пётр Туктаровез, Гена Раимовез но мукетъёссэ. Таосты, синмаськымон мӧйы адямиосты, но трос мукет адӟем карымон пиналгес пенсионеръёсты ӟечкыласько Мӧйыослэн праздникенызы. Улонады яркыт но ӟеч учыръёс гинэ мед луозы, быдэстонтэм ӟеч малпанъёсты но мед быдэсмозы. Кема улыны тазалык сӥзисько тӥледлы, гажано гуртоосы.

Вера Лобанова

Ижевск