«Мыным та сяська но тырме»

12 мартэ Ципья гуртысь ужысь ветеранлы, Лидия Александровна Александровалы, 95 арес тырмиз.

Песянаез бадӟым юбилееныз Н. Н. Сабирзянов — Балтась районлэн главаезлэн воштӥсез, Ф. Ф. Юсупова —«Наз» центрлэн директорезлэн воштӥсез, А. Г. Нотфуллин — Ципья гурт поселенилэн главаез ӟечкыланы лыктӥзы. Наиль Нургаязович юбилярлы РФ-лэн Президентэзлэсь ӟечкылан открытказэ, район главалэсь Таукарон гожтэтсэ вуттӥз, озьы ик кузьымъёс но сётӥз.

— Тӥ кадь адямиосын, тужгес но улонын пичи дырысенызы шуг-секытъёс пыр потэм нылкышноосын, ми туж данъяськиськом. Улонысь секытъёслы сётскымтэды, тамында аръёс ӵоже адӟем карымон адями луыса улэмды егит поколение понна пример луэ. Азьланяз но матысь адямиосты вӧзын, шуныт но югыт коркан, шудо но таза луыса улыны мед кылдоз тӥледлы, — шунытэсь мылкыд каронъёссэ вуттӥз Наиль Нургаязович.

Но Лидия Александровна солэсь ӟечкылан кылъёссэ пумозяз ӧз кылзӥськы ни, лэся — лыктэм куноослэн кузьмам сяська керттэтсы шоры синъёссэ басьтытэк учкиз но дугдытэк тау шуиз. Нокыӵе мукет кузьымъёсыз — Наиль Нургаязовичен ваем чебер тӧдьы шаль но, Азат Газизулловичен кузьмам миндэр но — кулэ ӧй вал ни нылкышнолы. «Малы мыным сомында кузьым вайиды, мыным та сяська но тырме», — шуиз Лида апай, возьдаськись егит ныл сямен йырзэ ошыса. Ас малпанъёссэ шараяса ватсаз на: «Таӵе чебер сяська ноку но адӟем ӧй вал ай, кытысен шедьтӥллям, дыр».

Зэмзэ но, та сяська керттэтэз бадӟым узырлыкез выллем басьтӥз со. Картлы бызьымтэ, нылпиосыз луымтэ песянайлы, ӵыжы-выжыосыз сяна, оло, гумырез ӵоже нокин та дырозь сяська керттэт кузьмамтэ но, дыр... Соин, оло, сокем та кузьымезлы шумпотӥз Лидия Александровна.

Гумырез ӵоже со, пичи дырысеныз ик, трос секыт пиосмурт ужъёсты быдэстэм, улонлы ноку ӝожтӥськымтэ.

— Веранэз но ӧвӧл, кыӵе секыт улонэз адӟимы, — вера Лида апайлэн покчи сузэрыз, Екатерина. — Ми семьяын сизьым нылпи вал, ог-огместы утимы, котьку ог-огмылы пыкет луимы. Пичиысен ик ужаса будӥмы. Туала дыре адями ужаса жаде ке, милям поколенимы ужтэк пукыса жаде, — пальпотыса вера со.

Екатерина Александровналэн верамезъя, Лидия апаез улонэз ӵоже Ципьяысь мех фабрикаын ужам, отысь ик дано шутэтсконэ но потэм (жаляса верано, тазалыкезъя юбилярлэн улонэз сярысь аслаз мадемез ӧз луы). Нырысь со кема аръёс ӵоже Ципьяын  Елена апаеныз но солэн кузпалэныз Туканаен (кыкназы но улэп ӧвӧл ни) улэ, туннэ нуналэ — Зоя племянницаезлэн семьяяз. Аслаз кузпалыз но нылпиосыз луымтэен, вань улонзэ Лидия Александровна матысьёсызлы, ӵыжы-выжыосызлы сӥзе, соос понна со котьку котьмазэ сётыны дась луэм.

Матысьёсызлы юрттэмез, лэсьтэм ӟеч ужъёсыз солы аслыз но ӟечен берытскем — адске, та семьяын Лида апаез туж ярато но гажало. Вордскем нуналаз но со доры самой матысь ӵыжы-выжыосыз люкаськизы.Та юн мылкыдо песянайлы сюлмысен тазалык сӥзиськом, азьланяз но, матысьёсызлэсь ӟечсэс гинэ адӟыса, каньыл улонэн улыны мед кылдоз али солы.