Малпанъёс улӟизы

Страна понна туж кышкыт ож аръёсы вань калык тушмонлы пумит султӥз. Соос полын сюрсъёсын егит нылъёс но пиос, нылкышноос но пиосмуртъёс ӵош киязы пыӵал кутыса ожмаськизы. Тӥни со сюрсъёс пӧлысь тыложе пыриськизы мынам дуно атае Иван Григорьевич Кумаев но мусо анае Мария Михайловна Исаева, кудъёсыз вордскиллям но улӥзы туж чебер Вуж Кушкет гуртын. Та веранме сӥзисько соослы.

Атаймы Кумаев Иван Григорьевич Быдӟым Отечественной война кутскыку Маньчжуриын служить каре вылэм. Нош фашистъёс странамылэсь границаоссэ тӥяса пыремзы бере, соослэсь полксэс ӝегатскытэк шундыпуксён пала выжто. Нырысь ик Тамбове вуо, нош отысен пырак Смоленской направлениын передовой линие пырто. Со служить карем 162-тӥ стрелковой полклы бадӟым ыштонъёсын чигнаны тупа.

– Пинез куртчыса чигнамы, – солэн та верамез котьку сюлэмам. – Киямы винтовкаос, нош патронъёс ӧвӧл. Одӥг винтовкаен гинэ тушмонлы пумит сылод шат? Тушмонэз берлань улляны кутсткем бере, со секыт сӧсырме. Медицинской комиссия сое азьпалан военной службалы ярантэмен лыдъя. Соин 1943 арын вордскем гуртаз бертэ. Пусъемын нырысетӥ степенё Отечественной война орденэн но мукет медальёсын.

Со арэ ик июль толэзе Ципья районысь военной комиссариатэ ӧтиллям коня ке егит нылъёсты. Соос полын вылэм милям анаймы - пинал ныл Мария Исаева. Колхоззы куанер луэмен, няньзы вылымтэ, сюрес пуйыязы понӥллям горчица пызьлэсь пыжем колӟо нянь. Я ӟуч кылэз, я бигер кылэз пыр-поч тодыса вуттымтэ егит нылэз но эшъёссэ вуттӥллям Казане. Ньыль толэзь ӵоже соос тодматскиллям военной техникаен, ортчиллям егит боецлэсь курссэ. Отын егит ныл нырысьсэ адӟем зенитной пулемётэз, дышетскем соин ыбылыны. Тренировкаос дыръя соос уно пол тубылӥллям ӝужыт зданиослэн одӥгез йылэ интыяськем пулемёт доры.

     Нош собере ини фронт. Поезд соосты вуттэ Белоруссие. Татариысь мукет нылъёсын соос сюро 37-тӥ зенитно-пулемётной полке. Со дырэ ини асьме войскоос матынъясько вылэм Днепр шур доры. Анаймылэн но нырысетӥ оже пыриськонэз луэ Днепр шурез выжон дыръя. Шур вамен выжыкузы, соослэн полксы асьме боецъёсты утем тушмон самолётъёслэсь. Дыртыса гинэ лэсьтэм выжъёсты, со доры люкаськем техникаез утён – тӥни со вылэм соослэн основной ужпумзы.

  – Котькуд расчётын ньыль мурт, – тодам ваисько анайлэсь верамзэ. – Милям расчётамы куинь пиос но мон вал. Белоруссиез, Польшаез тӥни со пиосын ортчи. Командирмы Сергей Быкадыров. Нош наводчикъёсмы – Ростовской областьысь пиос Леонид Кондратьев, но Николай Ануфриенко, мон быдэсъяй прицельнойлэсь ужзэ.

Быдэс Белоруссиез пырпотӥмы, вуимы Польшалэн столицаез Варшава доры. Бам кузяз синвуэз вияса вера вал Варшаваез мозмытон ожъёссы сярысь. Малы ке шуид, татын соослы туж кема сылыны тупам, татын ик соос пумиталлям Быдӟым Вормон нуналэз. Кызьы вунэтод сое?!  Варшава понна мынэм ожъёсын соослэн полксы тушмонлэсь 14 самолётсэ быдтэм. Со понна полксэс наградить кариллям Горд знамяен. Москваысь Центральной военной музейын отделениезлэн туспуктэмъёсыз но, пе, вань. Нош Мария Михайловна пусъемын «За освобождение Варшавы» медален. Асьмелэн основной кужымъёсмы азьпала кошкем бере но соослэсь полксэс отчы ик кельто. Малы ке шуоно, мозмытэм город вылэ но немецкой самолётъёс ялан вуылӥллям. Пиосмуртъёсын одӥг радын кык ар ӵоже ож сюресъёстӥ вамышъям Мария Михайловна Исаева 1945 арлэн августаз вордскем гуртаз бертэ. Пусъемын кыкетӥ степенё «Быдӟым Отечественной война» орденэн но мукет медальёсын.

      Тылож бере яраоссэс йӧнатон аръёсы соос валче улыны карисько. Будэто куать нылпиоссэс. Ваньмылы сёто тодон-валан, адямиос радэ потто. Юн пыӵато арлыдоосты, калыкез но ужез яратыса улон сям. Атаймылэн верам кылъёсыз али но пель сьӧрам: «Туннэ ужаны луэм ужез ӵуказелы кельтоно ӧвӧл». Туж визьмо кылъёс. Туэ 25 ар луоз – кызьы кулӥз атаймы, ӧвӧл ни анаймы но. Ми соосты котьку тодамы возиськом но данъяськиськом! Кылем арын ваньмы пумиськимы атай юртын. Отын милемыз туж шуныт пумита агаймы – Григорий Иванович. Анай интые кылемын бадӟым апаймы – Павлова Елизавета Ивановна, кудӥз улэ Нурма гуртын.

– Калыкын тазьы верало: «Писпулэн емышез выжыяз ик усе, бӧрысь отысь сыӵе ик пушьет потэ». Туннэ нуналлы странамылэн пӧртэм сэрегъёсаз выжы лэземын 11 внукъёсыз, 13 правнукъёсыз. Вунонтэм полке туэ султозы буре вайыса анай-атаймес Ижевскын улӥсь бадӟымез агаймы  Кумаев Николай Иванович, Пермьын – Галина Ивановна (нылпиосыныз но внукъёсыныз), Хабаровскын – аслаз семьяеныз Валерий Иванович, Удмуртиысь Кизнер посёлокын – Елена (покчи нылзы).

Котьку тодамы возёмы адямиосты, кудъёсыз утизы музъеммес кышкыт тушмонлэсь, асьмеос эрико но шудо мед уломы шуыса та югыт Дунне вылын. Мон малпамъя, ӧвӧл асьмелэн сыӵе правомы со дыръёсты вунэтыны! Ваньдэсты вуоно Быдӟым Вормон нуналэн!

Елена Кумаева,

 Кизнер каргурт

Туспуктэмъёс Кумаевъёслэн

семья архивысьтызы