Хезмәт

Балтач районы

18+
2024 - Гаилә елы
Азьлане

“Мыным укмыстон арес тырмиз!”

5-тӥ толшоре Яким Сапожников дано лыдпуссэ пусйиз.

Яким Степанович Сапожников — Сырья гуртысь тужгес гажамон адямиослэн одӥгез. 5-тӥ толшоре со 90 аресъем юбилейзэ пусйиз. Арлыдыз шоры учкытэк, мылкыдыз солэн задор но егит. Та нуналэ котырес лыдпусэныз юбилярез  ӟечкыланы вуизы Балтась ёрослэн исполнительной комитетэзлэн кивалтӥсез Айдар Хайрутдинов, “Наз” центрлэн директорез Гульнара Ахмадиева, Ципья гурт поселенилэн главаез Азат Нотфуллин, “Труд” обществолэн кивалтӥсез Рашид Хадиев, озьы ик нылыз, ӵыжы-выжыосыз но вуизы.

— Мон татын вордски, Сырья гуртын. Огшоры куанер семьяын, семьяе понна кыкетӥ пи луыса будӥ, мынам вань вал апае. Агае но вань вал, со армиын служить карыкуз жугиськон кутскем, отын кулӥз. Дышетскимы асьме гуртамы 4-тӥ классозь. Куинетӥ классме йылпумъяме бере, Германилэн Советской Союз вылэ урдскемез тодмо луиз. Кутскиз жугиськон. Со нуналэ ик жугиськон сярысь ваньмыз тодмо вал — кыл вӧлмиз. Ми тодӥмы жугиськон кутскем сярысь, нош радиотӥ номыр ӧз вералэ. Сталин куинь нуналскын гинэ кыл вераз. Сое радиотӥ кылӥмы, соку милям юртамы радиомы вань вал ини. Тросэзлэн радиозы вал ини Сырьяын, куанергес улӥсь семьяослэн гинэ ӧй вал..., — тодэ ваёнъёссэ вераз воргорон.

Война кутскиз шуыса верамзы бере, нылпиос дышетскемысь дугдӥллям. Куинетӥ-ньылетӥ классъёсын дышетскись нылпиосты бусые поттӥллям яснык (чечевица) октыны. «Ми сое (ясныкез — ред.) октӥмы, фронтэ солдатъёслы келян понна. Киосын ишкаллямы со чечевицаез, отын ведь бышкаысь веньёс но вань вал. Вань чиньыосмы со веньёсын гожмаськемын луо вал… Сокем собере чиньыосмы висьылӥзы, киосмес ум ик шӧдӥське вал, — малпанъёсызлы сётскиз юбиляр. — Бусыез октоно бере, вань гуртэн ужаны потӥмы. Соку одӥг нуналскын ваньзэ октыны быгатӥмы. Собере со октэм чечевицаен милемыз но, школьникъёсыз, кин сое октӥз, сюдӥзы. Туж ческыт вал со».

Яким Степанович пичи дырзэ тодаз вайыны кутскиз но трос вераз секыт аръёсы улэмзы сярысь. Валаны но луэ: со кышкыт аръёсты вунэтыны уг луы, котькуд нуналэз мӧйыослэн тодазы улэ. Кӧня сютэм нуналъёсыз луиллям, кӧня курадӟонъёсыз, тэльмыронъёсыз — ачиз гинэ тодэ со. Но ваньмыз  ортчемын ини. Туннэ нуналэ со шуныт но югыт юртын пиеныз но солэн семьяеныз ӵош улэ. Кузпалыз Надежда Егоровна, жаляса верано, кулэмын ини. Соин армиысь бертэмез бере, 1957-тӥ арын семья кылдытӥллям. Кышноез гуртысь колхозын ужась огшоры нылкышно вал. Ачиз но Яким агай гумырыз ӵоже “Труд” колхозын тыршем. Пӧртэм ужъёсты быдэсъяса, фермаын, бусыын ужазы соос кыкназы но.

— Куинь нылпиосмы вордскизы. Константин 1958-тӥ арын вордскиз, Леонид — 1960, Нина — 1965-тӥ арын. Костя пимы кулӥз ини... Туннэ нуналэ Леонид пиеным, солэн кузпалэныз Марияен улӥськомы. Та юртын ик вордскизы но будӥзы кык внучкаосы — Ирина но Ольга. Туннэ нуналэ Ирина Казаньын улэ, нош Ольга — Питерын, — шуэ Яким Степанович. — Али дыре мынам куать внукъёсы но кык правнуке вань ини.

Пенсие Яким агай 1991-тӥ арын потэм ини. Озьы ке но, туннэ нуналэ но со задор мылкыдо, сэзь луэменыз паймытэ. Йырсазез но солэн пинал муртъёслэн кадь сайкыт на. Секыт аръёссэ тодаз возе ке но, улон шоры чебер малпанъёсын учке со. Юбилееныз ӟечкыланы вуэм кивалтӥсьёс но Яким Степановичлы юн тазалык, чырткем луыны но шудо-буро улыны сӥзизы, РФ-лэн Президентэзлэсь ӟечкылан открытказэ, район главалэсь таукарон гожтэтсэ, кузьымъёс кузьмазы.

— Тӥледыз сюлмысен бадӟым юбилееныды ӟечкыласькомы. Тӥледын, арлыдо поколениысь представительёсын, ми данъяськиськомы, тӥледыз гажаськомы. Туала поколение понна, ми понна тӥ юн, кыдам, чидась адямиос, зэмос пример луиськоды. Али кема-кема аръёс ӵоже матысь адямиосты вӧзын кайгу-куректонъёс адӟытэк улыны мед кылдоз, — шуиз Айдар Хайрутдинов.

Яким Степановичлэсь кырӟаны усто луэмзэ тодыса, одӥг кырӟан ке но быдэстыны но куризы куноос. Трос малпаса ӧз улы, кырӟанзэ мытӥз юбиляр. 90 аресъем воргоронлэн куараез жингрес на али.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: 90 аресъем юбилей

2
X