«Мудорвай» шаермы кузя вамышъя

Нылпиос пӧлын ортчытӥськись удмурт лулчеберетъя конкурс туэ улоскуспо вожвылъяськон луыса радъяське

Бен, туэез «Мудорвай» конкурс азьлоосызлэсь аслаз географиеныз висъяське: туэ со улоскуспо вожвылъяськон луыса ортчытӥське, малы ке шуоно конкурсэ пыриськыны мылкыд карисьёс пӧлын Удмуртиысь пиналъёс но вань вылэм.

Соос Татарстанысь асьсэлы матын интыяськем ёросъёсын творческой быгатонлыкъёссэс, устолыксэс возьматозы шуыса ивортэ Татарстанысь удмуртъёслэн НКА-зылэн ужрадъясь директорез Ольга Чайникова. Озьыен, «Мудорвай» конкурс асьме элькунамы гинэ ӧвӧл, бускель но мукет улосвылъёсын но тодмо луыны кутске. Кин тодэ, оло, куке но со калыккуспо вожвылъяськон луыса ортчытӥськоз. Созэ улыса адӟом.

Туэ но «Мудорвай» конкурслэн муниципал этапезлы мытон сётӥз Балтась ёрос. Туэ но со куинь зонаын ортчытӥськиз.

Конкурслэн муниципал этапезлэн очной турез кутскиз 7-тӥ шуркынмонэ Ципья черкогуртын. Отчы мыло-кыдо пыриськизы Ципья шоръёзо школаысь покчи классъёсын дышетскисьёс но Ципья нылпи садын визьнод басьтӥсь пиналъёс.

«Мудорвайлэн» кыкетӥ нуналэз ортчиз Ӟаныын. Та нуналэ асьсэлэсь удмурт кылын кырӟаны, эктыны но кылбур вераны быгатэмзэс возьматӥзы ини Ӟаны школаысь но нылпи садысь пиналъёс, озьы ик Вуж Кушкет покчиёзо школаын тодон-валан басьтӥсьёс.

Вожвылъяськонлэн ёросамы ортчем зональной этапез 9-тӥ шуркынмонэ Покчи Лӧзя Лулчеберетъя юртын йылпумъяськиз. Татын удмурт лулчеберетэн мукет калыкысь нылпиос но тунсыкъясько шуыса валаны луиз. Ужрад туж яркыт, аспӧртэмлыко но эшлыко пӧрмиз. Тае пусйиз Казаньысь вуэм куно но, ТР-ысь удмуртъёслэн НКА-зылэн ужрадъясь директорез Ольга Чайникова но.

— Туж потэ вал пусъеме, туннэ концертмылэсь аспӧртэмлыксэ. Туннэез концертмы туж колоритной луиз, малы ке шуоно татчы удмуртъёс гинэ ӧз пыриське, озьы ик пыриськизы мукет йӧскалыкысь нылпиос но, — шуиз со.

Зэм, та нуналэ Покчи Лӧзя школаысь но нылпи садысь пиналъёсын, Ярак-Чурма но Вылын Ушма школа-нылпи садъёсын визьнод но тодон-валан люкасьёсын ӵош асьсэлэсь устолыксэс сцена вылын возьматӥзы Балтасьысь но Карелиноысь нылпи садъёсы ветлӥсь пиналъёс но.

Туэ но котькудаз зонаын нылпиос учкисьёсты но, жюрилэсь членъёссэ но чебер кырӟанъёсынызы но кылбуръёсынызы, шулдыр эктонъёсынызы но яркыт дӥськутъёсынызы шумпоттӥзы.

Кызьы тодӥськом, покчи пиналъёс пӧлын удмурт лулчеберетэн тунсыкъяськонэз будэтон ужпумен кылдытэм конкурслэн очной люкетэз сяна, вань на заочной турез но, мукет сямен вераса, суредъёсъя конкурс. Татын ини пыриськисьёслэн географизы эшшо но паськыт луиз. Удмурт выжыкылъя суред лэсьтыны заявка сётэмъёс пӧлын, кылсярысь, Бурнак, Янгул, Бурбаш, Сосна, Нуринер, Шишинер нылпи садъёсысь но покчи классъёсысь пиналъёс пумисько.

Тодады вайытӥськом, туэ «Мудорвай» конкурс куатетӥзэ радъяське ини шуыса. Очной этапын нылпиос азьвыл аръёсы кадь ик кылбур лыдӟон, эктон, оген но коллективен кырӟан номинациосъя вожвылъясько. Котькуд номинацияя нимаз вормисьёс но призёръёс бырйисько, кудъёсыз берло конкурслэн Гала-концертаз пыриськозы. Гала-концерт 6-тӥ толсуре луоз шуыса витиське.

Ольга Чайникова, ТР-ысь удмуртъёслэн НКА-зылэн ужрадъясь директорез:  « Милям конкурсмылэн уникальностез со бордын — котькуд аре отчы пырисько 700-лэсь трос нылпиос. Таиз ар но исключение ӧз луы. 700-лэсь трос нылпиос — со удмуртъёс гинэ ӧвӧл, мукет йӧскалыкысь нылпиос но, кудъёсыз озьы ик удмурт кылын чебер кырӟало, удмурт эктонъёсты быдэсто. Соин но туж бадӟым тау, пиналъёс, визьнодасьёс, дышетӥсьёс, кичӧлтондылы, пыриськыны мылкыдды понна. Туж потэ, конкурс паськыт мед вӧлмоз но улоскуспо гинэ ӧвӧл, калыккуспо мед луоз шуыса. Удмурт калыклэн но лулчеберетэз, мукет калык культураос кадь ик, мед утиськоз, мед узырмоз но мед азинскоз.

Фото: Ольга Чайникова