Мылкыдъёс, мылкыдъёс...

Районамы удмурт газетлэн потыны кутскемезлы 85 ар тырмиз. 85 ар... Быдэс даур шуымон. История понна та пичи гинэ вис кадь. Нош улонын та дыр куспын кӧня воштӥськонъёс луиллям, газетлэн кӧня номерез потэм, кӧня адями та газетэз поттон удысын тыршем.

14 инвожое ёрос газетын ужасьёс но ми, газет поттон удысысь ветеранъёс, газетмылэн юбилеяз люкаськимы. Ужрад ортчиз Ӟаны шоръёзо школаын. Школалэсь ӧссэ усьтыса пыремен валче милемыз кырӟаса но эктыса пумитазы удмурт калык дӥсен нылъёс но пиос. Синмаськыса кылзӥмы сюлэмлы матын луэм удмурт крезьгуръёсты. Собере ортчимы актовой залэ.

Газет поттонын ужасьёсты, люкаськем куноосты ӟечкылазы Балтась муниципал ёрослэн исполкомезлэн кивалтӥсезлэн воштӥсез Ильгам Гайнутдинов, газетлэн валтӥсь редакторез Вакиф Закиев, «Кенеш» НКА-лэн Правлениезлэн тӧроез Владислав Никитин. Туннэ нуналэ газетын ужась нылъёс - журналист Наталья Жукова но валтӥсь редакторлэн дубляжъя воштӥсез Ольга Плотникова - газетлэн историеныз, та дыр куспын ужам удмурт газетлэн редакторъёсыныз тодматӥзы. Нылъёс та юбилейлы дасяськон понна бадӟым кужымзэс понӥллям, Казане мыныса архивысь гинэ но материалъёс люкаллям. Вераме потэ, нылъёс туж усто нуизы юбилеез, соос верамъя сцена вылын кулэ туспуктэмъёс но гожъямъёс югдытӥськизы. Газетлэн историеныз тодматон концерт номеръёсын куспатӥськыса нуиськиз. Анисимова Алёнаен но Никитин Василий Петровичен быдэстэм удмурт кырӟанъёс сюлэмез ик вырӟытӥзы. Юбилей ужрад школалэн столовояз йылпумъяськиз.

Туж бадӟым тау валтӥсь редакторлы, удмурт газетэз поттонын тыршись нылъёслы таӵе шулдыр юбилей ужрад радъямзы понна. Мылысь-кыдысь шутэтскимы. Валче ужам эшъёсын пумиськыса вераськон — ачиз одӥг шумпотон ук. Азьланяз но газетын ужась эшъёслы тазалык, шудбур, творческой азинсконъёс сӥзисько.

Мазэ веранэз, редакцие ужаны удмурт журналист басьтэмзы бере, газетлы удмурт шӧм пыриз, со мур пуштросъем но тунсыко луиз. Ёрос газетмылэн гумырыз кузь мед луоз. Ойдолэ, эшъёс, районамы потӥсь газетмылы гожтӥськоме, азьланяз но сое басьтоме но лыдӟоме.

Галина Васильева

газет ужысь ветеран

Покчи Лӧзя гурт

Шуныт пумиськон радъязы

«Азьлане» газетмылэсь 85 аръем юбилейзэ ортчытыны редакциын ужасьёс туж зол дасяськиллям. Лыктэмъёс мар но ӧз тодэ «Азьлане» газетмы сярысь, Ольга Юрьевна но Наталья Леонидовна тупен-тупен тодматӥзы газетлэн ортчем кузь сюресэныз, сое кылдытонэ пыриськем адямиосын. Оломар но тодӥмы куноослэн верамъёсысьтызы но. Пичияк концерт бере бадӟым куно каризы банкетын.

Дышем сямъя юбилярлы саламъёс-кузьымъёс сётъяло, нош татын «азьланеос» азьвыл ужасьёссылы бадӟым саламъёс сётъязы, ушъян но таукарон гожтэтъёсын пусйизы. Бадӟым тау редакциын ужасьёслы таӵе шуныт пумиськон радъямзылы. Кемалась но туж адӟиськеммы потэ вал азьвыл огазе ужам эшъёсынымы.

Вера Лобанова